សៀមរាប ៖ ជនសង្ស័យភេទប្រុសចំនួន ៤ នាក់ នេះនិងវត្ថុតាងរួមមានប្រភេទ គ្រឿងញៀនខុសច្បាប់ ម៉ាទឹកក ០១ កញ្ចប់តូចនិងឩបករច្នៃជក់គ្រឿងញៀនមួយចំនួនទៀត ត្រូវបានបងប្អូនប្រជាការពារ ភូមិ ឃុំ ក្នុងភូមិបុស្សធំនិងកម្លាំងប៉ុស្តិ៍នគរបាលរដ្ឋបាលឃុំខ្នារពោធិ៍ ចំណុះអធិការដ្ឋាននគរបាលស្រុកសូទ្រនិគមន៍ខេត្តសៀមរាបធ្វើការចាប់ឃាត់ខ្លួននិងដកហូតបាននូវវត្ថុតាងទាំងអស់នេះកាលពីថ្ងៃទី២៧ ខែ កក្តដា ឆ្នាំ២០១៤ កន្លងទៅរួចបញ្ជូនមកឲ្យកម្លាំងជំនាញនៃការិការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបដើម្បីធ្វើការសួនាំបន្ត ជាប់ពាក់ព័ន្ធក្នុងករណីប្រើប្រាស់និងចាត់ចែងអោយប្រើប្រាស់នូវសារធាតុញៀនខុសច្បាប់ ។ 
ដោយឡែកជនសង្ស័យភេទប្រុសចំនួន៣នាក់នេះវិញក៏ត្រូវបានកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប សហការណ៍ជាមួយកម្លាំងប៉ុស្តិ៍នគរបាលរដ្ឋបាលសង្កាត់សាលាកំរើក និង កម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម ក្រុងសៀមរាប ធ្វើការតាមដានស្រាវជ្រាវនិងឃានដល់ការចាប់ឃាត់ខ្លួនជនសង្ស័យទាំង៣នាក់នេះបានកាលពីថ្ងៃទី២៧ ខែ កក្តដា ឆ្នាំ២០១៤ កន្លងទៅរួចយកមកកាន់ការិយាល័យនគរបាលជំនាញដើម្បីធ្វើការសួនាំក្នុងករណីប្រើប្រាស់នូវសារធាតុញៀនខុសច្បាប់ ផងដែរ។
លោកវរសេនីយ៍ឯក អ៊ុំ អមរា ស្នងការរងនិងជាប្រធានការិយាល័យកណ្តាលនគរ បាលប្រឆាំងបទល្មើសនិងលោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ផងនោះ ។
ជាក់ស្តែងបន្ទាប់ពីសមត្ថកិច្ចខាងលើបានសហការណ៍គ្នាធ្វើការចាប់ឃាត់ខ្លួននិងដកហូតបាននូវវត្ថុតាងពីជនសង្ស័យទាំងអស់បានហើយនោះនៅមុខសមត្ថកិច្ចជនសង្ស័យបានឆ្លើយសារភាពថាពួកគេពិតជាបានប្រព្រត្តឹនៅករណីខាងលើពិតប្រាកដមែន ។ បច្ចុប្បន្នជនសង្ស័យភេទប្រុសចំនួន ៤ នាក់និងវត្ថុតាងដែលជាប់ពាក់ព័ន្ធក្នុងករណីប្រើប្រាស់និងចាត់ចែងអោយប្រើប្រាស់នូវសារធាតុញៀនខុសច្បាប់ ព្រមទាំងជនសង្ស័យភេទប្រុសចំនួន ៣ នាក់ទៀតជាប់ពាក់ព័ន្ធក្នុងករណីប្រើប្រាស់ នូវសារធាតុញៀនខុសច្បាប់ ត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបរួមគ្នាហើយកាលពីព្រឹកថ្ងៃទី២៩ខែកក្តដាឆ្នាំ២០១៤នេះដើម្បីចំណាត់ការទៅតាមនិតិវិធីបន្ត ៕ ខេង ខេមរា
