ភ្នំពេញ៖ ក្នុងកិច្ចប្រជុំពិភាក្សាលើគំរោងស្នើរសុំធ្វើការជួបជុំដង្ហែក្បួនរំលឹកខួប៦៥ឆ្នាំនៃការ បាត់បង់ទឹកដីខ្មែរកម្ពុជាក្រោមនៅថ្ងៃទី៤ ខែមិថុនាខាងមុខរបស់សមាគម ខ្មែរកម្ពុជាក្រោមជាមួយអាជ្ញាធររាជធានីភ្នំពេញ សាលារាជធានីភ្នំពេញមិនអនុញ្ញាត្តអោយធ្វើនោះទេ ប៉ុន្តែសាលារាជធានីអាចអនុញ្ញាត្តិអោយធ្វើការសូត្រមន្តរាប់បាត្រតាម ព្រះពុទ្ធសាសនា បានតែធ្វើយ៉ាងណាកុំអោយខូចឬប៉ូះពាល់ដល់ព្រះពុទ្ធសាសនា។
ក្នុងកិច្ចប្រជុំពិភាក្សានេះត្រូវបានធ្វើឡើង កាលពីព្រឹកថ្ងៃទី២ ខែមិថុនាក្រោមអធិតីភាពលោក ឃួង ស្រេង អភិបាលរងរាជធានីភ្នំពេញនិងលោកថាច់ សេដ្ឋា នាយកប្រតិបត្តិសមាគមខ្មែរកម្ពុជាក្រោម។ លោក ថាច់ សេដ្ឋា បានបញ្ជាក់ថា៖ គោលបំណង សំខាន់នៃការធ្វើពិធីនេះគឺ ដើម្បីរំលឹកដល់គុណបំណាច់របស់បុព្វបុរសខ្មែរដែលបានលះបង់ជីវិតដើម្បីជាតិ
និងដើម្បីរំលឹកពីការឈឺចាប់របស់ខ្មែរកម្ពុជាក្រោមដែលត្រូវអាជ្ញាធរវៀតណាមជិៈជាន់ តែមិនមានបំណងទាមទាទឹក ដីកម្ពុជាក្រោមមកវិញនោះទេ ហើយសមាគមនិងធ្វើតាមការណែនាំរបស់អាជ្ញាធរ តែសុំមេត្តាយោគយល់និងជួយសម្របសម្រួល ។
លោកឃួង ស្រេង មានប្រសាសន៍ថា អជ្ញាធររាជធានីមិនអនុញ្ញាតិឲ្យរៀបចំវេទិការ សាធាណៈ នោះទេ ការមិនអនុញ្ញាតិនេះគឺដើម្បីរក្សាសន្តិសុខ សណ្តាប់ធ្នាប់ សារធារណៈដល់ ប្រជាពលរដ្ឋ ក្នុងរាជធានីភ្នំពេញទាំងមូល ។ ជាការពិតក្នុងនាមអជ្ញាធរគឺមិនទុកឱកាសឲ្យជនណាមួយ ឬក្រុមណាមួយយក ទឹកដីកម្ពុជាជាទីតាំងប្រឆាំងនិងប្រទេសជិតខាង ឫប្រទេសណាមួយឡើយ ពិសេសទាញប្រទេស កម្ពុជាទៅរកភាពវឹកវរ ភាពអន្តរាយ និងជម្លោះជាមួយប្រទេសជិតខាង ពិសេសវិលទៅរកការកាប់សម្លាប់គ្នាជាថ្មី។
ប៉ុន្តែសមាគមខ្មែរកម្ពុជាក្រោមអាចធ្វើពិធីសូត្រមន្តរាប់បាត្រតាម ព្រះពុទ្ធសាសនាបាន ដោយរងចាំការសម្របសម្រួលពីក្រសួងមហាផ្ទៃជាមុនសិន ហើយការធ្វើពិធីនោះធ្វើយ៉ាងណាកុំឲ្យ ខូចឬប៉ះពាល់ដល់ព្រះពុទ្ធសាសនា។ យោងតាមសំណើររបស់សមាគមខ្មែរកម្ពុជាក្រោម គឺសុំប្រារព្ធពិធីរាប់បាត្រជាមួយព្រះសង្ឈចំនួន១៩៤៩ អង្គនៅថ្ងៃទី៤ ខែមិថុនា ឆ្នាំ២០១៤
នៅវត្តសាមគ្គីរង្សី ដែលមានទីតាំងស្ថិតនៅក្នុងសង្កាត់ស្ទឹងមានជ័យ ខណ្ឌមានជ័យ ដើម្បីឧទ្ទិសកុសលប្រគេនព្រះវិញ្ញាណខន្ធព្រះវីរៈសាមណៈ ព្រះវិញ្ញាណខន្ធព្រះ វិរៈមហាក្សត្រ និងវិរៈជន វិរៈនារី ខ្មែរស្នេហាជាតិ ក្នុងនោះក៏មានរៀបចំរៀបចំវេទិការសាធារណៈ អំពីខ្មែរកម្ពុជាក្រោម ដោយមានអ្នកចូលរួម ពីមនុស្សម្នាប្រមាណ២ពាន់ នាក់ ៕ ដោយ៖ សារិទ្ធ