បណ្តាមេដឹកនាំកំពូលៗ មកពីតំបន់អាស៊ី និងអឺរ៉ុប នឹងចាប់ផ្តើមនូវកិច្ចប្រជុំកំពូល របស់ពួក គេនៅថ្ងៃព្រហស្បតិ៍ ទី១៦ ខែតុលា ឆ្នាំ២០១៤ នេះ នៅទីក្រុង មីឡាន ប្រទេស អ៊ីតាលី ដោយស្ថិតក្នុង គោលដៅប្តេជ្ញាជំរុញការអភិវឌ្ឍវិស័យសេដ្ឋកិច្ច និង វិស័យចម្បងៗ ផ្សេងៗទៀត ឲ្យបានខ្លាំងក្លាជាង មុនរវាងតំបន់ទាំងពីរ ។
ទីភ្នាក់ងារព័ត៌មានក្យូដូ បានចេញផ្សាយ នៅថ្ងៃព្រហស្បតិ៍ នេះទៀតថា លោកនាយករដ្ឋមន្ត្រី ជប៉ុន ស៊ីហ្សូ អាបេ បានដឹកនាំគណប្រតិភូ ទៅចូលរួមកិច្ចប្រជុំ ដែលមានរយៈពីរថ្ងៃខាងលើនេះ ដើម្បីបង្ហាញ ពីគោលនយោបាយសេដ្ឋកិច្ចថ្មីរបស់ជប៉ុន ដែលលោកបានតាក់តែងឡើង សម្រាប់ប្រទេសសេដ្ឋកិច្ចធំ ជាងគេលំដាប់ទី ៣លើពិភពលោកមួយនេះ ក្រោយពីរូបលោក ឡើងកាន់តំណែងកាលពីខែធ្នូ ឆ្នាំ ២០១២ មក ។
ចំពោះកិច្ចប្រជុំ អាស៊ី-អឺរ៉ុប ឬASEM ក៏នឹងលើកយកបញ្ហាប្រឈម នៅក្នុងសកលលោកមក ពិភាក្សាផង ដែរ ដូចជាបញ្ហារីករាលដាលនៃជំងឺ Ebola ដ៏កាចសាហាវ, និង បញ្ហាដែលបង្កឡើង ក្រុមសកម្មប្រយុទ្ធ បំបែករដ្ឋមួយចំនួន នៅតំបន់មជ្ឈិមបូព៌ាថែមទៀត ។ ដោយឡែក សម្រាប់ជំហរប្រទេសជប៉ុន ចំពោះ បញ្ហាភាគខាងកើត អ៊ុយក្រែន ដែលមានរុស្ស៊ី និងរដ្ឋាភិបាលអ៊ុយក្រែន កំពុងប្រឈមមុខដាក់គ្នានោះ ជប៉ុននៅតែបង្ហាញជំហរជាកណ្តាល ដោយគាំទ្រឲ្យមានកិច្ចពិភាក្សា ដោះស្រាយបញ្ហា ដោយសន្តិវិធី រវាងភាគីជម្លោះ ។
គួរបញ្ជាក់ថា ស្ថិតនៅក្នុងផ្នែកផ្សេងនៃកិច្ចប្រជុំ លោកនាយករដ្ឋមន្ត្រីជប៉ុន ក៏គ្រោងនឹងជួប ពិភាក្សាផង ដែរ ជាមួយនឹងលោកប្រធានាធិបតីចិន ស៊ី ជិនពីង, លោកស្រីប្រធានាធីបតី កូរ៉េខាងត្បូង ផាក គឺនហេ, និង បណ្តាមេដឹកនាំប្រទេសអាស៊ានមួយចំនួនទៀត ដូចជាថៃ និង វៀតណាមជាដើម ៕
