កំពង់ឆ្នាំង៖ប្រជាពលរដ្ឋដែលរងគ្រោះដោយខ្យល់កន្ត្រាក់នៅឃុំស្រែថ្មី និងស្វាយជ្រុំ ក្នុងស្រុករលាប្អៀរ ខេត្តកំពង់ឆ្នាំងចំនួន២៧គ្រួសារ បានទទួលអំណោយមនុស្សធម៌ពីលោកជំទាវ កែ ច័ន្ទមុនី អ្នកតំណាងខេត្តកំពង់ឆ្នាំងនិងជាអនុប្រធានកិត្តិយសគណៈកម្មាធិកាសាខាកាកបាទក្រហមកម្ពុជាខេត្ត និងសមាជិកសមាជិកា សាខារបស់សាខាកាកបាទក្រហមកម្ពុជាខេត្តកំពង់ឆ្នាំង នៅរសៀលថៃ្ងទី០៣ ខែមិថុនា ឆ្នាំ២០១៤ ក្នុងបរិវេណសាលាបុណ្យភូមិត្រោកលិច ឃុំស្រែថ្មី ស្រុករលាប្អៀរ។
កញ្ញា ចាន់ ម៉ាលី នាយិការងប្រតិបត្តិសាខាកាកបាទក្រហមខេត្តកំពង់ឆ្នាំងបានអោយដឹងថា៖អំណោយរបស់សាខាកាក បាទក្រហមខេត្តដែលត្រូវចែកជនរងគ្រោះជូនក្នុងពេលនេះ គឺក្នុងមួយគ្រួសារៗទទួលបានអង្ក២៥Kg,ឃីតមួយកញ្ចប់មាន(មុង១.ភួយ១.ក្រម៉ា១និងសារុង១)។ចំណែក២គ្រួសារដែលផ្ទះគាត់រលំដល់ដី ទទួលបានកៅស៊ូតង់មួយបន្ថែមទៀត។
លោកជំទាវ កែ ច័ន្ទមុនី បានឧបត្ថម្ភថវិកាផ្ទាល់ខ្លួនដល់គ្រួសាររលំផ្ទះ២គ្រួសារក្នុងមួយគ្រួសារថវិកា១០ម៉ឺនរៀលទៀតដែរ។ នៅក្នុងឱកាសនោះលោកជំទាវ កែ ច័ន្ទមុនី បានពាំនាំនូវប្រសាសន៍ផ្តាំផ្ញើរសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន និង សម្តេចកិតិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្តេចតចំពោះសុខទុក្ខនិងការលំបាករបស់ប្រជាពលរដ្ឋនៅគ្រប់ពេលវេលានិងគ្រប់ទីកន្លែង ដែលបានរងគ្រោះដោយគ្រោះធម្មជាតិ និងគ្រួសារដែលជួបការលំបាក ទីណាមានការលំបាកតែងតែមានការជួយឧបត្ថម្ភរបស់សម្តេចជានិច្ច ។
លោកជំទាវ កែ ច័ន្ទមុនី បានមានប្រសាសន៍បន្តទៀតថា៖អំណោយមនុស្សធម៌ដែលបានផ្តល់ជូននាពេលនេះថ្វីត្បិតតែពុំមានច្រើនតម្រូវការនៃការខ្វះខាតក៏ពិតមែន ប៉ុន្តែអាចជួយសម្រួលនៃការលំបាកទាំងនេះបានមួយរយៈពេលផងដែរ និងបានបង្ហាញអំពីការយកចិត្តទុកដាក់ គិតគូរចំពោះ ប្រជាពលរដ្ឋដែលកំពុងតែជួបការលំបាក ។
លោកជំទាវ បានផ្តាំផ្ញើដល់អាជ្ញាធរដែនដី និងប្រជាពលរដ្ឋទាំងអស់សូមពិនិត្យមើលដើមឈើនៅក្បែរផ្ទះមានស្ថានភាពមិនស្រួលត្រូវកាប់ចោលភ្លាមៗ និងបើមានហេតុការណ៍ខ្យល់កន្ត្រក់ទៀតត្រូវរត់រកកន្លែងដែលមានសុវត្ថិភាពធ្វើយ៉ាងណាត្រូវរក្សាជីវិតអោយបាន។ម្យ៉ាងវិញទៀតលោកជំទាវសុំអោយប្រជាពលរដ្ឋសហការណ៍យ៉ាងជិតស្និតជាមួយសមត្ថកិច្ចអាជ្ញាធរដែរដី កំចាត់អោយបានអំពើចោរកម្មលួចឆក់ប្លន់ និងមានការប្រុងប្រយ័ត្នខ្ពស់បញ្ហាអគ្គីភ័យនៅក្នុងមូលដ្ឋានរបស់ខ្លួននិងសូមអោយចូលរួមគោរពច្បាប់ចរាចរណ៍ទាំងអស់គ្នា។
អាជ្ញាធរដែនដីបានអោយដឹងថា៖ខ្យល់ព្យុះកន្ទ្រាក់បានធ្វើអោយផ្ទះប្រជាពលរដ្ឋចំនួន២៧ខ្នងរងការខូចខាតក្នុងនោះ រលំដល់ដីចំនួន២ខ្នង និង២៥ខ្នងទៀតរបើកដំបូល ជញ្ជាំង និងដើមត្នោតច្រើនដើមបានរលំដួលផងដែរដែលហេតុការណ៍នេះបានកើតឡើងនៅល្ងាចថ្ងៃទី០១ ខែមិថុនា ឆ្នាំ២០១៤ ក្នុងឃុំស្រែថ្មី និងឃុំស្វាយជ្រុំស្រុករលាប្អៀរ តែនៅក្នុងហេតុការណ៍នេះ មិនបណ្តាលអោយមានអ្នកស្លាប់ និងរងរបួសឡើយ៕ 
