សៀមរាប៖លោកឃឹមប៊ុនសុងបានលើកឡើងថា បញ្ហាបង្គន់អនាម័យសាធារណៈ គឺមានសារៈ សម្ខាន់បំផុត នៅក្នុងទីប្រជុំជន ពិសេសការបម្រើនូវតម្រូវការរបស់ភ្ញៀវទេសចរណ៍ជាតិ អន្តរជាតិ និង ប្រជាពលរដ្ឋដែល បានចូលមកទស្សនាកម្សាន្តនៅលើកទឹកដីប្រវត្តិសាស្ត្រសៀមរាប ហើយអាជ្ញាធរបានយកចិត្តទុកដាក់ខ្ពស់ រហូតមាន ចូលរួមពីសហភាពសហព័ន្ធយុវជនកម្ពុជាខេត្ត បានរៀបចំនូវកម្មវិធី សៀមរាបផ្ទះខ្ញុំ ហើយត្រូវបានគ្រប់ស្រទាប់មជ្ឈដ្ឋាន ធ្វើការគាំទ្រទៀតផង ។
លោកបានបន្តទៀតថា កន្លងមកនេះមានក្រុមហ៊ុនចិន បានគ្រោងផ្តល់នូវបង្គន់អនាម័យ ចំនួន ១០បន្ទប់ ដើម្បីដាក់បម្រើដល់ភ្ញៀវទេសចរណ៍ និង ប្រជាពលរដ្ឋតាមទីប្រជុំជនក្រុងសៀមរាប ។ ម្យ៉ាងទៀត គម្រោងក្នុងការសាងសង់បង្គន់អនាម័យសាធារណៈនៅក្រុងសៀមរាប របស់ក្រសួងទេសចរណ៍ គឺ ជាការដ៏ល្អបំផុត ក្នុង ការបម្រើជូនដល់ភ្ញៀវទេសចរណ៍ និង ប្រជាពលរដ្ឋ ដើម្បីបានចូលរួមថែរក្សា សម្អាតអនាម័យ បរិស្ថានក្នុងក្រុងនេះ ។ លោកអភិបាលខេត្តបានកំណត់នូវទីតាំងដីចំនួន២កន្លែង ដើម្បីសម្រាប់ជ្រើសរើសយកធ្វើការសាងសង់ បង្គន់អនាម័យសាធារណៈ ។
លោកអភិបាលខេត្តបានមានចំណាប់អារម្មណ៍ ទៅលើទីតាំងសួនច្បារឯ.ឧ អ៊ុង អឿន ដោយនៅ ពេលមានបង្គន់អនាម័យសាធារណៈ ទីនោះនឹងជាទីប្រមូលផ្តុំទៅដោយភ្ញៀវទេសចរណ៍ ដោយមាន ទាំងភោជនីយដ្ឋាន មជ្ឈមណ្ឌលផ្តល់ព័ត៌មានទេសចរណ៍ ហើយទីនោះអាជ្ញាធរខេត្ត នឹង ធ្វើជាសួនកម្សាន្តរបស់កុមារទៀតផង ។ ចំពោះ ទីតាំងទាំងពីរកន្លែងនេះ ជាការកំណត់ជូនដល់ គណៈប្រតិភូបង្គន់ អនាម័យសាធារណៈពិភពលោក ដើម្បីធ្វើការជ្រើស រើស សម្រាប់ការសាងសង់បង្គន់អនាម័យសាធារណៈ បែបទំនើបនេះ ៕
ថ្លែងយ៉ាងដូច្នេះនៅក្នុងឧិកាសលោកឃឹមប៊ុនសុង អភិបាលខេត្ត បាន អនុញ្ញាតឲ្យលោកថុកសុខុម ប្រធាននាយកដ្ឋានសហប្រតិបត្តិការអន្តរជាតិ និង អាស៊ាន នៃក្រសួងទេសចរណ៍ និងជាសមាជិកសមាគមបន្ទប់ទឹកពិភពលោក ចូលជួបធ្វើការ បង្ហាញគម្រោងប្លង់សាងសង់បង្គន់សាធារណៈនៅខេត្ត សៀមរាប និង ពិភាក្សារកទីតាំងដីសម្រាប់សាងសង់បង្គន់ កាលពីរសៀលថ្ងៃទី៣១ ខែ ឧសភា ឆ្នាំ២០១៤កន្លងមកនេះនៅសណ្ឋាគារបុរីអង្គរ ខេត្តសៀមរាប ដោយមានការចូលរួម ពីសំណាក់អស់លោកលោកជំទាវ ជាគណៈអភិបាលខេត្ត អស់ លោកជានាយករដ្ឋបាលសាលាខេត្ត និង ថ្នាក់ដឹកនាំមន្ទីរ ទេសចរណ៍ខេត្តផងដែរ ។
