សៀមរាប៖ មន្ត្រីយោធា២រូបស្លៀកពាក់ឈុតសម្លៀកប៉ារ៉ា បើករថយន្តម៉ាកឌុយមិចព័ណត្រេអ៊ី ពាក់ស្លាកលេខ ខេមរភូមិន្ទ២.១៤៧២ និងមានកាំភ្លើងខ្លីមួយដើម ដឹកឈើនាងនួន ត្រូវបានលោក កើត-វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បញ្ជាអោយកម្លាំងសមត្ថកិច្ចចាប់បញ្ជូនទៅរដ្ឋបាលព្រៃឈើទាំងយប់។
ការចុះចាប់រថយន្តប្រភេទព័ណអង្គរភាពនេះធ្វើឡើងនៅវេលាម៉ោង១០យប់ ថ្ងៃទី១៩ ខែមិថុនា ឆ្នាំ២០១៤ នៅចំណុច៣១៧មណ្ឌលជនពិការ ឃុំបល្ល័ង ស្រុកប្រាសាទបាគងខរត្តសៀមរាប។ មន្ត្រីរដ្ឋបាលព្រៃឈើបាគងលោក វែង-លី បានឲ្យអ្នកកាសែតដឹងថា រថយន្តខាងលើប្រើរូបភាពបន្លំភ្នែកសមត្ថកិច្ចដោយ ដាក់ឈើប្រណិតប្រភេទនាងនួនជាច្រើនដុំនៅខាងក្នុង ហើយយកឈើនេវសន្លឹកដាក់ព័ទជុំវិញ គ្របកៅស៊ូបាតង់ជិត។
លោកវេងលីបន្ថែមថា ចំណែកនៅក្នុងកាបីន ក្រោយខ្នងតៃកុង ម្ចាស់ឈើបានដាក់ឈើនាងនួនមុខធំៗ ប្រវែង១ម៉ែត្រ រួចយកភួយ ការ៉ុងអង្ករ ខោអាវ គ្របពីលើ បើមិនរើមើលទេគឺច្បាស់ជាមិនដឹងនោះនោះឡើយ។ មន្ត្រីរដ្ឋបាលព្រៃឈើសៀមរាបលោកម៉ែនវុទ្ថីបានឲ្យដឹងថាក្រោយធ្វើការវាស់វែង វត្ថុតាងទាំងឈើនាងនួនមានចំនួន១៨ស្មើ០/៣៥៤ និងរថយន្តបានរក្សាទុកនៅផ្នែករដ្ឋបាលព្រៃឈើបន្ទាយស្រី ដើម្បីធ្វើការផាកពិន័យទៅតាមច្បាប់អន្តរកាលព្រៃឈើដោយឡែកមន្ត្រីយោធា២រូប និងថៅកែស្រីម្នាក់ឲ្យពួកគាត់ត្រឡប់ទៅផ្ទះវិញចំណែករថយន្តអង្គរភាពពេលណាគេបង់ពិន័យរួចទើបឲ្យយកទៅបាន។
ព្រះរាជអាជ្ញារងបានបញ្ជាក់បន្ថែមប្រាប់អ្នកកាសែតថា តាមផ្លូវច្បាប់បើប្រភេទឈើក្រញូងគឺត្រូវចាប់ទាំងមនុស្សបញ្ជូនមកតុលាការ តែប្រភេទឈើលេខ២គឺ អនុវត្តទៅតាមច្បាប់របស់រដ្ឋបាលព្រៃឈើ ត្រូវអោយម្ចាស់ចូលខ្លួនបង់ពិន័យអន្តរកាលតាមច្បាប់។ សូមបញ្ជាក់ថា រយៈពេលប្រហែល៣ខែនេះ មានឈ្មួញរកស៊ីដឹកឈើខុសច្បាប់ដោយប្រើរថយន្តប្រភេទ ឌុយមិច ពណ៍ត្រេអ៊ី ពាក់ស្លាកលេខ ខេមរៈភូមិន្ទ រាប់សិបគ្រឿង ដឹកឈើពីខេត្តព្រះវិហារ ខេត្តឧត្តរមានជ័យ យកមកលក់ចែកចាយក្នុងខេត្តសៀមរាប ទាំងយប់ទាំងថ្ងៃ មិនទាន់មានការបង្ក្រាបពីកម្លាំងសមត្ថកិច្ចពាក់ព័ន្ទនៅឡើយ។
