កំពង់ឆ្នាំង៖ រយៈពេលជិត១ខែកន្លងមកនេះ ប្រជាពលរដ្ឋរាប់ពាន់នាក់នៅក្នុងក្រុងកំពង់ឆ្នាំងបានសំរុកមកធ្វើអត្តសញ្ញាណប័ណ្ណសញ្ជាតិខ្មែរជារៀងរាល់ថ្ងៃ និងបានសំដែងនូវការពេញចិត្ត ព្រោះការធ្វើអត្តសញ្ញាណប័ណ្ណនេះមិនតំរូវអោយពួកគាត់បង់ប្រាក់ឡើយ ដែលនេះជាគោលនយោបាយដ៍ត្រឹមត្រូវរបស់ប្រមុខរាជរដ្ឋាភិបាលអណត្តិទី៥ ដឹកនាំដោយសម្តេចតេជោ ហ៊ុន សែន។
លោក សំ សិទ្ធី អធិការក្រុងកំពង់ឆ្នាំងបានអោយអ្នកយកព័ត៌មានយើងដឹងនៅព្រឹកថ្ងៃទី២៩ ខែឧសភា ឆ្នាំ២០១៤នេះថា៖ចាប់ពីខែមករាឆ្នាំ២០១៤មក ថ្នាក់លើបានតំរូវ អោយមន្ត្រីនគរបាលអត្តសញ្ញាណប័ណ្ណគ្រប់ស្រុកក្រុង ធ្វើអត្តសញ្ញាណប័ណ្ណសញ្ជាតិខ្មែរគំរូ៣ជូនប្រជាពលរដ្ឋអោយបានគ្រប់ៗគ្នានៅក្នុងមូលដ្ឋាន ក្នុងនោះអ្នកគ្រប់អាយុ អ្នកបានបាត់អត្តសញ្ញាណប័ណ្ណ និងអ្នកមានអត្តសញ្ញាណប័ណ្ណហួសសុពលភាពត្រូវធ្វើឡើងវិញទាំងអស់គ្នា។
លោកអធិការបានអោយដឹងទៀតថា៖ នៅក្នុងអធិការក្រុងកំពង់ឆ្នាំងមានម៉ាស៊ីនសំរាប់ធ្វើអត្តសញ្ញាណចំនួន២គ្រឿង និងមានមន្ត្រីជំនាញធ្វើអត្តសញ្ញាណប័ណ្ណចំនួន៤រូប។ បើយើងប្រើម៉ាស៊ីន១ក្នុងថ្ងៃធ្វើឯកសារអត្តសញ្ញាណប័ណ្ណបាន៥០នាក់ ប៉ុន្តែបើយើងប្រើប្រាស់ម៉ាស៊ីន២គ្រឿងគឺអាចធ្វើបានដល់១០០នាក់ក្នុង១ថ្ងៃ។មកដល់ថ្ងៃទី២៩ ខែឧសភានេះ លទ្ធផលនៃការធ្វើអត្តសញ្ញាណប័ណ្ណសរុបធ្វើបាន៧១៣៤នាក់ ប្រុស៣៦៨៧នាក់ បានផ្តល់អោយថ្មី៤៦០១នាក់ ធ្វើឡើងវិញទាំងបាត់ទាំងហួសសុពលភាពបានចំនួន២៥៣០នាក់ ហើយការធ្វើអត្តសញ្ញាណប័ណ្ណនេះគឺត្រូវធ្វើទាល់តែអស់ ដោយមិនកំណត់ពីសុពលភាពឡើយ។
អ្នកស្រី សួង សួគ៌ា មន្ត្រីនគរបាលអត្តសញ្ញាណប័ណ្ណក្រុងកំពង់ឆ្នាំងបានអោយដឹងថា៖ផលលំបាកក្នុងការធ្វើអត្តសញ្ញាណប័ណ្ណមានខ្លះៗដូចជា ប្រជាពលរដ្ឋនាំគ្នាមកធ្វើច្រើនពេក ខ្លះគ្មានឯកសារគ្រប់គ្រាន់ពេលមកធ្វើដែលតំរូវអោយគាត់ឡើងចុះទៅមកច្រើន ដង អ្នកខ្លះមានឈ្មោះមិនដូចគ្នាទាំងក្នុងសៀវភៅគ្រួសារ អត្តសញ្ញាណប័ណ្ណចាស់ និង
សំបុត្រកំណើត ជាគោលការណ៍គឺគេយកសំបុត្រកំណើតជាគោលក្នុងការធ្វើអត្តសញ្ញាណប័ណ្ណ អ្នកខ្លះផ្លាស់ប្តូរទីលំនៅទៅខេត្តឆ្ងាយក៍ត្រូវមកធ្វើអត្តសញ្ញាណប័ណ្ណតាមសៀវភៅគ្រួសារនៅលំនៅដ្ឋានដើម មិនបានធ្វើឯកសារផ្លាស់ប្តូរទីលំនៅ ជាពិសេស ប្រជាពលរដ្ឋមយយចំនួនបានយកឯកសារទៅបំពេញខ្លួនខុស ៤ទៅ៥ថ្ងៃទើបយកមកវិញ ហើយពេលមានខាងវិទ្យុសម្ភាសន៍គាត់ឆ្លើយថា គាត់មកធ្វើ៤ទៅ៥ថ្ងៃឡើងចុះៗទើបគេធ្វើអោយ បញ្ហានេះវាមិនមែនជាការពិតដូចវិទ្យុថានោះទេ
ប្រសិនបើពួកគាត់មានឯកសារត្រឹមត្រូវ យ៉ាងយូរធ្វើត្រឹម១០នាទីតែប៉ុណ្ណោះ។ ដោយឡែកប្រជាពលរដ្ឋមកធ្វើអត្តសញ្ញាណប័ណ្ណនៅក្នុងអធិការដ្ឋានក្រុងកំពង់ឆ្នាំងបានអោយអ្នកយកព័ត៌មានយើងដឹងថា៖ពួកគាត់មកធ្វើអត្តសញ្ញាណប័ណ្ណសញ្ជាតិខ្មែរពេលនេះ គឺពួកគាត់សេចក្តីរីករាយណាស់ដោយប្រមុខរាជរដ្ឋាភិបាលមិនតំរូវអោយប្រជាពលរដ្ឋបង់ប្រាក់ឡើយ ចំណែកខាងមន្ត្រីអត្តសញ្ញាណប័ណ្ណក៍មិនទាមទារឬកោសរូសប្រាក់ពីប្រជាពលរដ្ឋដែរ ហើយកាលណាយើងមានឯកសារគ្រប់គ្រាន់គឺខាងមន្ត្រីអត្តសញ្ញាណប័ណ្ណនឹងធ្វើជូនភ្លាមៗ មិនដូចគេនិយាយនោះទេ។
អត្តសញ្ញាណប័ណ្ណសញ្ជាតិខ្មែរមានសារៈប្រយោជន៍សំខាន់ណាស់ចំពោះប្រជាពលរដ្ឋខ្មែរគ្រប់រូប ប្រើប្រាស់ដូចជា៖បញ្ជាក់អត្តសញ្ញាណទិញដូរ ចូលធ្វើការ កំចីប្រាក់ធនាគារ ពេលមានគ្រោះថ្នាក់ ធ្វើលិខិតឆ្លងដែន។ល។៕