ក្នុងកិច្ចប្រជុំពិភាក្សា និង ការបង្ហាញរបស់លោកថុកសុខុមអំពីគម្រោងសាងសង់បង្គន់សាធារណៈ នៅក្រុង សៀមរាប សម្រាប់បម្រើដល់វិស័យទេសចរណ៍ ដែលជាគម្រោងរបស់សមាគមបង្គន់សាធារណៈពិភពលោក ។ លោកក៏ បានឲ្យដឹងផងដែរថា នៅថ្ងៃទី២០ មិថុនា ខាងមុខនេះ គណៈប្រតិភូបង្គន់អនាម័យសាធារណៈពិភពលោក ដែលជាម្ចាស់ គម្រោង នឹងមកធ្វើទស្សនៈកិច្ច ត្រួតពិនិត្យមើលទីតាំងសម្រាប់សាងសង់បង្គន់អនាម័យ ។
ម្យ៉ាងទៀតកន្លងមកនេះ ក្រសួងទេសចរណ៍ក៏បានសាងសង់បង្គន់អនាម័យសាធារណៈ នៅទីក្រុងភ្នំពេញ ដោយមានអគារកំពស់ពីរជាន់ ដោយ ជាន់ក្រោមជាបន្ទប់ទឹក នឹងជាន់ទី២ជាភោជនីយដ្ឋាន និង បន្ទប់មជ្ឈមណ្ឌលផ្តល់ព័ត៌មានទេសចរណ៍ ហើយទទួលបាន ការគាំទ្រពីភ្ញៀវជាតិ អន្តរជាតិចូលមកទទួលសេវាទៀតផង ។
លោកថុកសុខុមបានឲ្យដឹងទៀតថា ចំពោះបង្គន់ អនាម័យសាធារណៈនេះ គឺបម្រើដល់អតិថិជនជាតិ អន្តរជាតិដោយមិនគិតថ្លៃ ដោយមានការគ្រប់គ្រងពី អ្នកជួល ភោជ នីយដ្ឋាន ក្នុងថែទាំនៅទីនោះ ។ ដើម្បីតម្រូវការដល់ភ្ញៀវទេសចរណ៍ជាតិ អន្តរជាតិនៅខេត្តសៀមរាប លោកបានសូមឲ្យ អាជ្ញាធរខេត្ត រកនូវទីកន្លែងដីសម្រាប់ធ្វើការសាងសង់ និងធ្វើ ឲ្យបានសមស្រប ជាបង្គន់អនាម័យទំនើប ហើយក៏ជា ប្រពៃណីវប្បធម៌ចែករំលែកផ្លាស់ប្តូរវប្បធម៌បង្គន់អនាម័យសាធារណៈ ។
ឆ្លងតាមការពិភាក្សា និង ការផ្តល់មតិយោបល់របស់ឯកឧត្តម លោកជំទាវគណៈអភិបាលខេត្ត និង លោកនាយក រដ្ឋបាលសាលាខេត្ត បានលើកឡើងថា ខេត្តសៀមរាបជាជង្រុកនៃសម្បត្តិវប្បធម៌ រាល់ការសាងសង់សំណង់ ត្រូវមានការ សិក្សាឲ្យបានស៊ីជម្រៅ ដើម្បីកុំឲ្យមានផលប៉ះពាល់ដល់តំបន់ប្រវត្តិសាស្ត្រ និង ផលប្រយោជន៍របស់ប្រជាជន ក្នុងការ ជៀសវាងនូវការរឹះគន់ពីមហាជនផងដែរ ។
ក្នុងនោះកិច្ចពិភាក្សា សូមកុំឲ្យធ្វើការសាងសង់នៅដីចំណីស្ទឹង និងព្រះវិហារ ព្រះអង្គចេកព្រះអង្គចម ដែលជាទីសក្ការៈរបស់ប្រពលរដ្ឋខ្មែរ ព្រមទាំងបានលើកនូវទីតាំងចំនួនពីរ សម្រាប់ធ្វើការជ្រើស រើស សម្រាប់ធ្វើការសាងសង់បង្គន់អនាម័យសាធារណៈ គឺទីតាំងជិតរង្វង់មូលបេនឡានផ្សារចាស់ និង សួនច្បារ ឯ.ឧ អ៊ុង អឿន ។
