បាត់ដំបង: អស់រយ:ពេលជាយូរមកហើយដែលព័ត៌មានរឿងកូនភ្លោះចំនួន3នាក់ត្រូវបានស្ងប់ស្ងាត់ប៉ុន្តែនៅពេលនេះក៏ស្រាប់តែបានប្រសូត្រឡើងនៅក្នុងគ្រួសារដ៏លំបាកមួយស្ថិតក្នុងភូមិនរា1 ឃុំនរា ស្រុកសង្កែ ខេត្តបាត់ដំបង កាលពីថ្ងៃទី26-1-15 វេលាម៉ោង4,40នាទីល្ងាច ដែលកូនភ្លោះ ទាំង3នាក់នេះសុទ្ធតែស្រីទាំងអស់ ។
ទារិការទាំង3នាក់នេះគឺបានកើតឡើងនៅក្នុងត្រកូលរបស់លោក ហាំ មូសើ អាយុ41ឆ្នាំ ដែលមានមុខរបរជាគ្រូបង្រៀនផ្នែកសាសនានៅក្នុងសមាគមប្រភពល្អកម្ពុជា និងជាជនជាតិខ្មែរ អ៊ីស្លាម និងអ្នកស្រី អែល អាហ្វីយ៉ាន អាយុ33ឆ្នាំ ជាមេផ្ទះនៅភូមិនរា1 ។ ស្ថិតក្នុងសភាពដ៏លំបាកលំបិនបុរសជាឪពុកបានរៀបរាប់ថា កន្លងមកលោកនិងភរិយារបស់លោកធ្លាប់មានកូនចំនួន3នាក់រួចមកហើយដោយក្នុងនោះគឺកូនប្រុសពីរនិងស្រីមួយ លុះដល់ពេល ដែលប្រពន្ធរបស់លោកចាប់ផ្តើមមានផ្ទៃពោះជាលើកទី4នេះវាហាក់ដូចជាខុសពីមុនៗព្រោះពេលចាប់ ផ្តើមទម្ងន់ភ្លាមរហូតដល់6ខែគឺមានការចាញ់ខ្លាំងមែនទែនញុាំអ្វីក៏មិនសូវបានដែរ ប៉ុន្តែក្រោយពី 6ខែនោះមកគឺបាត់ចាញ់តែចាប់ផ្តើមហើមជើងវិញម្តងរហូតមានការពិបាកក្នុងការដើរលុះត្រាតែគ្រាហ៍ ទើបអាចដើរបាន ។ លោកបានបន្តទៀតថា នៅពេលគ្រប់ខែដែលត្រូវសំរាលកូនលោកក៏បានបញ្ជូនទៅកាន់ មន្ទីរពេទ្យឯកជនមួយដែលនៅជិតដោយសារតែភរិយាមានសភាពឈឺពោះខ្លាំងពេក ហើយពេលនោះ ក្រុមគ្រូពេទ្យបានសំរេចធ្វើការវះកាត់ក្រោយពេលឆ្លុះពិនិត្យមើលដោយសារតែកូនទាំងអស់នេះមិនអាចកើតបានឯរូបលោកក៏យល់ព្រម នៅទីបំផុតកូនរបស់លោកចំនួន3នាក់ត្រូវបានកើតឡើងដំណាលៗគ្នា ហើយសុទ្ធស្រីទាំងអស់ ដោយកូនច្បងមានទម្ងន់2kgចំណែកកូនទីពីរមានទម្ងន់1,9kgនិងកូនពៅ មានទម្ងន់1,5kg ប៉ុន្តែបើទោះបីជាកូនរបស់លោកកើតមកម្តង3នាក់ក៏ដោយក៏សុខភាពរបស់ពួកគេ មានលក្ខណ:ល្អជាធម្មតាពុំមានសភាពទន់ខ្សោយឡើយ ដោយឡែកម្តាយវាគឺនៅមានសភាពទ្រុឌទ្រោម មិនទាន់ចេញពីមន្ទីពេទ្យនោះទេព្រោះស្នាមនៃការវះកាត់មិនទាន់ជាសះស្បើយនៅឡើយ ។ ស្ថិតក្នុងសភាពដ៏លំបាកដែលសំរាលកូន4លើកបានកូនរហូតដល់6នាក់នេះ និង តាមរយ:កម្ពុជាថ្មី លោកហាំ មូសើ បានលើកដៃបួងសួងព្រមទាំងបានពោលថា កន្លងមកលោកតែងតែសង្គេតឃើញសម្តេចអគ្គមហាសេនាបតីតេជោ ហ៊ុន សែន ព្រមទាំងសម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន មានចិត្តមេត្តា ករុណាដល់ប្រជាពលរដ្ឋគ្រប់ស្រទាប់វណ្ណ:ដែលជួបប្រទះនឹងបញ្ហាផ្សេងៗដូចជាគ្រោះធម្មជាតិជាដើម ពិសេសប្រជាពលរដ្ឋណាដែលមានកូនភ្លោះចំនួន3នាក់គឺសម្តេចទាំងពីរតែងតែយកចិត្តទុកដាក់ និងប្រោសប្រទានជាអំណោយផ្សេងៗដើម្បីជួយសំរាលដល់ជីវភាពបានមួយកំរិតដូច្នេះនៅពេលនេះក្រុមគ្រួសាររបស់លោកក៏ត្រូវប្រឈមមុខនឹងបញ្ហាទាំងនេះដែរទីមួយគឺកូនក្នុងបន្ទុក កាន់តែមានកំណើនទ្វេដង និងទីពីរភរិយារបស់លោកត្រូវធ្វើការវះកាត់ដើម្បីអោយកូនស្រីទាំង3នាក់បានឃើញពន្លឺថ្ងៃដូចមនុស្សដទៃទៀតដែរ ព្រមទាំងកំពុងសំរាកព្យាបាលនៅឡើយ ដូច្នេះសុំអោយសម្តេចទាំងពីរមេត្តា ករុណាដល់ក្រុមគ្រួសាររបស់លោកផង ។ ជាចុងក្រោយលោកបានសង្កត់ធ្ងន់ថា សព្វថ្ងៃក្រុមគ្រួសាររបស់លោកដែលរស់រានមានជីវិត ដោយឆ្លងផុតពីរបបប្រល័យពូជសាសន៍គឺលោកមិនភ្លេចទេនូវគុណូបការ:ដ៏ជ្រាលជ្រៅរបស់សម្តេចដែលបានធ្វើការតស៊ូប្រឆាំងនឹងរបបនេះអោយប្រជាពលរដ្ឋគ្រប់រូបបានរស់សារជាថ្មី ៕
