ខេត្តសៀមរាប៖ បុរសម្នាក់ដែលគេស្គាល់ថាជាកម្មករនេសាទបានលង់ទឹក ស្លាប់ ខណៈពេលដែលបានទៅនេសាទត្រីនៅបឹងទន្លេសាប ហើយក៏ចុះទៅងូតទឹកនៅទីនោះ មូលហេតុបណ្តាលមកពីជនរងគ្រោះខ្យល់គរ បើតាមសម្តីរបស់សមត្ថកិច្ចនៅកន្លែងកើតហេតុហេតុការធ្វើឱ្យមានការភ្ញាក់ផ្អើលនោះកើតឡើងនៅវេលាម៉ោង៧និង០០នាទីព្រឹកថ្ងៃទិ១៥ខែកុម្ភៈឆ្នាំ២០១៦ស្ថិតនៅចំណុចតំបន់ជ្រួយថ្កូល ក្នុងទឹកដីចុងឃ្នៀស សង្កាត់/ក្រុង សៀមរាប ជាប់នឹងព្រំប្រទល់ស្រុកពួក ខេត្តសៀមរាប។
លោកវរសេនីយទោ ទេព ពុំសែន អធិការនគរបាលស្រុកពួកបានប្រាប់កម្ពុជាថ្មីថា នៅល្ងាចថ្ងៃទី១៥ខែកុម្ភៈឆ្នាំ២០១៦ថា ក្រោយពីបានទទួលសេចក្តីរាយការណ៍ពីនគរបាលប៉ុស្តិកែវ ពណ៌ ថា មានករណីមនុស្សលង់ទឹកស្លាប់នៅចំណុចតំបន់ជ្រួយថ្កូល ក្នុងទឹកដីចុងឃ្នៀស សង្កាត់/ក្រុង សៀមរាប ជាប់នឹងព្រំប្រទល់ស្រុកពួក ខេត្តសៀមរាប ទើបបានឱ្យកម្លាំងជំនាញចុះទៅជាមួយលោក ដល់កន្លែងកើតហេតុតែម្តង រួចលើកសាកសពយកមកដាក់លើគោក ដើម្បីរង់ចាំខាងជំនាញចុះមកពីខេត្តធ្វើការពិនិត្យទៅលើដងខ្លួនសាកសព។លោកបន្តថា សពជនរងក្រោះមានឈ្មោះ ព្រេក ហឹស ហៅអា២៤ ភេទប្រុសអាយុ២៤ឆ្នាំ មុខរបរអ្នកនេសាទត្រី មានស្រុកកំណើតនៅភូមិគោក្លាត ឃុំសសរស្តម្ភ ស្រុកពួក ខេត្តសៀមរាប បានស្លាប់លង់ទឹក ដោយសារខ្យល់គរ។លោកបានបញ្ជាក់ថា យោងតាមការសន្និដ្ឋានរបស់ប្រជាពលរដ្ឋនិងលោកមេភូមិ ដែលរស់នៅតំបន់នោះបានប្រាប់សមត្ថកិច្ចថា ជនរងគ្រោះអាចមានជម្ងឺខ្យល់គ នៅចន្លោះ ពីម៉ោង១២និង០០នាទី នៅថ្ងៃទី១៤ខែកុម្ភៈឆ្នាំ២០១៦ម្ល៉េះ។
លោកបានបញ្ជាក់ទៀតថា ក្រោយពីខាងមន្ត្រីជំនាញការិយាល័យបច្ចេកទេសខេត្តមកពីខេត្តចុះមកសហការជាមួយកម្លាំងការិយាល័យនគរបាលព្រហ្មទណ្ឌកំរិតធ្ងន់ខេត្តនិងអធិការនករបាលស្រុកពួក ដើម្បីធ្វើការពិនិត្យទៅលើដងខ្លួនសាកសពតែម្តង។ក្រោយពីធ្វើការពិនិត្យចប់សព្វគ្រប់ហើយ កម្លាំងជំនាញបានសន្និដ្ឋានថា សពជនរងគ្រោះពិតជាបានលង់ទឹកសា្លប់ពិតប្រាកដមែន មិនមែនជាឃាតកម្មគិតទុកជាមុន ឬគំនុំអ្វីនោះទេ។
បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ទៅឱ្យក្រុមគ្រួសារយកទៅធ្វើបុណ្យតាមទំលៀមទំលាប់ ប្រពៃណីរបស់ខ្មែរ៕