ខេត្តប៉ៃលិន ៖ ក្នុងវេទិកាសាធារណៈមួយ របស់ក្រុមការងារថ្នាក់ ជាតិ ចុះមូលដ្ឋាន និងគាំទ្រអនុវត្តកម្មវិធីនយោបាយយុទ្ធសាស្ត្រចតុកោណ ដំណាក់កាលទី៣ របស់រដ្ឋាភិបាល ដែលរៀបចំឡើងកាលពីថ្ងៃទី២៤ ខែមិថុនា ឆ្នាំ២០១៤ ចំនួន២កន្លែង ដោយពេលព្រឹកធ្វើនៅភូមិអូរតាពុកលើ សង្កាត់ប៉ៃលិន ក្រុងប៉ៃលិន និងពេលល្ងាច
នៅក្នុងភូមិអូរអណ្តូង ឃុំអូរអណ្តូង ស្រុកសាលាក្រៅ ខេត្តប៉ៃលិន ក្រោមអធិបតីភាពលោក ប៉ាន សូរស័ក្តិ រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារថ្នាក់ជាតិចុះមកខេត្តប៉ៃលិន ។
ប្រជាពលរដ្ឋដែលចូលរួមក្នុងវេទិកានោះ បានលើកឡើងនូវបញ្ហាជាច្រើន ដូចជាទំនាស់ដីធ្លីជាមួយអ្នកមានលុយ មានអំណាច ,ការបាត់បង់ដីកម្មសិទ្ធ ,ដីលំនៅដ្ឋាន ,ដីស្រែចំការ ,ចរន្តអគ្គីសនីប្រើប្រាស់រាល់ថ្ងៃ កុងទ័រដើរលឿន, ការដាច់ភ្លើងនៅចុងខែជាញឹកញាប់ , ខ្សែភ្លើងមានភាពរញ៉េរញៃធ្លាក់តាមផ្លូវ, ភាពមិនប្រក្រតីរបស់ប្រព័ន្ធតុលាការខេត្ត ព្រមទាំងបញ្ហារថយន្តដឹកដីឯកជនធ្លាក់ដីពាសពេញផ្លូវ តែអាជ្ញាធរមើលមិនឃើញ និងបញ្ហាជាច្រើនទៀត។
ជាក់ស្តែងលោក វ៉ាន់ គឹមស្រេង អាយុ៦១ឆ្នាំ ជាប្រជាពលរដ្ឋម្នាក់រស់នៅភូមិអូរតាពុក្រោម សង្កាត់ទួលល្វា ក្រុងប៉ៃលិន បានសំដែងនូវក្តីកង្វល់របសគាត់ថា កាលពីឆ្នាំ២០១២ មានជនសង្ស័យម្នាក់ បានមកជួលផ្ទះគាត់រស់នៅ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ហើយបានជំពាក់បំណុលគេជាច្រើន បន្ទាប់មកក៏រត់គេចខ្លួនបាត់ស្រមោល លុះដល់ឆ្នាំ២០១៣ រូបគាត់ដែលជាម្ចាស់ផ្ទះបានចូលទៅក្នុងផ្ទះជួលនោះ ដើម្បីដឹក តុ ទូ និងសម្ភារៈមួយចំនួនចេញពីក្នុងផ្ទះ ដោយយកមកទុកនៅផ្ទះដែលខ្លួនរស់នៅរាល់ថ្ងៃ ស្រាប់តែមានគេព្រួត គ្នាវាយគាត់ និងកូនរបស់គាត់ រហូតដល់រងរបួសជាទម្ងន់ ។
ប្រភពបន្តថា៖បន្ទាប់មកគាត់បានដាក់ពាក្យបណ្តឹងទៅស្នងការខេត្តដើម្បីចាប់ជនសង្ស័យ លុះពេលសមត្ថកិច្ចស្នងការចាប់បានជនសង្ស័យហើយ បែរជាដោះលែងឱ្យរួចខ្លួនទៅវិញ ។ ក្រោយមកគាត់កើតទុកមិនសុខចិត្ត ក៏បានដាក់ ពាក្យប្តឹងទៅតុលាការខេត្ត ប៉ុន្តែនៅមិនអាចដោះស្រាយជូនគាត់បានទៀត ទើបគាត់ដាក់ពាក្យប្តឹងទៅតុលាការកំពូល ហើយនៅពេលនេះគាត់កំពុងតែរង់ចាំមើលចម្លើយ ។ ទាក់ទិនបញ្ហានេះ តំណាងក្រសួងយុត្តិធម៍ ដែលជាក្រុមការងារថ្នាក់ជាតិចុះមូលដ្ឋានមកខេត្តប៉ៃលិន បានទទូលយកឯកសាររបស់គាត់ ដើម្បីទៅត្រួតពិនិត្យ ។
ចំណែកស្ត្រីវ័យចំណាស់ម្នាក់តំណាងឱ្យអ្នកភូមិជាច្រើនគ្រួសារបានចោទប្រកាន់ មេភូមិកោះកែវ និងលោកមេឃុំសាលាក្រៅ ថាបានឃុបឃិតគ្នាយកដីរដ្ឋលក់រាប់រយហិកតា រួមនិងដីរបស់ពួកគាត់ជាច្រើននាក់ទៀត ដែលពួកគាត់បាន កាន់កាប់តាំងពីឆ្នាំ២០០៥មក ហើយ នេះពួកគាត់បានដាំដុះជារៀងរាល់ឆ្នាំ ឥឡូវត្រូវបានខាងភូមិ ដកហូតយកទៅលក់ឱ្យឈ្មួញទៅវិញ។ លោកអាន់ សំអាត់ មេឃុំសាលាក្រៅ បានឡើងបកស្រាយនូវការចោទប្រកាន់ របស់ស្ត្រីវ័យចំណាស់នោះថា៖ ដីមួយកន្លែងនេះពីមុនលោកមេភូមិ និងមេឃុំចាស់ ពួកគាត់ចែកឲ្យប្រជាពលរដ្ឋ ដោយកាត់ជាឡូត៏ ហើយនៅដីមួយចំនួន ធ្វើជាដីសហគមន៏ ។
ចំណែកអ៊ុំស្រីនេះ គាត់បានលក់ដី ដែលចែកឲ្យទៅលក់ រួចគាត់ទៅរស់នៅលើដីសហគមន៏វិញ ដោយមានកូនចៅទៅជាមួយផង ទើបមានបញ្ហាមកដល់ថ្ងៃនេះ ។ ចំពោះបញ្ហាប្រជាពលរដ្ឋចោទថា មេឃុំលក់ដីសហគមន៏ លោក អាន់ សំអាត់ មេឃុំសាលាក្រៅ មិនបានបកស្រាយនោះឡើយ ៕
