ខ្សែបម្រើក្រុមអាហ្ស៊ូរីអ៊ីតាលីកីឡាករ Andrea Pirlo (អាន់ដ្រេ ពឺឡូ) នឹងសម្រេចចិត្តចូលនិវត្តន៍ពី ក្រុមជម្រើសជាតិនៅពេលដែលការប្រកួត World Cup បញ្ចប់ ។ យោងតាមគេហទំព័រ The Mirror បានចុះផ្សាយថា តារាបាល់ទាត់របស់ក្លិបសេះបង្កង់ Juventus រូបនេះ បានឈានដល់វ័យ៣៥ឆ្នាំហើយ ហើយរូបគេកំពុងគិតពីការបញ្ចប់ភារកិច្ចជាមួយជម្រើសជាតិអ៊ីតាលីក្រោយចំណាយ ពេលលេងជាច្រើនឆ្នាំមក ។
បើសិនជាអ៊ីតាលីត្រូវបរាជ័យក្រោមស្នាដៃរបស់ប្រទេសអ៊ុយរ៉ាហ្គាយនៅយប់នេះ នោះក្រុមរបស់លោក Cesare Prandelli (សេសារី ប្រានដេលី) នឹងត្រូវធ្លាក់ចេញពី World Cup ហើយវាអាចជាសញ្ញាមួយបញ្ជាក់ថា អាជីពរបស់ Pirlo ជាមួយក្រុមជម្រើសជាតិអាចត្រូវនឹងបញ្ចប់ ។ Pirlo និយាយថា “ការប្រកួត World Cup ពិតជាសំខាន់ណាស់ យើងត្រូវខំប្រឹងឲ្យបានឡើងទៅកាន់ វគ្គបន្តបន្ទាប់ប៉ុន្តែខ្ញុំនឹងអាចចូលនិវត្តន៍ពេលការប្រកួតនេះចប់” ។ គួរបញ្ជាក់ថា Pirlo បង្ហាញខ្លួនលើកដំបូងឲ្យអ៊ីតាលីក្នុងឆ្នាំ ២០០២ ហើយរូបគេក៏បានជួយអ៊ីតាលីឲ្យឈ្នះពាន World Cup ក្នុងឆ្នាំ ២០០៦ ផងដែរ ៕