ការប្រកួតបាល់ទាត់ពានរង្វាន់ពិភពលោកកាលពីយប់មិញនេះគឺជាជំនូបដ៏ស្វិតស្វាញរវាងក្រុមម្ចាស់ផ្ទះសាំបាប្រេស៊ីលជាមួយក្រុមអាត់ការ៉ូក្រូអាតហើយជាលទ្ធផលប្រេស៊ីលបានយកឈ្នះក្រូអាត៣ទល់នឹង១ ។ ការប្រកួតលេងបាន១១នាទី ក្រុមភ្ញៀវក្រូអាតបាននាំមុខ១-០មុនដោយការទាត់ចូលទីខ្លួនឯងរបស់កីឡាករ Marcelo ។ ប៉ុន្តែការប្រកួតមកដល់នាទីទី២៩ម្ចាស់ផ្ទះប្រេស៊ីលតាមបានស្មើវិញដោយកីឡាករ Neymar ។
ចប់តង់ទី១ក្រុមទាំងពីរស្មើគ្នា១-១ ។ ការប្រកួតបានឈានចូលនាទីទី៧១ប្រេស៊ីលបានទទួលកាដូបាល់ប៉េណាល់ទី១គ្រាប់ហើយធ្វើសម្រេចបាន ដោយកីឡាករ Neymar ដដែល ។ ក្រុមក្រូអាតបានវាយបកសម្រុញវិញយ៉ាងខ្លាំងប៉ុន្តែការវាយបកនេះមិនមាន លទ្ធផលឡើយ ដោយឡែកប្រេស៊ីលបែរជារកបានមួយគ្រាប់ទៀតដែលជាគ្រាប់ដាច់មាត់នៅនាទីទី៩០ ហើយធ្វើបាន ដោយកីឡាកររបស់ក្លិបតោខៀវ Chelsea គឺ Oscar ។ ចប់ការប្រកួតទាំងពីរតង់ប្រេស៊ីលឈ្នះក្រូអាត៣-១ ។
គួរបញ្ជាក់ថា នៅថ្ងៃនេះក៏មានការប្រកួតចំនួន៣គូផងដែរគឺនៅពូល A មិចស៊ីកូត្រូវជួបជាមួយកាម៉េរូនចំណែកឯនៅពូល B គឺ ម្ចាស់ការពារតំណែងជើងឯកអេស្ប៉ាញជូបហូឡង់និងឈីលីប៉ះអូស្ត្រាលី ៕