ខេត្តសៀមរាប យុវសិស្សចំនួន១៩៣រូបមកពីគ្រឹះស្ថានសិក្សាចំនួន០៥ក្នុងក្រុងសៀមរាប ត្រូវបានធ្វើការបំពាក់កន្សែងយុវជនកាកបាទក្រហមកម្ពុជា កាលពីព្រឹកថ្ងៃទី១៧ ខែកុម្ភះ ឆ្នាំ២០១៦ នៅវិទ្យាល័យអង្គរ ខេត្តសៀមរាប ក្រោម អធិបតីភាពរបស់លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមខេត្ត និង លោកស្រី ទោម ចន្ថា នូ ផល្លា សមាជិកាកិត្តិយសកាកបាទក្រហមកម្ពុជាខេត្ត ដោយមាន ការអញ្ជើញចូលរួមពីសំណាក់អស់លោក លោកស្រី ជាសមាជិក សមាជិការគណៈកម្មាធិការសាខាកាកបាទក្រហមខេត្ត និង លោកគ្រូ អ្នកគ្រូផងដែរ ។
បន្ទាប់ពីកិច្ចស្វាគមន៍ និងសេចក្តីរាយការណ៍របស់លោកនាយកវិទ្យាល័យអង្គរ និងការបំពាក់កន្សែងយុវជន កាកបាទក្រហមកម្ពុជា ជូនដល់យុវសិស្សទាំង១៩៣រូប និង ការឡើងធ្វើចំណាប់ អារម្មណ៍ និង ការប្តេជ្ញាចិត្តរបស់តំណាងយុវជនកាកបាទក្រហមកម្ពុជារួចមក មានប្រសាសន៍សំណេះសំណាលជាមួយក្មួយៗ កូនៗ យុវជនកាកបាទក្រហមកម្ពុជា និង ទីប្រឹក្សាយុវជននាឱកាសនោះក្នុងនាមតំណាងលោកបណ្ឌិត ឃឹម ប៊ុនសុង ប្រធាន គណៈកម្មាធិការ
សាខាកាកបាទក្រហមកម្ពុជាខេត្ត លោកស្រី គួយ ណាលីន ឃឹម ប៊ុនសុងក៏បានបញ្ជាក់អំពីលទ្ធផល និងសកម្មភាពរបស់គណៈកម្មាធិការសាខាកាកបាទក្រហមកម្ពុជាខេត្តក្នុងការចុះសួរសុខទុក្ខនិង ចែកអំណោយដល់ជនរងគ្រោះក្នុងឆ្នាំ២០១៥ ព្រមទាំងលើកឡើងពីប្រវត្តិនៃការបង្កើតកាកបាទក្រហមកម្ពុជា នាថ្ងៃ ទី១៨ កុម្ភះ ឆ្នាំ១៩៥៥ ដោយឈរលើគោលការណ៍ គ្រឹះនៃចលនាអន្តរជាតិ កាកបាទក្រហម អឌ្ឍចន្ទក្រហមដែលផ្តោតជាសំខាន់លើមនុស្សធម៌។ម្យ៉ាងទៀតក៏ជាការជ្រើសរើសបំពេញបន្ថែម យុវជនកាកបាទក្រហមកម្ពុជានៅគ្រប់គ្រឹះស្ថានសិក្សាដែលត្រូវបានបញ្ចប់កាសិក្សានៅតាមវិទ្យាល័យ ហើយការបំពាក់កន្សែងយុវជនកាកបាទក្រហមនាពេល នេះ ក៏ជាការអបអរសាទរឧទ្ទិសដល់ខួបលើកទី៦១ ថ្ងៃកំណើតកាកបាទក្រហមកម្ពុជាផងដែរ។ក្នុងនោះដែរលោកជំទាវក៏បានលើកឡើងនូវបរិបទថ្មី នៃមហាសន្និបាតកាកបាទក្រហមកម្ពុជាដាក់ចេញនូវយុទ្ធសាស្ត្រសំរាប់ឆ្នាំ២០២០ ក្នុងទស្សនៈវិស័យរួមចំណែកពន្លឿនការកាត់បន្ថយភាពក្រីក្រ ការពារសេចក្តីថ្លៃថ្នូរ របស់មនុស្សជាតិ និង ការពារតម្លៃ មនុស្សធម៌របស់ជនរងគ្រោះ និង ដោយផ្តោតការយកចិត្តទុក្ចដាក់លើវិស័យស្នូលទាំង៤ ជាសំខាន់ លើការគ្រប់គ្រងគ្រោះមហន្តរាយសុខភាពនិងថែទាំសុខភាពក្នុងសហគមន៍ ព្រមទាំងលើកកម្ពស់គោលការណ៍គ្រឹះ និង តម្លៃមនុស្សធម៌របស់ចលនា និង អភិវឌ្ឍន៍ស្ថាប័ន អភិវឌ្ឍន៍ធនធាន ។ លោកស្រី គួយ ណាលីន ឃឹម ប៊ុនសុង ក៏បានផ្តាំផ្ញើដល់ក្មួយៗយុវជនកាកបាទក្រហមកម្ពុជាទាំង ១៩៣រូបត្រូវគោរពប្រតិបត្តិពីតួនាទីភារកិច្ចឲ្យខ្ជាប់ខ្ជួនក្នុងសកម្មភាពមនុស្សធម៌និង ធ្វើជាគំរូឈានមុខនៅក្នុងសាលារៀនឧស្សាហ៍ព្យាយាមរៀនសូត្រជាគំរូដល់មិត្តយុវវ័យត្រូវធើ្វការអប់រំ អនាម័យសុខភាពព្រមទាំងចូលរួមក្នុងការងារសង្គមពិសេសលើសុវត្ថិភាពចរាចរនៅក្នុងក្រុង ក្នុងបុព្វហេតុចូលរួមគាំទ្រធនធានមនុស្សនិងសកម្មភាពមនុស្សធម៌របស់យុវជន ដែលអ្នកបន្តវេនការងារយើងទាំងអស់គ្នា។លោកស្រីក៏បានធ្វើការកោតសរសើរផងដែរដល់ក្មួយៗយុវជនកាកបាទក្រហមកម្ពុជាយើង ដែលមានស្មារតីឆន្ទះ ចូលរួមក្នុងសកម្មភាពមនុស្សធម៌ ប្រកប ដោយភាពចាស់ទុំ ក្នុងសកម្មភាពរួមគ្នាអនុវត្តនូវទិសស្លោក ដ៏មានខ្លឹមសារ ឲ្យបានកាន់តែច្រើននិងស៊ីជម្រៅ ព្រមទាំងឲ្យបានកាន់តែឆ្ងាយជាមុន ។
ក្នុងនោះលោកស្រី គួយ ណាលីន ឃឹម ប៊ុនសុង ក៏បាននាំយកនូវថវិកាជាអំណោយដ៏ថ្លៃថ្លារបស់ សម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាចែកជូនដល់ក្មួយៗទាំង១៩៣នាក់ ម្នាក់ៗថវិកា ១ម៉ឺនរៀលផងដែរ ៕
