ភ្នំពេញ៖ បុរសចំណាស់ម្នាក់ជាមេខ្យល់នាំពលករស្លូតត្រង់ទៅធ្វើការងារនៅប្រទេសថៃដោយ ខុស ច្បាប់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីថ្ងៃទី២៥ ខែកុម្ភះ ឆ្នាំ២០១៤ ឃុំខ្លួនដាក់ពន្ឋនាគារបណ្តោះអាសន្ន ក្រោមការចោទប្រកាន់ពីការនាំចេញមិនស្របច្បាប់ដោយមាន គោលដៅ។
បុរសជាមេខ្យល់រូបនេះឈ្មោះ ហាយ សេង អាយុ៥០ឆ្នាំ ត្រូវបានកម្លាំង សមត្ថកិច្ចនគរបាល ការិយាល័យប្រឆាំងការជួញដូរមនុស្សនិងការពារអនិតិជនរាជធានីភ្នំពេញ ឃាត់ខ្លួនកាលពីថ្ងៃទី២២ ខែកុម្ភះ ឆ្នាំ២០១៤ នៅចំណុចផ្សារដើមគ ខណ្ឌទួលគោក ខណៈបម្រុងដឹកពលករចំនួន ១៥នាក់តាមរថយន្តតាក់ស៊ីឆ្លងដែនទៅប្រទេសថៃដោយខុសច្បាប់ តាមព្រំដែនក្រុងប៉ោយប៉ែត ខេត្តបន្ទាយមានជ័យ ។
ប្រភពពីមន្ត្រីតុលាការបានឲ្យដឹងថា នគរបាលមូលដ្នានផ្សារដើមគ បានឃើញមនុស្ស ប្រុសស្រីមួយក្រុមមានបង្វិចខោអាវសំពីងសំពោងនៅបេនឡានមុខអតីតរោងភាពយន្តចេនឡា ដែលបំរុង ឡើងរថយន្តឈ្នួលទៅកាន់ព្រំដែន ក្រុងប៉ោយប៉ែត ខេត្តបន្ទាយមានជ័យ ដោយមានការសង្ស័យ សមត្ថកិច្ចមូលដ្ឋានក៏រាយការណ៍ទៅការិយាល័យជំនាញ ដើម្បីឲ្យទៅធ្វើការត្រួតពិនិត្យ។
ក្រោយការសាកសួរ ទើបដឹងថាមនុស្សប្រុសស្រីទាំង១៥នាក់នេះ មកពីស្រុកភូមិផ្សេងគ្នាតាមបណ្តាខេត្ត ដែលត្រូវមេខ្យល់ឈ្មោះហាយ សេង នាំទៅធ្វើការនៅរោងចក្រផលិតស្ករស ហើយពួកគេក៏ពុំមានលិខិតឆ្លងដែនដែរគឺធ្វើដំណើរតាមច្រករបៀង នៅប្រទេសថៃ ដោយមេខ្យល់ទាមទារ ប្រាក់ក្នុងម្នាក់ៗ ១៥០ដុល្លារ។ ប៉ុន្តែទាល់តែទៅដល់ប្រទេសថៃទើបប្រគល់ប្រាក់។
ដូច្នេះ សមត្ថកិច្ចបានអប់រំមនុស្សប្រុសស្រីទាំង១៥នាក់នេះ ហើយឱ្យត្រឡប់ទៅកាន់ទីលំនៅវិញ រួចបញ្ជូនឈ្មោះ ហាយ សេង មកតុលាការដើម្បីចាត់ ការតាមច្បាប់តែម្តង៕ 
