អាជ្ញាធរប៉ាឡេស្ទីនរាយការណ៍ថា ការវាយប្រហារយ៉ាងខ្លាំងក្លារបស់អីុស្រាអែលបណ្តាលឱ្យមនុស្ស ស្លាប់យ៉ាងតិច២៨នាក់ កាលពីថ្ងៃទី៨ កក្កដា នៅជ្រោយហ្គាហ្សា ចំណែករដ្ឋអីុស្រាអែលវិញគ្រោងពីប្រតិបត្តិការរយៈពេលយូរ មួយប្រឆាំងពួកហាម៉ាស់ ។ អាជ្ញាធរប៉ាឡេស្ទីនបញ្ជាក់ថា ក្នុងចំណោមអ្នកស្លាប់ទាំង២៨នាក់ ច្រើននាក់ជាជនស៊ីវិលក្នុងនោះមានកុមារ៥នាក់ ។ ចំណែកស្នូរស៊ីរ៉ែនបានលាន់ឮ កាលពីល្ងាចថ្ងៃទី៨ កក្កដា នៅទីក្រុងតែលអាវីវ រដ្ឋធានីអីុស្រាអែល ដែលនៅទីនោះមនុស្សម្នារត់ទៅរកជម្រក ហើយកងទ័ពប្រកាសថា មីស៊ីលប្រឆាំងមីស៊ីល IRON DOME អាចស្ទាក់កម្ទេចគ្រាប់រ៉ុក្លែត១គ្រាប់នៅពីលើផ្ទៃមេឃ នៃទីក្រុងនោះ ។ បន្ទាប់ពីនេះបន្តិចស្នូរស៊ីរ៉ែនបានលាន់ឮនៅទីក្រុងហ្សេរុយ សាឡឹម ដែលក្រោយពីស៊ីរ៉ែននោះមកគេឮស្នូរគ្រាប់ផ្ទុះនានា ។
ក្រុមហាមា៉ាស់ ប្រកាសថា បានបាញ់រ៉ុក្កែត៤គ្រាប់ដាក់ក្រុងហ្សេរុយសាឡឹម ហើយក៏បាញ់គ្រាប់រ៉ុក្កែតសំដៅក្រុងហៃហ្វារជាទីក្រុងកំពង់ផែ នៅភាគខាងជើងអីុស្រាអែល ចម្ងាយ១៤០គីឡូម៉ែត្រពីហ្គាហ្សាដែរ ។ ស្នូរស៊ីរ៉ែនក៏ស្តាប់ឮនៅទីក្រុងប៊ីនយ៉ាមីណា ភាគខាងជើងអីុស្រាអែល ។ កងទ័ពអុីស្រាអែលនិយាយថា ពុំទាន់បានដឹងពីជនរងគ្រោះណាម្នាក់ ដោយសារការបាញ់គ្រាប់រ៉ុក្កែតកាលពីយប់ថ្ងៃទី៨ កក្កដា ដាក់ក្រុងតែលអាវីវ និងក្រុងហ្សេរុយសាឡឹមឡើយ ។
លោកមូ៉សេ យ៉ាអាឡូន រដ្ឋមន្ត្រីការពារប្រទេសអីុស្រាអែលក្នុងសេចក្តីប្រកាសមួយនិយាយ ថា យើងរៀបចំការប្រយុទ្ធមួយប្រឆាំងក្រុមហាម៉ាស់ ដែលនឹងមិនបញ្ចប់ក្នុងរយៈពេលតែប៉ុន្មានថ្ងៃនោះឡើយ ។ យើងនឹងមិនអនុគ្រោះដែលបណ្តាមីស៊ីលត្រូវបានបាញ់សំដៅបណ្តាទី ក្រុងអីុស្រាអែល ហើយយើងត្រៀមពង្រីកប្រតិបត្តិការជាមួយមធ្យោបាយគ្រាប់យ៉ាងដែល យើងមានដើម្បីបន្តវាយប្រហារពួកហាម៉ាស់ ។ ចំណែកនាយករដ្ឋមន្ត្រីអីុស្រាអែលលោកបេនចាមីននេ តាន់យ៉ាហ៊ូវិញថ្លែងថា កងទ័ពអីុស្រាអែលត្រូវត្រៀមខ្លួនទៅមុខរហូតដល់គោលដៅ ។ រាល់ការជ្រើសរើសត្រូវបានសិក្សា ក្នុងនោះរួមមានទាំងការវាយលុកខាងជើងគោកផង។
យោងតាមកងទ័ពអីុ ស្រាអែលថា ទីតាំង១២០កន្លែងរងការវាយប្រហារដោយកងយន្តហោះ ឬកងម៉ារីនកាលពីយប់ថ្ងៃទី៧មកទី៨ កក្កដា ហើយការវាយប្រហារតាមអាកាសថ្មីៗត្រូវធ្វើជាបន្តបន្ទាប់ទៀត ។ ម្យ៉ាងទៀតកងទ័ពអីុស្រាអែលនិយាយថា បានទទួលភ្លើងខៀវពីរដ្ឋាភិបាលប្រមូលទាហានបម្រុង៤០.០០០ នាក់ ។ ទាហានបម្រុងជាង១.៥០០នាក់ត្រូវបានហៅចូលកងទ័ព រួចហើយដើម្បីប្រឈមមុខនឹងវិបត្តិថ្មីនេះ ដែលផ្ទុះឡើងក្រោយការបាត់ខ្លួនក្មេងជំទង់អីុស្រាអែល៣នាក់ ដែលសាកសពពួកគេរកឃើញនាពេលក្រោយមក ៕