ខេត្តកំពង់ឆ្នាំងនៅវេលាម៉ោង១០ និង ៣០នាទីព្រឹក ថ្ងៃទី០៦ ខែមិនា ឆ្នាំ២០១៥ នៅកំពង់ផែកាណូតផ្សារក្រោម ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង អតីតៈនគរបាលម្នាក់ បានពាក់ឯកសណ្ឋាននាយនគរបាល ថ្នាក់វរៈសេនីយត្រីក្លែងក្លាយ និង បានឆរបោកយកម៉ូតូគេមួយគ្រឿង កាលពី៥ខែមុន ភ្លេចខ្លួនចូលមកស្រុកវិញ ម្ចាស់ម៉ូតូឃើញបានចាប់វាយប៉ោងមុខ ហើយប្រគល់អោយសមត្ថកិច្ច ។
លោក ញ៉ោក ប៊ុនធី អធិការងនគរបាល ក្រុងកំពង់ឆ្នាំង បានអោយដឹងថា ជនល្មើសខាងលើនេះ មានឈ្មោះ នង ចន្តា ហៅ នង សំអឿន (ហៅ កូននាគ) អាយុ៣៩ឆ្នាំ រស់នៅភូមិដា ឃុំដា ស្រុកកំពង់លែង អតីតៈនគរបាលអន្តរាគមន៍ខេត្ត ឋានៈព្រឹនបាលឯក ត្រូវបានអង្គភាពកាត់ឈ្មោះចោល ដោយអសកម្មការងារ មិនមកធ្វើការ ។ ជនល្មើសរូបនេះ ត្រូវបានឈ្មោះ ពេញ មុនី អាយុ៣១ឆ្នាំ ប្តឹងកាលពីថ្ងៃទី៣១ ខែសីហា ឆ្នាំ២០១៤ ថា ជនល្មើសរូបនេះស្គាល់គ្នា បានខ្ចីយកម៉ូតូ០១៤មួយគ្រឿង ទៅទិញបាយហូបមួយភ្លែត ហើយក៏បានបោកយកម៉ូតូនោះ គេចខ្លួនបាត់រហូតតែម្តង ។ 
ស្រាប់តែនៅព្រឹកថ្ងៃទី០៦ ខែមិនា ឆ្នាំ២០១៥ ម្ចាស់ម៉ូតូបានឃើញគេនៅកំពង់ផែកាណូត ដរផ្សារក្រោម រូបគាត់ និង មិត្តភ័ក្រ ក៏បានព្រួតគ្នាចាប់ខ្លួនវាយ រួចហើយក៏ប្រគល់អោយសមត្ថកិច្ច ។
នៅចំពោះមុខសមត្ថកិច្ច ជនល្មើសបានសារភាពថា ឯកសណ្ឋាន និង សក្ត័នេះ គេបានធ្វើក្លែងក្លាយ ពាក់ដោយខ្លួនឯងទេ បច្ចុប្បន្នរូបគេជាជនស៊ីវិល មិនមែនជានគរបាលនោះទេ ហើយម៉ូតូដែលគេបានបោក យកពីឈ្មោះ ពេញ មុនី ត្រូវស្រីស្នេហ៍ខ្លួន បោកយកទៅបាត់ទៅហើយ និង នៅពេលចាប់ខ្លួន សមត្ថកិច្ចបានដកហូតម៉ូតូហុងដាឌ្រីម មួយគ្រឿងផ្សេងទៀត ពាក់ស្លាកលេខ នគរបាល មិនដឹងថា ម៉ូតូនេះគេបានមកពីណានោះទេ សមត្ថកិច្ចកំពុងធ្វើកាស្រាវជ្រាវ ។
ជនល្មើសរូបនេះ និង មូតូមួយគ្រឿងរបស់គេ ត្រូវបានសមត្ថកិច្ចនគរបាល ក្រុងកំពង់ឆ្នាំង កសាងសំណុំរឿង បញ្ជូនខ្លួនទៅកាន់ការិយាល័យ នគរបាលកំរិតស្រាលខេត្ត ស្រាវជ្រាវបន្ត និង កសាងសំណុំរឿងបន្ថែមតាមនិតិវិធី បញ្ជូនខ្លនទៅតុលាការខេត្ត ផ្តន្ទាទោសតាមផ្លូវច្បាប់៕
