រាជធានីភ្នំពេញ ៖ បុរសម្នាក់ស្លាប់យ៉ាងអាណោចអាធ័មនៅនិងកន្លែងនិងម្នាក់ទៀតធ្លាយពោះវៀនរងរបួសធ្ងន់បន្ទាប់ពីជនរងគ្រោះទាំង២នាក់ជិះម៉ូតូម៉ាកស៊ុយស៊ូគីនិចមួយគ្រឿង ហើយត្រូវរថយន្តកូរ៉េមួយតោនកន្លះបុកចំពេញទំហឹងប៉ើងធ្លាក់ពីលើថ្នល់ចូលអូរក្បែរចិញ្ចើមផ្លូវ កាលពីវេលាម៉ោង
១១និង៣៥នាទីយប់ថ្ងៃទី១២ខែមីនាឆ្នាំ២០១៤ តាមបណ្តោយផ្លូវជាតិលេខ០៣ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរស០២នាក់ជិះម៉ូតូមួយគ្រឿងម៉ាកស៊ុយស៊ូគីនិក ពណ៌ក្រហមលាយខ្មៅ ពាក់ស្លាកលេខ ភ្នំពេញ 1CA-8157 ធ្វើដំណើរតាមបណ្តោយផ្លូវជាតិលេខ០៣ ទិសដៅពីជើងទៅត្បូង ស្រាប់តែមកដល់ចំណុចកើតហេតុក្បែរសួនឧស្សាហកម្មវឌ្ឍនៈ២ ក៏មានរថយន្តកូរ៉េមួយតោនកន្លះ ពណ៌ខៀវ មិនស្គាល់ស្លាកលេខ ធ្វើដំណើរស្របទិសគ្នាជាមួយម៉ូតូ បើកយ៉ាងលឿនមកបុកម៉ូតូស៊ុយស៊ូគីនិចអូសជនរងគ្រោះធ្លាក់ផ្លូវខាងឆ្វេងបណ្តាលឱ្យស្លាប់ម្នាក់នៅនិងកន្លែង និងម្នាក់ទៀតធ្លាយពោះវៀនរបួសធ្ងន់ ត្រូវបានរថយន្តសាមុយមន្ទីរពេទ្យឯកជនដឹងទៅសង្គ្រោះភ្លាមៗនៅមន្ទីរពេទ្យ។ ចំណែករថយន្តបង្កបន្ទាប់ពីបង្កហេតុរួចក៏បានបើករត់គេចបាត់ស្រមោលតែម្តង។
ក្រោយពេលកើតហេតុសមត្ថកិច្ចបានចុះមកអន្តរាគមន៍ និងកំពុងស្រាវជ្រាវស្វែងរកគ្រួសារជនរងគ្រោះដើម្បីមកទទួលយកសពយកទៅធ្វើបុណ្យតាមប្រពៃណី ព្រោះនៅកន្លែងកើតហេតុជនរងគ្រោះមិនមានអ្វីសំគាល់អត្តសញ្ញាណនោះទេ៕
