ភ្នំពេញ៖ ក្បាលនាគចែកទ្រូងផ្លូវចំនួនមួយផ្ទាំងធំត្រូវរងការខូចខាតដោយសារបុរសម្នាក់បើករថយន្តហាយឡេន ឌ័រមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2V-9978 ក្នុងស្ថានភាពស្រវឹង បានបើកបុកពេញទំហឹងបណ្តាល ឲ្យរថយន្តរងការខូចខាតផ្នែកខាងមុខទាំងស្រុងបន្តដំណើរទៅមុខលែង កាលពីវេលាម៉ោង ១២និង០០នាទីយប់រំលង អាធ្រាត្រឈានចូលថ្ងៃទី២១ កុម្ភះ ឆ្នាំ២០១៤ ស្ថិតតាមបណ្តោយផ្លូវម៉ៅសេទុង កែងផ្លូវលេខ១៩៩ ក្នុងសង្កាត់ទំនប់ទឹក ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេសង្គេតរថយន្តបង្កខាងលើដែល បើកបរដោយបុរសម្នាក់ស្ថិតក្នុងស្ថានភាពស្រវឹងជោគជាំ បានបើកបរតាមបណ្តោយផ្លូវម៉ៅសេទុង ទិសដៅពីលិចទៅ កើតលុះមកដល់ចំំណុចកើតហេតុខាងលើរថយន្តស្រាប់តែរេចង្កូតទៅបុកក្បាលនាគចែកទ្រូងផ្លូវពេញទំហឹងបណ្តាលឲ្យ រថយន្តរងការខូចខាតផ្នែកខាងមុខទាំងស្រុងបន្តដំណើរទៅមុខលែងរួច និងក្បាលនាគចែកទ្រូងផ្លូវចំនួនមួយផ្ទាំងត្រូវខ្ទាត ចេញពីជួរ រងការខូចខាត។
សូមបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍នេះដែរគេសង្គេតឃើញមានសមត្ថកិច្ចពីរនាក់បានចុះធ្វើ ការអន្តរាគមន៍បានតែមួយភ្លេតហើយ បែបជានាំគ្នាជិះម៉ូតូចេញទៅវិញបាត់ធ្វើដូចគ្មានរឿងអ្វីកើតឡើង ត្រឹមតែទុកឲ្យម្ចាស់រថយន្តបង្កហៅគ្នីគ្នាមកលើកក្បាលនាគចែកទ្រូងផ្លូវដែលជាទ្រព្យសម្បត្តិរដ្ឋត្រូវបានរង ការខូចខាតនោះ ដាក់ឲ្យត្រូវរាបរយតាមជួរទៅវិញទាំងក្បាលនាគត្រូវបែកប្រេះស្រាំង និងដាច់ចេញពីជួរទៅហើយ។
ក្រោយកើតហេតុភាគីខាងម្ចាស់រថយន្តហាយឡេនឌ័របានហៅរថយន្តស្ទូចមកស្ទូចយករថយន្តរបស់ខ្លួនចេញពីកន្លែង កើតហេតុបាត់ស្រមោលឈឹង៕