កណ្តាល ៖ បុរសពីរនាក់ឈរឈ្លោះប្រកែកគ្នារឿងព្រុំដី ដ៏តានតឹងបណ្តាលឲ្យបុរសម្នាក់គាំងបេះដូងដាច់ខ្យល់ស្លាប់ភ្លាមៗនៅនឹងកន្លែងកើតហេតុ ។ ហេតុការណ៍ភ្ញាក់ផ្អើលនេះកើតឡើងនៅវេលាម៉ោង១២ថ្ងៃត្រង់ថ្ងៃទី២១ ខែសីហា ឆ្នាំ២០១៤ ស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ។
ប៉ូលិសប៉ុស្តិ៍រដ្ឋបាលឃុំសំរោងធំបានបញ្ជាក់ថាជនរងគ្រោះឈ្មោះ យិន សេង ភេទប្រុស អាយុ៧៤ឆ្នាំ មុខរបរកសិករ មានទីលំនៅភូមិព្រែកតាកែវ ឃុំសំរោងធំ ស្រុកកៀនស្វាយ ។ ចំណែកភាគីទំនាស់ម្ខាងទៀតឈ្មោះ ពឹង ទ្រី ភេទប្រុស អាយុ៦៤ឆ្នាំ មុខរបរកសិករ រស់នៅភូមិ-ឃុំជាមួយគ្នា ។
ដើម្បីហេតុបណ្តាលឲ្យមានមនុស្សស្លាប់គឺការវាស់វែងព្រុំដីដើម្បីធ្វើរបងដោយមានការចូលរួមពីសំណាក់អាជ្ញាធរភូមិ-ឃុំផងដែរ តែភាគីម្ចាស់ដីដែលមានព្រុំដីជាប់គ្នានៅតែបង្កជម្លោះដណ្តើមយកត្រូវរៀងៗខ្លូនទើបធ្វើឲ្យបុរសវ័យ៧៤ឆ្នាំម្នាក់គាំងបេះដូងស្លាប់តែម្តង ។ ក្នុងពេលនោះប្រពន្ធជនរងគ្រោះបានដាក់ពាក្យបណ្តឹងទៅប៉ូលិសមូលដ្ឋានផងដែរ ។ ប៉ុន្តែក្នុងករណីនេះមិនត្រូវបានសមត្ថកិច្ច និងប្រព័ន្ធតុលាការខេត្តកណ្តាល មានបន្ទុកណាមួយចោទប្រកាន់ទៅភាគីម្ខាងទៀតបានឡើយ ។ ព្រោះរឿងជម្លោះពាក្យសំដីដោយភាគីទាំងនោះប្រើប្រាស់ឧបករណ៍ណាមួយទៅលើ រាង្គកាយជនរងគ្រោះនោះទេ ។
តែទោះជាយ៉ាងណាក៏ដោយសមត្ថកិច្ចប៉ូលិសស្រុកកៀនស្វាយត្រូវតែចុះត្រួតពិនិត្យសព និងចងក្រងឯកសារជាក់លាក់សម្រាប់ជាតឹកតាង ។ នៅក្នុងថ្ងៃកើតហេតុនោះផងដែរ មន្ត្រីជំនាញផ្អែកកោសល្យវិច័យស្រុក ខេត្តកណ្តាល បានចុះទៅត្រួតពិនិត្យសព ដោយបញ្ជាក់អះអាងថាជនរងគ្រោះឈ្មោះ យិន សេង មានជម្ងឺលើសឈាម នៅពេលមានកំហឹងផ្ទុះឡើងធ្វើឲ្យឈាមបុកឡើងឈរទៅរកការគាំងបេះដូងស្លាប់តែម្តង ៕
