ខេត្តកំពង់ឆ្នាំង៖ ប្រជាពលរដ្ឋក្រីក្រចំនួន២៦គ្រួសារ ដែលមាន១៣គ្រួសារនៅក្នុងស្រុកទឹកផុស និង១៣គ្រួសារទៀតនៅក្នុងស្រុកបរិបូណ៌ នៅព្រឹកថ្ងៃទី២២ ខែកុម្ភៈ ឆ្នាំ២០១៦ បានទទួលអំណោយមនុស្សធម៌របស់កាកបាទក្រហមកម្ពុជាពីលោកជំទាវ ម៉ែន នារីសោភ័គ អគ្គលេខាធិការរងកាកបាទក្រហមកម្ពុជា លោក អ៊ុន្ សំអុល ប្រធានគណៈកម្មការធិការសាខាកាកបាទក្រហមខេត្ត និងក្រុមការងារ ក្នុងពេលនោះដែរពលរដ្ឋក្រីក្រ១គ្រួសារត្រូវបានជួយដោះបំណុលដែលជំពាក់ធនាគារ និងមួយគ្រួសារទៀតជួយបង្កើតមុខរបរដើម្បីចិញ្ចឹមជីវិតក្រោយពីភ្លើងឆេះផ្ទះអស់។
លោក អ៊ុន សំអុល ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ឆ្នាំងបានអោយដឹងថា៖ ដោយមានការយកចិត្តទុកដាក់ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា លោកយាយ មួង តៃ អាយុ៧៥ឆ្នាំ រស់នៅក្នុងភូមិក្រាំងស្គារ ឃុំក្រាំងស្គារ ស្រុកទឹកផុស ដែលបានចិញ្ចឹមចៅប្រុសស្រីតូចៗកំព្រាចំនួន៤នាក់ ក្នុងនោះ៣នាក់ត្រូវបានយកមកចិញ្ចឹមរៀនសូត្រក្នុងមណ្ឌលកុមារកំព្រាខេត្តរួចហើយ និងម្នាក់ទៀតបានរស់នៅជួយថែទាំងជីដូន ដែលក្នុងថ្ងៃនេះក្រុមការងារកាកបាទក្រហមកម្ពុជា ជួយដោះស្រាយសងបំណុលគ្រឹះស្ថានហិរញ្ញវត្ថុAMK ដែលម្តាយកុមារកំព្រាទាំង៤នាក់បានខ្ចីយកមកធ្វើផ្ទះក្រោយពីភ្លើងឆេះផ្ទះអស់ និងព្យាបាលជម្ងឺលោកយាយកន្លងមក។
ដោយឡែកយុវតីឈ្មោះ ប៉ិច ស្រីនៅ អតីតៈសិស្សថ្នាក់ទី១២នៃវិទ្យាល័យ ហ៊ុនសែនបរិបូណ៌ មានទីលំនៅក្នុងភូមិស្នោរ ឃុំខុនរ៉ង ស្រុកបរិបូណ៌ រស់នៅជាមួយជីដូនក្រីក្រ ដែលកន្លងមកត្រូវភ្លើងឆេះផ្ទះអស់ ហើយនាងមិនបានទៅប្រឡងយកសញ្ញាប័ត្រទុត្តិយភូមិឆ្នាំ២០១៤-២០១៥ដោយសារតែភាពក្រីក្រ ដុនដាបនិងក៏មិនបានរៀនបន្តទៀតដែរ ត្រូវបានក្រុមការងារកាកបាទក្រហមកម្ពុជាជួយឧបត្ថមកង់១គ្រឿង និងថវិការមួយចំនួនបន្ថែមទៀត ដើម្បីជួយបង្កើតមុខរបរចិញ្ចឹមមាន់នៅក្នុងលំនៅដ្ឋាន ព្រោះនាងធ្លាប់ទទួលការបណ្តោះបណ្តាលអំពីបច្ចេកទេសចិញ្ចឹមមាន់ពីមុនមក។
លោក អ៊ុន សំអុល បានបញ្ជាក់ទៀតថា៖ ក្រៅពីគ្រួសារក្រីក្រទាំង២ ប្រជាពលរដ្ឋក្រីក្រចំនួន២៤គ្រួសារទៀតនៅក្នុងស្រុកទាំង២ បានទទួលអំណោយមនុស្សធម៌ដូចគ្នា ដែលនៅក្នុង១គ្រួសារៗទទួល អង្ករ៣០គីឡូ, មី១កេះ, ត្រីខ១០កំប៉ុង, មុង១ សារុង១ ក្រមា១ ភួយ១ និងថវិការ៥ម៉ឺនរៀល។
លោកជំទាវ ម៉ែន នារីសោភ័គ អគ្គលេខាធិការរងកាកបាទក្រហមកម្ពុជាបានពាំនាំប្រសាសន៍ផ្តាំផ្ញើរសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលជានិច្ចជាកាលសម្តេចតែងតែនឹករលឹក និងយកចិត្តទុកដាក់គិតគូជានិច្ចដល់ប្រជាពលរដ្ឋក្រីក្រទាំងអស់គ្រប់នៅមូលដ្ឋាន និងបានផ្តល់អំណោយសង្គ្រោះដូចៗគ្នាដោយមិនមានការរើសអើង ឬប្រកាន់និន្នាការនយោបាយអ្វីឡើយ។ ទន្ទឹមនេះដែរលោកជំទាវក៍បានផ្តាំផ្ញើរដល់ប្រជាពលរដ្ឋទាំងអស់ សូមប្រឹងប្រែងតស៊ូក្នុងការប្រកបមុខរបរធ្វើស្រែចំការចិញ្ចឹមជីវិត និងត្រូយកចិត្តទុកដាក់ថែទាំសុខភាពកូនចៅក្នុងគ្រួសារអោយបានល្អ ដើម្បីកុំអោយខាតបង់ថវិការនៅក្នុងគ្រួសារ ហើយក៏បានផ្តាំង្ញើដល់អនុសាខាកាកបាទក្រហមស្រុកទាំង២ផងដែរ ត្រូវរាយការណ៍ទៅថ្នាក់លើជាបន្ទាន់នៅពេលប្រជាពលរដ្ឋក្នុងមូលដ្ឋានរងគ្រោះដោយគ្រោះថ្នាក់ផ្សេងៗ ដើម្បីក្រុមករងារចុះមកជួយពួកគាត់ទាន់ពេលវេលា៕
