មណ្ឌលគិរី៖ ដើមឈើដង់ជ័រជាច្រើនដើមត្រូវបានគេកាប់ផ្ដួលរំលំយ៉ាងរង្គាលនៅភូមិពូគង់់ឃុំស្រែព្រះស្រុកកែវសីម៉ា។ជនជាតិដើមភាគតិចរស់នៅមូលដ្ឋាននេះនិយាយថា ពួកគាត់កំពុងប្រឈមនឹងបញ្ហាមួយចំនួន ដូចជា ការបាត់បង់ប្រពៃណីវប្បធម៌ បាត់បង់មុខរបរដែលអាស្រ័យផលពីធនធានធម្មជាតិ ដូចជា បោចវល្លិ រកជ័រទឹក ជ័រច្បោះ និងជាពិសេស បាត់បង់នូវកម្មសិទ្ធិសមូហភាព ឬ ដីបញ្ចុះសព ជាដីព្រៃដំណមអារក្ស ។
លោក ទ្រឺម ធើម ប្រធានសហគមន៍ដីព្រៃជនជាតិដើមភាគតិចព្នងភូមិ ពូគង់ រៀបរាប់ថា ក្រុមហ៊ុនប៊ិនភឿក១ ដែលជាក្រុមហ៊ុនរបស់លោក ឧញ្ញ៉ា អុល កំពុងបន្តឈូសឆាយដីព្រៃរបស់ពួកគាត់ និងព្រៃដំណមអារក្ស ត្រង់ចំណុច ជ្រោះអូរកូនព្រះ ដែលជាកន្លែងជនជាតិដើមគោរពបូជា
ព្រមទាំងកាប់រំលំដើមឈើដងជ័រជាច្រើនដើម ធ្វើអោយប៉ះពាល់ដល់ជីវភាពរស់នៅប្រចាំថ្ងៃពួកគាត់យ៉ាងខ្លាំង ដែលរំពឹងដោយការអាស្រ័យផលពី ព្រៃឈើទាំងនេះ។គាត់បន្តថា កន្លងមកពួកគាត់ក៏ធ្លាប់ស្វែងរកសុំអត្តរាគមន៍ពីអជ្ញាធរមូលដ្ឋាននិងអង្គការនា នា រហូតដល់អាជ្ញាធរខេត្ត ប៉ុន្តែមិនបានទទួលចំណាត់ការណាមួយទេ រហូតដល់ពេលនេះ៕
