ភ្នំពេញ៖ ឯកឧត្តម វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនថ្មីប្រចាំកម្ពុជា បានជំរាបជូនលោកជំទាវឧបនាយករដ្ឋមន្ត្រីកិត្តិសង្គហបណ្ឌិត ម៉ែន សំអន ពីវឌ្ឍនភាពថ្មីរបស់កម្ពុជាជាមួយនឹងចិន ដែលត្រូវចាប់ផ្តើមនៅឆ្នាំ២០១៩នេះ ដោយចិនប្រកាសគាំទ្រជួយកម្ពុជា លើវិស័យសេដ្ឋកិច្ច គ្រាដែលកម្ពុជាកំពុងទទួលរងនូវការដាក់សម្ពាធពីបណ្តាប្រទេសមួយចំនួន ។
ឯកឧត្តម ណុប ចាន់ណារិន្ទ អនុរដ្ឋលេខាធិការនិងជាអ្នកនាំពាក្យនៅក្រោយជំនួបសំដែងការគួរសមរបស់ឯកឧត្តម វ៉ាង វិនធាន ជាមួយលោកជំទាវឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចនៅទីស្តីការក្រសួងនាព្រឹកថ្ងៃទី២៨ ខែមករា ឆ្នាំ២០១៩ ។
ជាមួយនឹងជំហរដ៏រឹងមាំរបស់រដ្ឋាភិបាលចិននាពេលនេះ ឯកឧត្តមអគ្គរដ្ឋទូតថ្មីបានបញ្ជាក់ថាៈភាគីទាំងពីរ កម្ពុជា-ចិន បានចុះហត្ថលេខាលើអនុស្សារណៈចំនួន៨រួចហើយនៅក្នុងអំឡុងពេលនៃដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ទៅកាន់ប្រទេសចិន ជាលើកដំបូងក្នុងឆ្នាំ២០១៩នេះ កាលពីថ្ងៃទី២០ដល់ថ្ងៃទី២៣ ខែមករា ។
នៅក្នុងជំនួបសំដែងការគួរសមនេះដែរ ឯកឧត្តម វ៉ាង វិនធាន បានរំលឹកពីខ្លឹមសារសំខាន់ៗនៃដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសចិនជូនលោកជំទាវឧបនាយរដ្ឋមន្ត្រី ម៉ែន សំអន ពិសេសការជួយលើកកំពស់សេដ្ឋកិច្ចកម្ពុជា តាមរយៈការនាំអង្ករពីកម្ពុជាចំនួន៤០ម៉ឺនតោនក្នុងមួយឆ្នាំ២០១៩ទៅកាន់ប្រទេសចិន ហើយចិននឹងជួយកម្ពុជាក្នុងទំហ៊ំទឹកប្រាក់ប្រមាណ៦០០លានដុល្លាអាមេរិកចាប់ពីឆ្នាំ២០១៩ដល់ឆ្នាំ២០២១ និងបង្កើនភ្ញៀវទេសចរចិនមកកាន់កម្ពុជាឲ្យបាន៥លាននាក់ក្នុងឆ្នាំនេះ និងឆ្នាំបន្ទាប់ ព្រមទាំងការពង្រឹងការអនុវត្តច្បាប់រវាងប្រទេសទាំង២ផងដែរ ។
ឯកអគ្គរដ្ឋទូតចិនថ្មីរូបនេះបានថ្លែងអំណរគុណចំពោះលោកជំទាវ ម៉ែន សំអន ដែលបានសហការជួយដល់បេសកកម្មរបស់មន្ត្រីការទូតចិនកន្លងមកឲ្យទទួលបានជោគជ័យ ហើយក៏សុំការណែនាំបន្តទៀតដើម្បីឲ្យបេសកកម្មការទូតរបស់ឯកឧត្តម លើកនេះកាន់តែល្អប្រសើរឡើងថែមទៀត ។
ជាការឆ្លើយតបលោកជំទាវកិត្តិសង្គហបណ្ឌិត ម៉ែន សំអន បានឯកភាពគាំទ្រចំពោះបេសកម្មការទូតរបស់ឯកឧត្តម វ៉ាង វិនធាន ដែលកន្លងមកក៏ដូចជាបច្ចុប្បន្នកម្ពុជា នឹងចិននៅតែជាមិត្តល្អពិសេសគ្រាដែលកម្ពុជាជួបការលំបាក រដ្ឋាភិបាលចិន តែងតែជួយជ្រោមជ្រែងដល់កម្ពុជាជាបន្តបន្ទាប់ លើការអភិវឌ្ឍគ្រប់វិស័យ ។
លោកជំទាវបញ្ជាក់ថា៖ រាជរដ្ឋាភិបាលកម្ពុជា នៅតែប្រកាន់ខ្ជាប់នូវការគាំទ្រនយោបាយចិនតែមួយនិងនយោបាយផ្លូវមួយ ខ្សែក្រវ៉ាត់មួយហើយពេលនេះលោកជំទាវ ម៉ែន សំអន សូមគាំទ្រអនុវត្តចំពោះអនុស្សារណៈចំនួន៨ដែលបានចុះហត្ថលេខារួចហើយ ក្រោមអធិបតីភាពប្រមុខរដ្ឋាភិបាលទាំងពីរ កាលពីដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសចិនព្រោះក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ចមានភារកិច្ចធ្វើជាសេនាធិការឲ្យរាជរដ្ឋាភិបាលកម្ពុជា លើការងារតាមដានការអនុវត្តច្បាប់ទប់ស្កាត់អំពើពុករលួយភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ដើម្បីបំរើប្រយោជន៍បុគ្គល និងបក្សពួកនិងការពារសិទ្ធរបស់ពលរដ្ឋ ពោលគឺពង្រឹងអភិបាលកិច្ចល្អដែលជាស្នូលនៃយុទ្ធសាស្ត្រចតុកោណដើម្បីកំណើនការងារសមធម៌និងប្រសិទ្ធភាព ៕