ខេត្តស្ទឹងត្រែង៖ ដឹងហើយឮហើយថាគ្រឿងញៀនជាអំពើខុសច្បាប់ គួរតែដើរចេញឲ្យឆ្ងាយតែបុរសម្នាក់នេះ បែជាដើររកគុកដោយខ្លួនឯង ព្រោះតែរឿងគ្រឿងញៀន១៨គ្រាប់ ត្រូវបានកម្លាំងនគរការយាល័យប្រឆាំងគ្រឿងញៀនខេត្តស្ទឹងត្រែង ធ្វើការចាប់ឃាត់ខ្លួន ខណដែលជនសង្ស័យកំពុងធ្វើសកម្មភាព។
ការចុះបង្ក្រាប និងចាប់ខ្លួនជនសង្ស័យខាងលើ បានធ្វើឡើងកាលពីវេលាម៉ោង១៨ និង២០នាទីព្រលប់ ថ្ងៃទី០៩ខែកម្ភៈឆ្នាំ២០១៥ ស្ថិតក្នុងភូមិស្រែឬស្សី ឃុំស្រែឬស្សី ស្រុកថាឡាបរិវ៉ាត់/ខេត្តស្ទឹងត្រែង។
លោកវរៈសេនីយ៏ទោនូ ហ៊ួរ នាយការិយាល័យនគរបាលប្រឆាំងគ្រឿងញៀនខេត្តបានឲ្យដឹងថា ជនសង្ស័យដែលត្រូវឃាត់ខ្លួននោះ មានឈ្មោះវ៉ន វិនណា ភេទប្រុស អាយុ៣២ឆ្នាំ មុខរបរជាងជួសជុលម៉ូតូ រស់នៅភូមិស្រែឬស្សី ឃុំស្រែឬស្សី ស្រុកថាឡាបរិវ៉ាត់ ខេត្តស្ទឹងត្រែង។
លោកវរៈសេនីយ៍ទោបាបន្តថាជនសង្ស័យខាងលើគឺជាមុខសញ្ញាដែលសមត្ថកិច្ចតាមប្រម៉ាញ់ជាយូរមកហើយ ពេលដែលជនសង្ស័យកំពុងធ្វើសកម្មភាព សមត្ថកិច្ចបានធ្វើការខ្លួនតែម្តង។ក្រោយការឃាត់ខ្លួន សមត្ថកិច្ចបានដកហូតវត្ថុតាងថ្នាំញៀន ប្រភេទមេតំហ្វេតាមីន(WY)ចំនួន១៨គ្រាប់ រួមនិងទូរស័ព្ទមួយគ្រឿង ម៉ូតូសង់កូរ៉េមួយគ្រឿង នាំខ្លួនមកកាន់ការិយាល័យគ្រឿងញៀនធ្វើការសាកសួរ។
ជនសង្ស័យបានឆ្លើយសារភាពចំពោះមុខសមត្ថកិច្ចថា ខ្លួនបានទិញពីគេម្នាក់ទៀតមិនស្គាល់ឈ្មោះក្នុងមួយគ្រាប់២២៥០០រៀល យកទៅលក់បាន៣០០០០រៀល តែកំពុងជិះមូតូធ្វើសកម្មភាក៏ត្រូវបានសមត្ថកិច្ចឃាត់ខ្លួនតែម្តង។គ្រឿងញៀនត្រូវបានធ្វើតេស្ត ចំពោះមុខជនសង្ស័យ និងមានការចូលរួមពីលោកជា ពេជ្រ ព្រះរាជអាជ្ញាររងសាលាដំបូងខេត្ត ថាពិតជាមានសារធាតុញៀនពិតប្រាកដមែន។
លោកនាយការិយាល័យបានបន្តថា ជនសង្ស័យឈ្មោះវ៉ន វិនណា រួមជាមួយវត្ថុតាងថ្នាំញៀន ត្រូវបានកសាងសំណុំរឿង បញ្ជូនទៅកាន់តុលាការខេត្ត នៅរសៀលថ្ងៃទី១០នេះដើម្បីចាត់ការបន្ត។ លោកនាយការិយាល័យនគរបាល ប្រឆាំងគ្រឿងញៀនថា គ្រឿងញៀនគឺជាអំពើខុសច្បាប់ មិនថាតិចឬច្រើននោះទេ បើមិនដើរជៀសអោយឆ្ងាយ លោកនឹងបន្តរកជនពាក់ព័ន្ធផ្សេងទៀត ដើម្បីចាត់ការតាមផ្លូវច្បាប់ផងដែរ៕