ខេត្តសៀមរាប ក្នុងដំណើរចុះបំពេញបេសកកម្មពិគ្រោះពិនិត្យព្យាបាលជូនប្រជាពលរដ្ឋដោយឥតគិតថ្លៃ របស់ក្រុមគ្រូពេទ្យចល័តក្រសួងការពារជាតិ ចាប់ពីថ្ងៃទី២១ និង ២២ ខែកុម្ភះឆ្នាំ២០១៦ ដែលដឹងនាំដោយ លោកជំទាវឧត្តមសេនីយ៍ឯក តុប សារ៉ន អគ្គនាយករង អគ្គនាយកដ្ឋានភស្តុភា ហិរញ្ញវត្ថុ នៃក្រសួងការពារជាតិ រួមដំណើរដោយឯកឧត្តមអស់លោកលោកស្រីជាក្រុមការងារថ្នាក់កណ្តាលចុះជួយស្រុកនិង ក្រុមការងារថ្នាក់ខេត្តចុះជួយស្រុក ក្រុមប្រឹក្សាស្រុក អាជ្ញាធរស្រុក ឃុំ លោកគ្រូ អ្នកគ្រូចូលរួមផង ដែរ ។ ក្នុងការចុះពិនិត្យ និងព្យាបាលជម្ងឺជូនប្រជាពលរដ្ឋ ដែលបានប្រព្រឹត្តទៅពីរកន្លែងផ្សេងគ្នា ក្នុងនោះនាថ្ងៃទី២១កុម្ភះ នៅអនុវិទ្យាល័យ ខ្នាសណ្តាយ ដោយមានប្រជាពលរដ្ឋមកពីឃុំព្រះដាក់ ,ឃុនរាម និង ឃុំខ្នាសណ្តាយ និងនៅថ្ងៃទី២២ កុម្ភះនេះ នៅសាលាបឋមសិក្សាធ្លក ដែលមានប្រជាពលរដ្ឋមកពី ឃុំត្បែង , រំចេក និង រុនតាឯក របស់ស្រុកបន្ទាយស្រី ខេត្តសៀមរាប ។
តាមការបញ្ជាក់របស់លោកស្រី ឧត្តមសេនីយ៍ឯក តុប សារ៉ន បានឲ្យដឹងថា ក្នុងរយៈពេលពីរ ថ្ងៃនេះ លោកស្រីបានដឹកនាំក្រុមគ្រូពេទ្យចល័តក្រសួងការពារជាតិចំនួន២៥រូបចុះមកធ្វើការពិនិត្យ ព្យាបាលជូនប្រជាពលរដ្ឋដោយឥតគិតថ្លៃ។ក្នុងនោះមានវេជ្ជបណ្ឌិតគិលានុដ្ឋាននិងឱសថការី ដោយបានធ្វើការពិនិត្យនូវជម្ងឺទូទៅ ជម្ងឺភ្នែក ច្រមុះ បំពុងករ និងការវោះកាត់តូច បានចំនួនសរុប ៧២១នាក់ ក្នុងនោះក្រុមគ្រូពេទ្យ បានជួបនូវជម្ងឺផ្លូវដង្ហើមជាច្រើន ក្នុងចំនួនដែលប្រជាពលរដ្ឋ ចូលមកពិនិត្យ និងព្យាបាល ។ តាមការបញ្ជាក់របស់ក្រុមវេជ្ជបណ្ឌិតបានឲ្យដឹងថាបញ្ហាជម្ងឺផ្លូវដង្ហើមនេះគឺបណ្តាមកពីបង ប្អូនបរិភោគទឹកមិនបានត្រឹមត្រូវម្យ៉ាងទៀតក្នុងខ្លួនរបស់អ្នកជម្ងឺគឺកង្វះខាតជាតិទឹកដោយពួកគាត់ បរិភោគទឹកមិនបានគ្រប់គ្រាន់ ។
