កោះកុង: សកម្មភាពនាំទំនិញដែលច្បាប់ហាមឃាត់ដាច់ខាត ការនាំចូលនោះរួមមានប្រហិតសាច់មាន់ ស្លាប មាន់ និង ជង្គង់មាន់ ដែលសព្វថ្ងៃត្រូវបានគេរាយការណ៏ថា ក្រុមឈ្មួញនៅតែបន្តនាំចូលមកក្នុង១ថ្ងៃៗ រាប់ រយតោនតាមទូក (ផ្លូវទឹក) ដោយចេញពីកំពង់ផែខ្លងស្រុន ខេត្តត្រាត ប្រទេសថៃ ឆ្ពោះមកកម្ពុជាដើម្បីផ្ទេរដាក់ ឡាននៅចំណុចព្រែកអង្គញ់ និង ត្រពាំងរូងយ៉ាងរលូន រួចដឹកតាមឡានដើម្បី ចែកចាយបន្តទៅតាមបណ្តាខេត្ត មួយចំនួន ជាពិសេសរាជធានីភ្នំពេញ ដោយឈ្មួញទាំងនោះមិនបានខ្វល់ពីផលប៉ះពាល់ដល់សុខភាព ប្រជាពល រដ្ឋឡើយ ។សេចក្តីរាយការណ៏បន្តថា ទំនិញប្រភេទប្រហិត ស្លាបមាន់ ជង្គង់មាន់ ខូចគុណភាពទាំងនេះអាច នាំចូលមកបានទាំងតាមផ្លូវគោក ផ្លូវទឹក យ៉ាងរលូនបែបនេះ គឺមានការឃុបឃិត និង បើកភ្លើងខៀវពីសមត្ថកិច្ច ពាក់ព័ន្ធគ្រប់លំដាប់ថ្នាក់ ដោយពួកគេចាំតែយកលុយខែដាក់ហោប៉ៅធ្វើមានបានរៀងៗខ្លួន ដោយមិនខ្វល់ពី ផល ប៉ះពាល់ដល់សុខភាពប្រជាពលរដ្ឋ និងមានវិធានការបង្ក្រាបម្តងណាឡើយ ។
តាមការបង្ហើប ពីក្រុមអ្នករកស៊ីបាន អោយដឹងថា ប្រហិត ជង្គង់មាន់ ស្លាបមាន់ ខូចគុណភាពទាំងនោះនាំចូលពីប្រទេសថៃមកខ្មែរ ក្នុង១ថ្ងៃៗ រាប់រយតោននោះ ត្រូវបានប្រភពទំលាយអោយដឹងថា មេឈ្មួញធំបំផុតនោះមានឈ្មោះ ម៉េង ជាយោធាថ្នាក់ ឧត្តមសេនីយ៏ សព្វថ្ងៃនៅភ្នំពេញ ។ ជាក់ស្តែង នៅរសៀលថ្ងៃទី១៣ ខែឧសភា ឆ្នាំ២០១៤ នេះ គេសង្កេតឃើញ មានទូកដឹកប្រហិតរបស់ឈ្មួញ ឈ្មោះ ម៉េង នេះ១គ្រឿងទម្ងន់ប្រមាណជិត ២០តោន ដឹកតាមទូក ផ្លូវទឹកឆ្លង តាមច្រកប៉ាក់ខ្លង និង កោះកាពិ ទៅផ្ទេរដាក់ឡាននៅចំណុចព្រែកអង្គុញយ៉ាងត្រជាក់ចិត្ត គ្មានសមត្ថកិច្ច ណា អើពើ សួរនាំឡើយ ដោយសមត្ថកច្ចទាំងនេះត្រូវបាន គេសង្ស័យថាឧត្តមសេនីយ៏សម្តីផ្អែមដែល ជាមេឈ្មួញ ដ៏មហិមានេះ បានដាក់ថ្នាំសណ្តំទាំងអស់។
ប្រធានកាំកុងត្រូលច្រក ចាំយាម មិនបានធ្វើអធិប្បាយទេ ដោយ និយាយយ៉ាងខ្លីថា ច្រកផ្លូវទឹក ជាដែនសមត្ថកិច្ចរបស់សាខាកាំកុងត្រូលខេត្ត ខាងលោកគ្មានសិទ្ធ ដោយឡែក ប្រធានសាខាកាំកុងត្រូលខេត្តមិនអាចទំនាក់បានទេ នៅល្ងាច ថ្ងៃទី១៣ ខែឧសភា ឆ្នាំ២០១៤ ដោយទូរស័ព្ទ មិនអាចទេចូលបានទេ ចំណែកឯប្រធានបសុសត្វ ឬការិយាល័យផលិតកម្ម និង បសុព្យាបាល (ពេទ្យសត្វ) ខេត្ត កោះកុង ក៏មិនអាចទំនាក់ទំនងសុំការពន្យល់បានដែរ ។
គួរបញ្ចាក់ផងដែរថា ផលិតផលប្រហិត សាច់មាន់ ខូច គុណភាព បែបនេះត្រូវបានគេដាក់លក់គ្រប់ទីកន្លែងនៅក្នុងព្រះរាជាណាចក្រកម្ពុជា ដោយឡែក ច្រកចាំយាម និង ច្រកផ្លូវទឹកប៉ាក់ខ្លង សព្វថ្ងៃគេនៅតែសង្កេតឃើញមានទំនិញគេចពន្ធ និង ផលិតផលខូចគុណភាពជាច្រើនមុខ ផ្សេងៗទៀតនាំចូលពីប្រទេសថៃចូលមកប្រទេសកម្ពុជាយ៉ាងច្រើនសន្ធឹកសន្ធាប់ ដោយគ្មានសមត្ថកិច្ចណាអើពើ រឿងនេះទេ ទំនិញទាំងនោះរួមមាន ទឹកដោះគោជូរ ភេសជ្ជះកំប៉ុង និង ជាពិសេសម៉ូតូអត់ពន្ធរាប់សិបគ្រឿង ក្នុង ១ថ្ងៃៗ ហូរចូលតាមច្រកព្រំដែនថៃមកកម្ពុជា។ល។
មជ្ឈដ្ឋានសង្គម សំណូមពរដល់រដ្ឋាភិបាល ឬ អង្គភាពប្រឆាំងអំពើពុករលួយ មេត្តាពិនិត្យឡើងវិញផង ដើម្បីអភិវឌ្ឍន៏ប្រទេសជាតិ និងកុំអោយឈ្មួញទុច្ចរិតនៅតែបន្តសកម្មភាពទាំងនេះតទៅទៀត៕
