ដាកា៖ ក្រុមសង្គ្រោះរបស់ប្រទេសបង់ក្លាដែសបានស្រង់យកសាកសពចំនួន ១០នាក់ បន្ថែមទៀត ដែលជាហេតុនាំឲ្យចំនួនមនុស្សស្លាប់ដោយសារការលិចសាឡង់ដឹកអ្នកដំណើរ នៅទន្លេ Meghna កាលពីល្ងាច ថ្ងៃព្រហស្បតិ៍ ទី១៥ ខែឧសភា នោះ កើនឡើងរហូតដល់ ២២នាក់ហើយ ស្របពេលដែលមនុស្សជាច្រើនអ្នកទៀតកំពុងបាត់ខ្លួន។
នេះបើតាមវេបសាយចិនផ្សាយនៅថ្ងៃសុក្រនេះ។ ប្រភពពីមន្ត្រីប៉ូលិសបង់ក្លាដែស បានឲ្យដឹងនៅព្រឹកថ្ងៃសុក្រនេះថា ក្រុមអ្នកមុជទឹកមកពី ភ្នាក់ងារសង្គ្រោះ និងយោធាជើងទឹកបាននិងកំពុងរុករកសាកសពដែលជាប់នៅ ក្នុងសាឡង់លិច ស្របពេលនាវាសង្គ្រោះ កំពុងព្យាយាមទាញវាយកទៅជិតច្រាំងទន្លេ ម៉េកណា Meghna ផងដែរ។
គួរបញ្ជាក់ថា សាឡង់ឈ្មោះ មីរ៉េក ៤ ( Mirage-4) បានដឹកអ្នកដំណើរជាង ២០០នាក់ពីរដ្ឋធានីដាកាឆ្ពោះទៅកាន់ស្រុក Shariatpur ហើយវាបានលិចបន្ទាប់ពីទទួលរងព្យុះភ្លៀង យ៉ាងខ្លាំងកាលពីថ្ងៃព្រហស្បតិ៍។ នោះបើតាមសម្តីរបស់លោក ណឺរួល អ៊ីស្លាម ឌូឡាល( Nurul Islam Dulal )ប្រធានការិយាល័យសង្គ្រោះបានប្រាប់ស៊ីនហួ តាមទូរស័ព្ទ។ ដោយឡែក បើតាម
របាយការណ៍ពីអាជ្ញាធរដឹកជញ្ជូនតាមផ្លូវទឹក (Inland Water Transport Authority officials ) បានឲ្យដឹងថា មនុស្សយ៉ាងហោចណាស់ ១.០០០នាក់ បានស្លាប់ និងបាត់ខ្លួនច្រើនជាងនេះទៅទៀត ដោយសារតែគ្រោះថ្នាក់លិចសាឡង់ នៅទូទាំងប្រទេសបង់ក្លាដែស ជារៀងរាល់ឆ្នាំ (1,000 people die in ferry accidents in the country on average every year )៕