មានប្រសាសន៍សំណេះសំណាលនោះលោកស្រីឧត្តមសេនីយ៍ឯកតុបសារ៉ន បានបញ្ជាក់ថាការធ្វើអនាម័យគឺជាកត្តាចំបងដែលមនុស្សយើងគ្រប់រូប ដែលត្រូវយកចិត្តទុកដាក់ខ្ពស់ឲ្យបានជាប្រចាំថ្ងៃ ដូច្នេះសុខភាពគឺជាកត្តាដ៏សំខាន់បំផុត សម្រាប់មនុស្សជាតិគ្រប់រូប ក្នុងការអនុវត្តន៍របៀបរស់នៅប្រកបដោយសុខមាភាពរបស់យើងគ្រប់រូប ។ ដោយកត្តានេះហើយទើបប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី និង ឯកឧត្តមឧបនាយករដ្ឋមន្ត្រីទៀបាញ់រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាបបានធ្វើការជម្រុញឲ្យសុខាភិបាលក្រសួងការពារជាតិ ធ្វើកិច្ចសហការជាមួយអាជ្ញាធរមូលដ្ឋានដើម្បីចុះមកធ្វើការព្យាបាលជូនប្រជាពលរដ្ឋ នៅតាមមូលដ្ឋានដោយឥតគិតថ្លៃ ក្នុងការកាត់បន្ថយភាពក្រីក្ររបស់ប្រជាពលរដ្ឋក្នុងនោះលោកជំទាវក៏បានធ្វើការណែនាំ ដល់បងប្អូនប្រជាពលរដ្ឋដែលបានមកទទួលសេវាព្យាបាលជម្ងឺនាឱកាសនោះសូមឲ្យបរិភោគទឹកស្អាត ដោយដាំទឹកពុះហើយបរិភោគទឹកឲ្យបានច្រើនក្នុងការជួយថាមពលដល់សរីរាង្គកាយយើងបានគ្រប់គ្រាន់ ព្រមទាំងធ្វើលំហាត់ប្រាណឲ្យបានជាប្រចាំដែលជាកត្តាដ៏ល្អសម្រាប់មនុស្សយើងគ្រប់រូបនិងត្រូវធ្វើអនាម័យ បរិស្ថានក្នុងភូមិដ្ឋានឲ្យស្អាតនិងលុបបំបាត់ជម្រកសត្វមូសជាដើម។លោកជំទាវក៏បានបន្តទៀតថា នៅពេលដែលបងប្អូនបានទទួលថ្នាំឱសថពីគ្រូពេទ្យទៅ ត្រូវតែអនុវត្តទៅតាមការណែនាំរបស់គ្រូពេទ្យឲ្យបានត្រឹមត្រូវពីព្រោះថា
ឱសថគឺជាអាវុធមុខពីរ ដែលជួយព្យាបាលផងនិងអាចសម្លាប់យើងបានបើប្រើប្រាស់វាមិនបានត្រឹមត្រូវ លោកជំទាវក៏បានបន្តទៀតថាស្រុកបន្ទាយស្រីជាតំបន់រមណីយដ្ឋានវប្បធម៌និងធម្មជាតិ បានកំពុងទាក់ទាញភ្ញៀវទេសចរណ៍ជាតិអន្តរជាតិចូលមកទស្សនាកម្សាន្ត។ដូច្នេះយើងជាប្រជាពលរដ្ឋខ្មែរ ត្រូវតែមានអនាម័យ សុខភាពមាំមួន ក្នុងការបញ្ចេញនូវស្នាមញញឹមដ៏ស្រស់ស្រទន់ទទួលស្វាគមន៍ភ្ញៀវទេសចរណ៍ ក្នុងលក្ខណៈមានសុខភាពល្អមាំមួនទៀតផង។លោកជំទាវក៏បានបន្តទៀតថា ដើម្បីផ្តល់សេវាសុខភាពជូនប្រជាពលរដ្ឋ គឺ ដើម្បីធ្វើឲ្យសុខមាលភាពយើង មានសុខភាពល្អ សម្រាប់ប្រកបកិច្ចការងារ រៀនសូត្រ ធ្វើស្រែ ចំការជាដើម។ ម្យ៉ាងទៀតការពិនិត្យព្យាបាលជម្ងឺជូនបងប្អូននាពេលនេះក្រុមគ្រូពេទ្យយើងមិនរើសអើងឬ ប្រកាន់ន្និនាការណ៍នយោបាយណាឡើយគឺធ្វើការព្យាបាលដោយឥតគិតថ្លៃជូនប្រជាពលរដ្ឋទាំងអស់គ្នា គឺខ្មែរតែមួយ៕ដោយគឿនវេត
