ខេត្តកំពង់ឆ្នាំង៖ ការប្រកួតកីឡាបាល់ទាត់ជ្រើសរើសជើងឯក ពានរង្វាន់សម្តេច តេជោហ៊ុន សែន លើកទី១០ឆ្នាំ២០១៦ បានចាប់ផ្តើមដំណើរការ នៅរសៀលថ្ងៃទី១៧ ខែកុម្ភះ ឆ្នាំ២០១៦ នៅតាមខេត្តមួយចំនួនក្នុងព្រះជាណាចក្រកម្ពុជា ដោយឡែកនៅខេត្តកំពង់ឆ្នាំង ក៏មានការរៀបចំមួយប្រកួតជាកិច្ចបើកដំណើរការផងដែរ រវាងក្រុមកីឡាករឬទ្ឋិសែនខេត្តកំពង់ឆ្នាំងម្ចាស់ផ្ទះ បានឈ្នះក្រុមកីឡាករមកពីខេត្តបាត់ដំបង ដោយពិន្ទុ ៣ទល់និង២។
គណៈកម្មករៀបចំការប្រកួតបានអោយដឹងថា៖ នៅក្នុងពេលចាប់ផ្តើមប្រកួត នៅវគ្គទី១ប្រកួតដល់នាទី ទី ៤២ ក្រុមកីឡាករឬទ្ឋិសែនម្ចាស់ផ្ទះ រកបានមួយគ្រាប់មុន ដែលទាត់បញ្ជូលទី ដោយកីឡករពាក់អាវលេខ១៣ ឈ្មោះ ស្លេះ សេន ប៉ុន្តែគ្រាប់បាល់មួយនេះ គឺបានជួយបន្ថែមដោយកីឡាករ ពាក់អាវលេខ៨ របស់ខេត្តបាត់ដំបង ឈ្មោះ ពេជ សុវណ្ណារ៉ាដែលព្យាយាមទប់បាល់អោយចេញ តែភ្លាត់ស្នៀតចូលខ្លួនឯង។ ចប់ការប្រកួតវគ្គទី១លទ្ឋលផល ជាបណ្តោះ អាសន្ន ក្រុមម្ចាស់ផ្ទះ ឈ្នះ ខេត្តបាត់ដំបង ១-០ ។
ពេលចូលដល់វគ្គទី២ ការប្រកួតបាន៤នាទីក្នុងវគ្គ ស្មើនឹងនាទី ទី៤៩ ក្រុមកីឡាករខេត្តបាត់ដំបងសងសឹកបាន១គ្រប់វិញ ដែលទាត់បញ្ចូលទីដោយកីឡាករពាក់អាវលេខ៣ ឈ្មោះ ជួន តុលា ។ ដោយការវាយសម្រុកវិញរបស់ក្រុមម្ចាស់ផ្ទះធ្វើអោយនៅនាទីទី ៥៣ ក្រុមម្ចាស់ផ្ទះ រកបានមួយគ្រាប់ទៀត ដោ យទាត់ បញ្ចូលទីដោយ កីឡាករពាក់អាវលេខ១០ ឈ្មោះ ជឹម សុដារិទ្ឋ និងនៅនាទីទី៦២ កីឡាករពាក់អាវលេខ ៨ ឈ្មោះ សុះ សាឯល ជាម្ចាស់ផ្ទះរកបានមួយគ្រាប់ ធ្វើអោយលទ្ឋផល ជាបណ្តោះអាសន្ន នៅនាទី ទី៦២ ម្ចាស់ផ្ទះឈ្នះក្រុមកីឡាខេត្តបាត់ដំបង៣-១ ។
លុះចូលដល់នាទីទី ៦៣ ខណៈ ដែលក្រុមម្ចាស់ផ្ទះកំពុងសប្បាយនឹងជ័យជំនះ គាប់ជួនក្រុមកីឡាខេត្តបាត់ដំបង សម្រុកសងសឹកផង ធ្វើអោយកីឡាករពាក់អាវលេខ៧ ឈ្មោះ អ៊ុំ ពេជ្រពន្លឺ របស់ខេត្តបាត់ដំបង មានឱកាសទាត់ចួលទីខេត្តកំពង់ឆ្នាំង បានគ្រាប់វិញ ។ ការប្រកួតយ៉ាងសិ្វតស្វាញ រហូតចប់ការប្រ កួត ៩០នាទី និងបន្ថែមម៉ោង ៣នាទីទៀត ក៏លទ្ឋផលនៅមិនប្រែប្រួល គឺក្រុមកីឡាករបាត់ទាត់ឬទ្ឋិសែន ខេត្តកំពង់ឆ្នាំង បានឈ្នះក្រុមកីឡាករខេត្តបាត់ដំបង ដោយពិន្ទុ ៣ទល់និង២ ។ គណៈកម្មករៀបចំការប្រកួតបានអោយដឹងថា៖ ការប្រកួតបាល់ទាត់ពានរង្វាន់ សម្តេចតេជោ ហ៊ុន សែន នេះបានធ្វើឡើង តាមបណ្តាខេត្តក្រុងមួយចំនួន ដោយទាត់ជម្រុះតាមពូល និងយកអ្នកជាប់លេខ១ដល់លេខ៣ក្នុងពូល ទៅប្រកួតវគ្គពាក់កណ្តាលផ្តាច់ព្រ័ត្តនៅរាជធានីភ្នំពេញ ដើម្បីប្រកួតផ្តាច់ព្រ័ត យកលេខ១-២-៣ ទទួលយកពានរង្វាន់សម្តេចតេជោ ហ៊ុន សែនតែម្តង ៕
