ភ្នំពេញ ៖ បុរសម្នាក់បានស្លាប់យ៉ាងអាណោចអាធ័ម និង៣នាក់ទៀតរងរបួសធ្ងន់ស្រាល ខណៈដែលម៉ូតូសង់ឌ្រីមC125 ២គ្រឿងបុកគ្នាពេញទំហឹងបណ្ដាលអោយបុរសរងគ្រោះដួលបោកផ្ទប់ និងថ្នល់បែកក្បាលហូរឈាមស្លាប់ភ្លាមៗនៅនិងកន្លែង។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៨និង៤៥នាទីយប់ថ្ងៃទី២០ខែកុម្ភៈឆ្នាំ ២០១៤ នៅត្រង់ចំណុចមុខសាលាវិទ្យាល័យ ជាស៊ីម សាមគ្គី តាមបណ្តោយផ្លូវលេខ២៧១ ស្ថិតក្នុងភូមិបឹងសាឡាង សង្កាត់បឹងសាឡាង ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញ គេបានឃើញបុរស២នាក់ជិះម៉ូតូម៉ាកសង់ឌ្រីមC125 មួយគ្រឿងពណ៌ខ្មៅ ស៊េរី២០០៩ ពាក់ស្លាកលេខ ភ្នំពេញ 1AT-6560 ជិះក្នុងល្បឿនលឿនពីទិសដៅកើតទៅលិច ខណៈមកដល់ចំណុចមុខវិទ្យាល័យ ជាស៊ីម សាមគ្គី ក៏បានជ្រុលទៅបុកនិងម៉ូតូមួយគ្រឿងម៉ាកសង់ឌ្រីមC125 ស៊េរី២០១០ ពណ៌ខ្មៅ ពាក់ស្លាកលេខ ភ្នំពេញ 2AT-8866 ជិះដោយបុរស២នាក់ ក្នុងទិសដៅច្រាស់គ្នា ចំពេញទំហឹងលាន់ដូចរន្ធះ បណ្ដាលអោយបុរសម្នាក់ដួលបោកក្បាលផ្ទប់និងថ្នល់បែកក្បាលហូរឈាមស្លាប់ភ្លាមៗនៅនិង កន្លែងកើតហេតុ ចំណែកបុរស៣នាក់ទៀតរងរបួសធ្ងន់២នាក់និងស្រាលម្នាក់ហើយត្រូវបាន រថយន្តសាមុយមន្ទីរពេទ្យឯកជនដឹកយកទៅសង្គ្រោះភ្លាមៗផងដែរ។
ជនរងគ្រោះដែលស្លាប់នៅនិងកន្លែងមានឈ្មោះ ហន ហឹង អាយុ២៨ឆ្នាំមុខរបរលក់ខោអាវជជុះ មានទីលំនៅភូមិច្រេស ឃុំច្រេស ស្រុកមេសាង ខេត្តព្រៃវែង។
ចំណែកជនរងគ្រោះ ដែលរងរបួសធ្ងន់២នាក់ ស្រាលម្នាក់មិនទាន់ស្គាល់អត្តសញ្ញាណនៅឡើយទេ។ ក្រោយពេលកើតហេតុសមត្ថកិច្ចជំនាញចរាចរបានចុះមកធ្វើការវាស់វែង និងប្រគល់សព ជនរងគ្រោះ ជូនទៅក្រុមគ្រួសារដើម្បីរៀបចំធ្វើបុណ្យតាមប្រពៃណី ចំណែកម៉ូតូទាំង២គ្រឿង ត្រូវបានយកទៅរក្សាទុកនៅការិយាល័យចរាចរជើងគោកស្នងការរាជធានីភ្នំពេញរង់ចាំ ធ្វើការដោះស្រាយតាមនីតិវិធីច្បាប់៕ 
