បន្ទាយមានជ័យ ៖ រថយន្តហ៊ីណូធុនធំមួយគ្រឿងផ្ទុកទៅដោយកាកសំណល់ពីរោងចក្រឧស្សាហកម្ម ក្នុងតំបន់សេដ្ឋកិច្ចពិសេសក្រុងប៉ោយប៉ែត ដែលបម្រុងនាំទៅកាន់រាជធានីភ្នំពេញ ត្រូវបានគយចល័តក្រសួងប្រចាំខេត្តបន្ទាយមានជ័យ ឃាត់កាលពីព្រឹកថ្ងៃទី១៥ កុម្ភះ ២០១៦ 
លើកំណាត់ផ្លូវជាតិលេខ៥ នៅចំនុចផ្លូវចុះភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
លោក រក្សា សេរី ប្រធានក្រុមការងារគយ និងរដ្ឋករនៃអគ្គនាយកដ្ឋាគយប្រចាំខេត្តបន្ទាយមានជ័យ បានអោយដឹងថា កម្លាំងរបស់លោកបានឃាត់រថយន្តហ៊ីណូ មួយគ្រឿងក្បាលពណ៌ប៉ៃតងសរ ទ្រុងពណ៌ផ្ទៃមេឃ ពាក់ស្លាកលេខក្រុងព្រះសីហនុ 3A 1728 ដែលសង្ស័យថាផ្ទុកកាកសំណល់ យកមកធ្វើការត្រទពិនិត្យ ដោយមានការសហការចូលរួមត្រួតពិនិត្យពីមន្ត្រីនៃមន្ទីរបរិស្ថានខេត្តបន្ទាយមានជ័យ ។ តាមការត្រួតពិនិត្យ និងសាកសួរទៅលើតៃកុង ជាកាកសំណល់ដែលបានយកចេញពីក្រុងហ៊ុនឧស្សាហកម្ម អេសស៊ីវ៉ាដូខឹនផូណិន ដែលមានទីតាំងស្ថិតនៅក្នុងតំបន់សេដ្ឋកិច្ចពិសេស ក្នុងសង្កាត់ផ្សារកណ្តាល ក្នុងប៉ោយប៉ែត ។ 
ជាមួយនិងកាកសំណល់ខាងលើ មន្ត្រីបរិស្ថាន ដែលបានចុះត្រួតពិនិត្យ បានអះអាងថា ជាកាកសំណល់ប្រភេទអាលុយមីញូម ដែលមិនបង្ករគ្រោះថ្នាក់នោះទេ ។
ក្រោយការត្រួតពិនិត្យ ក្រុមគយចល័តរបស់ក្រសួងដឹកនាំដោយលោក រក្សា សេរី បានចុះត្រួតពិនិត្យដល់ទីតាំងក្រុមហ៊ុន ។ ហើយក្នុងការចុះត្រួតពិនិត្យនេះបើតាមការអះអាង របស់លោក ឆាយ ធា ប្រធានរដ្ឋបាលនៃក្រុមហ៊ុនខាងលើ បានអោយដឹងថា កាកសំណល់ទាំងនោះពិតជាចេញបីក្រុមហ៊ុន ដែលមានក្រុមហ៊ុនមួយទៀតជាអ្នករាប់រងទទួលយកកាកសំណលនេះ នាំទៅរាជធានីភ្នំពេញ ។
ចំពោះការឃាត់រថយន្តដឹកកាកសំណល់ខាងលើ បច្ចុប្បន្នរថយន្តនេះកំពុងតែរក្សាទុកនៅទីតាំងគយចល័តខេត្តបន្ទាយមានជ័យ ដើម្បីត្រួតពិនិត្យលើឯកសារ ដើម្បីចាត់ការបន្តទៀត ៕
