ភ្នំពេញ៖ក្រុមអ្នកលេងតុងទីនម្រមាណ៣០នាក់តំណាងឲ្យគ្នា៦០នាក់ បានលើកគ្នាទៅកាន់ផ្ទះមេតុងទីន ដើម្បីពិនិត្យមើលពីស្ថានភាពនៅក្នុងផ្ទះនោះ បន្ទាប់ពីពួកគាត់បានដឹងថាមេតុងទីន២នាក់ប្ដីប្រពន្ធ បានវេចបង្វិចរត់ចោលបាត់ ដោយនាំយកលុយតុងទីន រាប់ម៉ឺនដុល្លារទៅជាមួយផង ខណៈពេលដែលកូន ក្រុមខ្លះបានដេញរួច និងខ្លះទៀតមិនទាន់បានដេញនៅឡើយ។
ហេតុការណ៏នោះបានកើតឡើង កាលពីវេលាម៉ោង៤និង២០នាទីល្ងាចថ្ងៃទី១៥ ខែកុម្ភៈ ឆ្នាំ២០១៧ នៅក្នុង ភូមិអូរដឹម សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ក្រុមអ្នកលេងតុងទីនបាននិយាយថា មេតុងទីនដែលបាននាំគ្នាវេចបង្វិចរត់បាត់នោះ ប្ដីឈ្មោះខុម និងប្រពន្ធ ឈ្មោះ ឃិន ស្រីឡូត មានស្រុក កំណើតនៅក្នុងខេត្តកំពង់ធំ។អ្នកទាំងពីរនាក់នោះ បានមកជួលផ្ទះស្នាក់នៅ ក្នុងភូមិអូរដឹមរយៈពេល៤ទៅ៥ឆ្នាំកន្លងមកហើយ ដោយបើកលក់គ្រឿងទេស គ្រឿងអគ្គីសនី ទូរស័ព្ទដៃ និង របស់របរមួយចំនួនទៀត ដែលមានតម្លៃរាប់ម៉ឺនដុល្លារ។ដោយសារតែមើលទៅការរកស៊ីធំដុំនេះហើយ ទើបធ្វើឲ្យពួកគាត់ មានទំនុកចិត្តនិងបាននាំគ្នាលេងតុងទីន ដោយបានឲ្យ២នាក់ប្ដីប្រពន្ធនោះធ្វើជាមេ ដោយមិន
បាននឹកស្មានដល់ថា មានរឿងបែបនេះកើតឡើងនោះឡើយ។ម្យ៉ាងទៀតការលេងតុងទីននោះ ត្រូវដល់ថ្ងៃកំណត់ដេញនៅថ្ងៃទី១០- ១១ ជារៀងរាល់ខែ លុះលើកចុងក្រោយនេះស្រាប់តែបាត់មេទាំងពីរ នាក់នោះមិនឃើញ ដោយប្រមូលលុយជាង១០ម៉ឺនដុល្លារទៅជាមួយ ហើយក៏បានលេចចេញដំណឹងមួយ ទៀតថា អ្នកទាំងពូរនាក់នោះ ខ្ចីបុលចងការលុយអ្នកដ៏ទៃទៀត មករកស៊ីប្រហែលជាង១០ម៉ឺនដុល្លារទៀត ផងដែរ គឺកំពុងជំពាក់គេវ័ណ្ឌក ទើបសម្រេចចិត្តរត់គេចខ្លួនបាត់បែបនេះតែម្ដង៕
