កំពង់ឆ្នាំង៖រថយន្តឡង់គ្រីស័របុកជាមួយរថយន្តសាំយ៉ុង នៅវេលាម៉ោង៣និង១០នាទីល្ងាចថ្ងៃទី៥ ខែមិនា ឆ្នាំ២០១៥ នៅលើកំណាត់ផ្លូវជាតិលេខ៥ចន្លោះបង្គោលគីឡូម៉ែត្រលេខ១០៣និង១០៤ ត្រង់ចំណុចផ្សារជំនែកស្ថិតក្នុងភូមិថ្មកែវ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង របួសមនុស្សចាស់ប្រុសស្រីប្រមាណជា១០នាក់ ។
ប្រភពពីសមត្ថកិច្ចដែលបានចុះដល់កន្លែងកើតហេតុបាននិយាយអោយដឹងថា៖រថយន្តបង្កម៉ាកឡង់គ្រីស័រ ពណ៍សំបកឪឡឹក ពាក់ស្លាកលេខ កំពង់ចាម 2A2152 ធ្វើដំណើរពីជើងមកត្បូង បើកបរដោយឈ្មោះ ប៉ូ ចំរើន អាយុ៤២ឆ្នាំមានទីលំនៅក្នុងក្រុងភ្នំពេញ មានមុខរបជាមន្ត្រីយោធា។ ដោយឡែករថយន្តដែលរងគ្រោះម៉ាក់ សាំយ៉ុង ពណ៍ស ពាក់ស្លាកលេខ ភ្នំពេញ 2Y9512 មានដឹកអ្នកដំណើរពេញរថយន្ត ធ្វើដំណើរពីត្បូងទៅជើង បើកបរដោយឈ្មោះប៉ុក អាយុប្រមាណជា៤១ឆ្នាំ រស់នៅក្នុងភូមិកូនដំរី ខេត្តបន្ទាយមានជ័យ ដឹកប្រជាពលរដ្ឋមកពីធ្វើបុណ្យនៅភ្នំតាម៉ៅត្រឡប់ទៅផ្ទះវិញឯស្រុកកំរៀង។
បើតាមការអោយដឹងពីប្រជាពលរដ្ឋដែលបានឃើញហេតុការណ៍នេះថា៖ដំបូងពួកគាត់បានឃើញរថយន្តឡង់គ្រីស័របើកបរពីជើងទៅត្បូងក្នុងល្បឿនយ៉ាងលឿន ពេលបើកមកដល់កន្លែងកើតហេតុ បានវ៉ាក់អឺរនិងរថយន្តមួយគ្រឿងដែលបើកឆ្លងផ្លូវពីលិចមកកើតដោយស្ថានភាពកៀកពេក ហើយស្លន់ផងនោះ ទើបរថយន្តឡង់គ្រីស័រជាន់ហ្វ្រាំងតែមិនជាប់ បានរេចង្កូតមកខាងឆ្វេងដៃអូសកង់និងបានបុកជាមួយរថយន្តសាំយ៉ុងពេញទំហឹង បណ្តាលអោយអ្នកជិះក្នុងរថយន្តសាំយ៉ុងទាំងអស់បានរងរបួសធ្ងន់និងស្រាល តែពុំមានមនុស្សណាម្នាក់បានស្លាប់នោះឡើយ។
ក្រោយពេលកើតហេតុអ្នករងគ្រោះត្រូវបានបងប្អូនប្រជាពលរដ្ឋជូយហៅរថយន្តសង្គ្រោះរបស់មន្ទីពេទ្យខេត្តដឹកយកមកធ្វើការសង្គ្រោះបន្ទាន់ នៅមន្ទីពេទ្យខេត្ត ហើយអ្នកបើកបរថយន្តឡង់គ្រីស័រមិនបានរត់គេចខ្លួននោះឡើយ។ រថយន្តទាំងពីរគ្រឿងរងការខូចខាតផ្នែកខាងមុខទាំងស្រុងត្រូវបានសមត្ថកិច្ចស្ទូចយកមករក្សារទុក នៅការិយាលយ័ចរាចណ៍ផ្លូវគោកខេត្ត រង់ចាំដោះស្រាយតាមនិតិវិធីច្បាប់។ការសនិដ្ឋានជំហានដំបូងរបស់សមត្ថកិច្ចថា រថយន្តឡង់គ្រីស័របើកបរក្នុងល្បឿនលឿនក្នុងស្ថានភាពគ្រោះថ្នាក់នៅពេលជួបគ្រោះថ្នាក់ជាន់ហ្វ្រាំងមិនជាប់ បណ្តាលអោយបង្កគ្រោះថ្នាក់ដូចខាងលើនេះតែម្តង៕ រី ភារិទ្ធ
