ស្ទឹងត្រែង៖កសិករនៅភូមិខ្សាច់ថ្មីឃុំតាឡាតស្រុកសេសានខេត្តស្ទឹងត្រែងបាននាំគ្នាកាន់តែច្រើនឡើងធ្វើការប្រមូលផលអំពិលជាមុខរបរប្រចាំរដូវដោយសាមុខរបរមួយនេះអាចរកប្រាក់ចំណូលបានអាចដោះស្រាយជីវភាពបានមួយគ្រាផងដែរ។កញ្ញាស្រី អូនអាយុ៣២ឆ្នាំជាអ្នក
ប្រកបរបរបកអំពិលលក់នៅភូមិខ្សាច់ថ្មីបានប្រាប់អោយដឹងថានៅថ្ងៃ០៦មករាឆ្នាំ២០១៦ថា៖ប្រជាពលរដ្ឋនៅភូមិនេះក៏ដូចជាភូមិផ្សេងៗទៀតបានប្រមូលផលអំពិលនេះជារៀងរាល់ឆ្នាំ ហើយមុខរបរនេះធ្វើឲ្យគ្រួសារមានជីវភាពធូរធារជាងមុនដោយទទួលបានប្រាក់ចំណូលក្នុងមួយថ្ងៃពី៣០ម៉ឺនទៅ៥០ម៉ឺនរៀល ទៅតាមការបេះ និងបកអំពិលនេះបាន ទៅតាមគ្នាតិចឬច្រើន។
កញ្ញាបានបន្តទៀតថា៖អំពិលជូរបកយកតែសាច់ទៅលក់បានក្នុងមួយគីឡូចាប់ពី១៦០០ទៅ១៩០០រៀលចំណែកអំពិលផ្អែមវិញ លក់ទាំងសំមកមួយគីឡូក្រាមបានតំលៃ១២០០០ទៅ១៥០០០រៀល ដែលនៅរដូវប្រាំងកសិករតែងតែ នាំគ្នាប្រមូលផលអំពិល ជាមុខរបរសាមញ្ញប្រចាំគ្រួសារ អំពិលនេះពួកខ្ញុំរកដូចជាមួយរដូវមួយឆ្នាំ របរហ្នឹងមានម្តងហើយ រកស៊ីនេះវាមិនមែនទៅណាស់ណាទេ គ្រាន់តែជីវភាពរស់នៅធម្មតា ឲ្យរួចម្ហូបមួយពេលៗ អញ្ចឹងណា ហើយជាអំពើសុច្ចរឹត វាមិនទៅឆក់ប្លន់ពីណាទេ។
លោកស្រីសុខ.ជីវនអាជីវករទទួលទិញផលអំពិលបានបញ្ជាក់ថា៖បច្ចុប្បន្នផលិតផលអំពិលនេះក្រៅពីកសិករប្រមូលផលបានយកមកបំពេញតម្រូវការទីផ្សាក្នុងខេត្តទើបយកមកលក់បន្តហើយការប្រមូលទិញនេះគឺបានផ្តល់ទីផ្សាមូយជូនកសិករទៅតំលៃសមស្របដោយទទួលទិញនៅទីនេះក្នុងតំលៃ១៩០០រៀលលក់ចេញទៅវិញបាន២០០០រៀល។
លោកស្រីបញ្ជាក់ថា៖អំពិលដែលប្រមួលទិញបាន ពីកសិករបានចាប់ពី២០ទៅ២៥តោនទើបនាំចេញទៅលក់ម្តងនៅប្រទេសវៀតណាមតាមច្រកដូងក្នុងស្រុកមេមត់ខេត្តកំពុងចាមដែលទីផ្សាអំពិលនេះមានតែមួយកន្លែង។
សូមបញ្ជាក់ថា៖កសិករនៅខេត្តស្ទឹងត្រែងនៅរដូវប្រាំងតែងតែស្វែងរកមុខរបសរូមផ្សំដើម្បីបានប្រាក់សំរាប់ចិញ្ចឹមជីវិតបន្ទាប់ពីការប្រមូលផលស្រូវប្រកបរបរបេះផ្លែអំពិល និងផ្លែដំណើបដែលដុះនៅតាមព្រៃ គ្រាន់តែចំណាយកំលាំង ដោយមិនបាច់ចំណាយដើមទុនឡើយ៕
