កំពង់ចាម: គម្រោងមូលនិធិឃុំ-សង្កាត់ ឆ្នាំ២០២១ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ក្នុងការស្ថាបនាហេដ្ឋារចនាសម្ពន្ធ័ក្នុងភូមិសាស្ត្រស្រុកស្ទឹងត្រង់ ចំនួន៧គម្រោង ត្រូវបានដាក់ឲ្យដេញថ្លៃ នាព្រឹកថ្ងៃទី២ ខែកក្កដា ឆ្នាំ២០២១ ក្រោមវត្តមាន លោកឡី មិច នាយករងរដ្ឋបាលសាលាខេត្តកំពង់ចាម លោកទុន នេត អភិបាលស្រុកស្ទឹងត្រង់ ដោយមានការចូលរួមពីគណៈកម្មការលទ្ធកម្ម ក្រុមការងារសម្របសម្រួលខេត្ត និងស្រុក ព្រមទាំងតំណាងក្រុមហ៊ុន ទទួលការ ជាច្រើនរូបផងដែរ។
លោកទុន នេត បានលេីកឡេីងថា ទោះស្ថិតក្នុងបរិបទកូវីដ-១៩ ស្រុកស្ទឹងត្រង់ នៅតែបន្តធ្វើការអភិវឌ្ឍន៍ ជាក់ស្ដែងថ្ងៃនេះ គម្រោងមូលនិធិឃុំចំនួន៧គម្រោងត្រូវបានដាក់ឲ្យដេញថ្លៃដើម្បីអនុវត្តការងារសាងសង់ ក្នុងនោះមាន ៖ ១-ឃុំខ្ពបតាងួន សាងសង់ផ្លូវបេតុងអាមេ ប្រវែង ០.៥៧៦ គ.ម ទទឹង៤ម កម្រាស់០.១៥ម នៅភូមិ ឈើទើ ។
២-ឃុំពាមកោះស្នា ស្តារអូរក្របៅ ប្រវែង ០.៥០០ គ.ម ទទឹងមធ្យម ៤៧.១៤ម ជម្រៅ១.៨ម នៅភូមិ កោះកណ្តាល ភូមិស្រែសង្កែ ។
៣-ឃុំពាមកោះស្នា សាងសង់ផ្លូវបេតុងអាមេ ប្រវែង ០.២០០ គ.ម ទទឹង៤ម នៅភូមិ កោះកណ្តាល ភូមិស្រែសង្កែ ។
៤-ឃុំព្រែកកក់ សាងសង់ផ្លូវបេតុងអាមេ ប្រវែង ០.៩៨១ គ.ម ទទឹង៤ម នៅភូមិ អូរប្រាំទី២ និងអូរប្រាំទី១ ។
៥-ឃុំព្រះអណ្តូង សាងសង់ផ្លូវបេតុងអាមេ ប្រវែង ០.២៧៧គ.ម ទទឹង៤ម នៅភូមិព្រែកស្តី ។
៦-ឃុំមេសជ្រៃ សាងសង់ផ្លូវបេតុងអាមេ ប្រវែង ០.៥១៧គ.ម ទទឹង៥ម នៅភូមិ អូរបេង និងត្រពាំងឈូក។
៧-ឃុំសូភាស សាងសង់ផ្លូវបេតុងអាមេ ប្រវែង ០.៥០០ គ.ម ទទឹង៤ម នៅភូមិ សូភាស និងភូមិអង្ភោល ។
ជាមួយគ្នានោះ លោក ឡី មិច នាយករងរដ្ឋបាលខេត្ត បានសំណូមពរដល់បងប្អូនជាអ្នកទទួលការទាំងអស់ ឲ្យចូលរួមជាមួយអាជ្ញាធរ ដេីម្បីបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ ព្រមទាំងថ្លែងអំណរគុណចំពោះអាជ្ញាធរស្រុកជើងព្រៃ ដែលបានរៀបចំការដេញថ្លៃនេះ ឲ្យមានសណ្ដាប់ធ្នាប់ និងរបៀបរៀបរយផងដែរ ៕
