ភ្នំពេញ៖ រថយន្តមួយគ្រឿងបើកក្នុងល្បឿនលឿនក៏ជ្រុលទៅបុករថយន្តមួយគ្រឿងទៀតដែលបើកនៅខាងមុខរងការខូចខាត ស្រាប់តែមានរថយន្តមួយគ្រឿងទៀតបើកមកពីក្រោយរថយន្តទាំង២គ្រឿងដែលកំពុងបង្កគ្រោះថ្នាក់ក៏ជ្រុលទៅបុកប៉ះពីក្រោយ
ថែមទៀត សំណាងល្អដែលមិនបណ្ដាលអោយមានមនុស្សរងគ្រោះថ្នាក់។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី២៩ខែកក្កដាឆ្នាំ២០១៤ តាមបណ្តោយផ្លូវជាតិលេខ១ ត្រង់ចំណុចទល់មុខនិងភោជនីយដ្ឋាន សម្បត្តិមានហេង ស្ថិតក្នុងសង្កាត់និរោធ ខណ្ឌច្បារអំពៅ។
បើតាមប្រភពព័ត៌ពីសមត្ថកិច្ចដែលនៅកន្លែងកើតហេតុបានបញ្ជាក់ឲ្យដឹងទៀតថា មុនពេលកើតហេតុមានរថយន្ត៣គ្រឿង បានបើកបរតាមបណ្ដោយផ្លូវជាតិលេខ១ ទិសដៅពីកើតទៅលិច ស្របទិសគ្នា លុះមកដល់ចំណុចកើតហេតុរថយន្តមួយគ្រឿងម៉ាកប៉ាសេរ៉ូ ពណ៌ស ពាក់ស្លាកលេខ រដ្ឋ36 2-0333 បើកដោយបុរសម្នាក់ក្នុងល្បឿនលឿនក៏បានជ្រុលទៅបុកនិងរថយន្តមួយគ្រឿងម៉ាក មែនសឺដេស ពណ៌សំបកឪឡឹក ពាក់ស្លាកលេខ ភ្នំពេញ 2J-9777 ដែលបើកនៅពីខាងមុខចំពេញហឹងធ្វើអោយរថយន្តមែកសឺដេសរងការខូចខាតផ្នែកខាងក្រោយ ស្រាប់តែភ្នាមៗនោះក៏មានរថយន្តមួយគ្រឿងទៀតម៉ាក ហាយលេនដឺ ពណ៌ប្រាក់ មិនចាំស្លាកលេខ ដែលបើកមកពីក្រោយចាប់ហ្វ្រាំងមិនទាន់ក៏បានជ្រុលទៅបុកនិងគូទរថយន្ត ប៉ាសេរ៉ូ ដែលកំពុងបង្កគ្រោះថ្នាក់ចំពីក្រោយបណ្តាលអោយរថយន្តទាំង៣គ្រឿងរងការខូចខាតទាំងសងខាង។ បន្ទាប់ពីកើតហេតុម្ចាស់រថយន្តទាំង៣គ្រឿងបានចុះមកសម្របសម្រួលគ្នាគ្នា ដោយម្ចាស់រថយន្ត ប៉ាសេរ៉ូ ដឹងថានេះជាកំហុសរបស់ខ្លួនក៏បានអោយរថយន្តហាយលេនឌឺ ដែលបុកចំពីក្រោយរថយន្តរបស់ខ្លួនបើកចេញទៅដោយមិនមានសងសំណងអ្វីទេ ចំណែករថយន្តប៉ាសេរ៉ូបាននៅធ្វើការដោះស្រាយហើយថាព្រមសងសំណងទៅដល់រថយន្តមែកសឺដេស តែបែរជាក្រលាស់សំដីថាខ្លួនអត់មានលុយទៅវិញ។ ក្រោយពេលកើតហេតុរថយន្តទាំង២គ្រឿងត្រូវបានសមត្ថកិច្ចវាស់វែងយកមកអធិការដ្ឋាននគរបាលខណ្ឌច្បាអំពៅ ដើម្បីធ្វើការដោះស្រាយតាមផ្លូវច្បាប់៕
