ខេត្តព្រះសីហនុ ៖ ព្រឹកថ្ងៃទី១៣ ខែកុម្ភះ ឆ្នាំ២០១៥ សាលាពន្ធដារខេត្តព្រះសីហនុ សហការជាមួយរោងចក្រស្រាបៀរអង្គរ បើកសិក្ខាសាលាផ្សព្វផ្សាយ ស្តីពីកត្តព្វកិច្ចបង់ពន្ធលើប្រាក់បៀវត្ស រប់ស់និយោជិក និយោជក រោងចក្រស្រាបៀរអង្គរ ដែលមានទីតាំងនៅឃ្លាំងលើ ស្ថិតក្នុងសង្កាត់លេខ១ ក្រុង ខេត្តព្រះសីហនុ ។
លោក នុត វត្ថា ប្រធានសាខាពន្ធដារ ខេត្តព្រះសីហនុ មានប្រសាសន៌បើកសិក្ខា សាលាដោយគូសបញ្ជាក់ថា សិក្ខាសាលានាពេលនេះក្នុងគោលបំណងផ្សព្វផ្សាយ និងពន្យល់ណែនាំ ស្តីពីពន្ធលើប្រាក់បៀវត្សមន្ត្រីរាជការ និយោជិក និយោជក បានចែងក្នុងមាត្រា៤១ នៃច្បាប់ស្តីពីសារពើពន្ធ(ចសព) ប្រាក់ចំណូលបៀវត្សទាំងអស់ដែលបានទទួលពីសកម្មភាពបំរើការងារនានានៅតាមបណ្តារោងចក្រ សហគ្រាស ត្រូវជាប់ពន្ធលើប្រាក់បៀវត្ស ហៅកាត់ថា (ពបវ) ដែលជាពន្ធប្រចាំខែ ។ កថាខណ្ឌទី១ នៃមាត្រា៥២ នៃ(ចសព)បានចែងថា ពន្ធលើប្រាក់បៀវត្ស(ពបវ) គឺជាបំណុលរបស់រូបវន្ថបុគ្គលដែលបានទទួលប្រាក់បៀវត្ស ។ ប្រាក់ពន្ធនេះ ត្រូវប្រមូលតាមរបៀបកាត់ទុកជាមុនដោយនិយោជក នៅពេលបើកប្រាក់បៀវត្ស ។ កថាខណ្ឌ៨ នៃមាត្រា៤២ថ្មី នៃច្បាប់ ស្តីពីវិសោធនកម្មនៃច្បាប់ស្តីពីសារពើពន្ធ(ចវចសព)បានកំណត់យ៉ាងទូលាយនូវនិយមន័យប្រាក់បៀវត្ស ដោយក្នុងនោះមានរួមបញ្ចូលទាំងលាភការ ប្រាក់ចំណាច់ បុព្វលាភ ប្រាក់ម៉ោងបន្ថែម ប្រាក់ប៉ះប៉ូវនានា និងអត្ថប្រយោជន៌បន្ថែមដែលបានទូទាត់ឪ្យដល់និយាជិក ឬដែលបានទូទាត់ ដើម្បីជាប្រយោជន៌ផ្ទាល់ ឬប្រយោលដល់និយោជិកចំពោះការបំពេញសកម្មភាពបំរើការងាររបស់និយោជិក វៀរលែងតែការទូទាត់នានាដែលត្រូវបានលើកលែងតាមមាត្រាទី៤៣ និងមាត្រា ៤៤ នៃ(ចសព) ។
លោកបានបន្តថា រាជរដ្ឋាភិបាលកម្ពុជាបានធ្វើកំណែទម្រង់វិស័យហិរញ្ញវត្ថុ ពិសេស ច្បាប់ហិរញ្ញវត្ថុថ្មីមាត្រាទី១១ ឆ្នាំ២០១៥ អនុញ្ញាតឪ្យប្រមូលពន្ធលើប្រាក់បៀវត្សចាប់ពី ៨០០.០០០រៀលឡើងទៅ ចំណែកនិយោជិកដែលមានប្រាក់បៀវត្សក្រោម៨០០.០០០រៀលគឺត្រូវមិនបានបង់ពន្ធចូលថវិការជាតិនោះទេ ។ តាមច្បាប់ចាស់មាត្រាទី៤៧ នៃព្រះរាជក្រមលេខ នសIរកមI ០២៩៧I០៣ ចុះថ្ងៃទី២៤ ខែកុម្ភះ ឆ្នាំ១៩៩៧ ប្រកាសឪ្យប្រើច្បាប់ ស្តីពីសារពើពន្ធ លើប្រាក់បៀវត្សជាប់ពន្ធចាប់ពី ៥០០.០០០រៀលឡើង ។ តាមគោលនយោបាយកែទម្រង់ស៊ីជម្រៅរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ មន្ត្រីរាជការ និយាជក និយោជិកដែលមានប្រាក់បៀវត្សចាប់ពី ៨០០.០០០រៀលឡើង ត្រូវជាប់ពន្ធ ដើម្បីកាត់បន្ថយភាពក្រីក្រដល់មន្ត្រីរាជការ និយោជិកនៅទូទាំងប្រទេស ដើម្បីធានាបង្កើនជីវភាពគ្រួសារ ។ នៅក្នុងរោងចក្រស្រាបៀអង្គរមាននិយោជិកចំនួន ៤២១នាក់ ដែលត្រូវជាប់ពន្ធលើប្រាក់បៀវត្ស ៕ ដោយ ស៊ុយ ចាន់ធា
