បេីយោងតាមសេចក្ដីជូនដំណឹងរបស់រដ្ឋបាលខេត្តក្រចេះ លេខ០០៥ ស ជ ណ ចុះថ្ងៃទី២៥ ខែមករា ឆ្នាំ២០១៩កន្លងទៅ ដល់បងប្អូនប្រជាពលរដ្ឋទាំង ១,៥៤៨គ្រួសារ ដែលបានដាក់ពាក្យស្នេីសុំដីសម្បទានសង្គមកិច្ចស្ថិតនៅក្នុងឃុំ២ធ្នូ ស្រុកស្នួល មកចាប់ឆ្នោតជ្រើសរើសយកឡូតិ៍ដីសម្បទានសង្គមកិច្ច ។
ជាក់ស្ដែងនៅព្រឹកថ្ងៃទី៣០ ខែមករា ឆ្នាំ២០១៩នេះ មានរៀបចំពិធីចាប់ឆ្នោតជ្រើសរើសដីឡូត៍លំនៅឋាន និងដីឡូត៍កសិកម្មជូនដល់ប្រជាពលរដ្ឋដែលស្នេីសុំដីសម្បទានសង្គមកិច្ច ក្នុងចំណុចដីសម្បទានសេដ្ឋកិច្ចរបស់ក្រុមហ៊ុនចំការកៅស៊ូមេមត់ក្រោមអធិបតីភាពឯកឧត្ដម វ៉ា ថន អភិបាលនៃគណៈអភិបាលខេត្តក្រចេះ នៅបរិវេណសាលាស្រុកស្នួល ។
ឯកឧត្ដម វ៉ា ថន អភិបាលខេត្តក្រចេះ បានថ្លែងថាចំពោះសម្បទានដីសង្គមកិច្ចនេះ ដែលមានទីតាំងស្ថិតនៅក្នុងឃុំ២ធ្នូ ស្រុកស្នួល នាថ្ងៃនេះមានចំនួន ១.៥៤៨គ្រួសារ ដែលត្រូវចាប់ឆ្នោតជ្រើសរើសយកដីឡូត៍កសិកម្ម ដោយគ្រួសារនីមួយៗទទួលបានដីឡូត៍កសិកម្មទំហំ ០២ហិកតា ។
