ខេត្តប៉ៃលិន៖ ស្របពេលដែលប្រទេសថៃធ្វើរដ្ឋប្រហារយោធាកាលពីថ្ងៃទី២២ ខែឧសភា ២០១៤ កន្លងទៅ ច្រកទ្វារអន្តជាតិនិងច្រករបៀង មួយចំនួននៅតាមបន្ទាត់ព្រំដែនកម្ពុជា-ថៃ ត្រួវបានបិទ ប៉ុន្តែច្រកទ្វារអន្តរជាតិព្រំ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន រហូតមកដល់ថ្ងៃទី២៨ ឧសភា ២០១៤ នេះ គ្មានអ្វីប្រែប្រួលខុសពីធម្មតានោះទេ ។
ប្រភពពីប្រជាពលរដ្ឋដែលចេញ-ចូលទឹកដីថៃ ដើម្បីទិញបន្លែ ត្រី សាច់ យកមកលក់នៅទឹកដីខ្មែរមួយចំនួនបានរៀបរាប់ថា កន្លងមកពួកគាត់ចូលទៅក្នុងទឹកដីថៃតាមច្រកទ្វារអន្តរជាតិនៅវេលាម៉ោង៦ព្រឹក តាមធម្មតាជារៀងរាល់ថ្ងៃ ដោយអត់ឃើញមានអ្វីគួរឱ្យកត់សម្គាល់នោះទេ ។
ប្រភពបន្តថា៖ ប៉ុន្តែចាប់តាំងពីប្រទេសថៃធ្វើរដ្ឋប្រហារយោធាមក នៅខាងភាគីថៃ មានការរឹតបន្តឹងបន្តិច ដោយឃើញមានទាហានស្លៀកពាក់ឈុតខ្មៅ និងឈុតប៉ារ៉ា មានការយាមកាមនៅព្រំដែនទឹកដីថៃច្រើនជាងមុន ថែមទាំងផ្លាស់ប្តូរគ្នាទៅមកជាញឹកញាប់ ព្រមទាំងឈរយាមល្បាតតាមក្បែរច្រកទ្វារព្រំដែនផងដែរ ។
ទាក់ទិនបញ្ហានេះដែរលោក សុខ សាវុធ ប្រធានច្រកទ្វារអន្តរជាតិព្រំខេត្តប៉ៃលិន បានប្រាប់ភ្នាក់ងារសារព័ត៌មានកម្ពុជាថ្មី តាមទូរស័ព្ទនៅព្រឹកថ្ងៃទី២៨ នេះថា៖ ក្រោមការដឹកនាំរបស់ឯកឧត្តម អ៊ី ឈាន អភិបាលនៃគណៈអភិបាលខេត្តប៉ៃលិន និងបទបញ្ជារ០១ របស់រាជរដ្ឋាភិបាល ព្រមទាំងមានទំនាក់ទំនងល្អជាមួយភាគីថៃផងនោះ ច្រកទ្វារអន្តរជាតិព្រំខេត្តប៉ៃលិន បានបើកដំណើរការជាធម្មតា ។
លោកបន្តទៀតថា៖ ទោះបីជានៅក្នុងប្រទេសថៃមានបញ្ហាវឹកវរផ្នែកនយោបាយយ៉ាងណាក៏ដោយ ក៏ច្រកទ្វារអន្តរជាតិព្រំ មិនមានអ្វីគួរឲ្យគាត់សម្គាល់នោះទេ គឺប្រជាពលរដ្ឋនៅតាមបន្ទាត់ព្រំដែនកម្ពុជា-ថៃ ក្នុងខេត្តប៉ៃលិនចេញ-ចូលប្រកបរបររកស៊ីជាធម្មតា ៕