ខេត្តព្រះសីហនុ កងរាជអាវុធហត្ថខេត្តព្រះសីហនុ ធ្វើការឃាត់ខ្លួនជនសង្ស័យប្រុស ស្រីចំនួន០៤នាក់ បន្ទាប់ពីជនសង្ស័យបង្កករណីបាញ់បោះ កាលពីវេលាម៉ោង២៣និង៣០នាទីយប់ថ្ងៃទី០៦ ខែមិនា ឆ្នាំ២០១៥ នៅចំណុចខាងមុខអាហារដ្ឋាន និងខារ៉ាអូខេសួនសុបិន្ត ស្ថិតក្រុមទី៤ ភូមិ៤ សង្កាត់លេខ៤ ក្រុងព្រះសីហនុ ។ ក្រោយពីធ្វើសកម្មភាពបាញ់បោះរួច ជនសង្ស័យនាំគ្នាជិះម៉ូតូ និងរថយន្តគេចខ្លួនអស់ លុះនៅវេលាម៉ោង ២៣និង៥០នាទី កំលាំងជំនាញកងរាជអាវុធហត្ថខេត្តព្រះសីហនុបានធ្វើការស្រាវជ្រាវតាមប្រមាញ់ និងឃាត់ខ្លួនជនសង្ស័យបានចំនួន០៤នាក់ នៅក្រុម១ ភូមិ១ សង្កាត់លេខ២ ក្រុង ខេត្តព្រះសីហនុ ដែលកំពុងបើករថយន្តចូលផ្ទះ ត្រូវកម្លាំងជំនាញកំណត់មុខសញ្ញាឃាត់ខ្លួនតែម្តង ។
លោកវរសេនីយ៌ឯក កែវ សុផល ប្រធានមន្ទីរស្រាវជ្រាវយុត្តិធម៌ និងជាមេបញ្ជារការរងកងរាជអាវុធហត្ថខេត្តព្រះសីហនុ បានឪ្យដឹងថា ដោយមានការបញ្ជារផ្ទាល់ពីលោកឧត្តមសេនីយ៌ត្រី ហេង ប៊ុនទី មេបញ្ជាកាកងរាជអាវុធហត្ថ ឪ្យកងកម្លាំងធ្វើការស្រាវជ្រាវមុខសញ្ញាបាញ់បោះសេរី ក្នុងក្រុងព្រះសីហនុ រហូតឈានទៅកំណត់មុខសញ្ញា ឈានទៅធ្វើការឃាត់ខ្លូនជនសង្ស័យប្រុស ស្រីបានចំនួន ០៤នាក់ រួមទាំងវត្ថុតាងមួយចំនួនទៀតយកមកកាន់ទីបញ្ជាការដ្ឋានកងរាជអាវុធហត្ថខេត្តព្រះសីហនុ ។
លោកវរសេនីយ៌ឯក កែវសុផល បានឪ្យដឹងបន្តថា ជនសង្ស័យទី១ឈ្មោះ ផុន ផន ភេទប្រុស កើតឆ្នាំ១៩៩០ ឋានន្តរសក្តិអនុសេនីយ៌ឯក អត្តលេខ២១១២៦២ នៅបញ្ជាការដ្ឋានអង្គរក្សស្រុកកំណើតភូមិ៣ សង្កាត់៣ ក្រុង ខេត្តព្រះសីហនុ ។ ទី២ ឈ្មោះ ឡុង ម៉ូស្កូ ភេទប្រុស អាយុ២៧ឆ្នាំ ស្រុកកំណើតសង្កាត់លេខ២ ក្រុង ខេត្ត ព្រះសីហនុ ។ ទី៣ឈ្មោះ ហង្ស ភក្តី ភេទប្រុស អាយុ២១ឆ្នាំ មុខរបរចុងភៅ មានស្រុកកំណើតសង្កាត់២ ក្រុង ខេត្តព្រះសីហនុ និងទី៤ឈ្មោះ គីម ឆេង ភេទស្រី អាយុ២៣ឆ្នាំ មុខរបរកម្មករោងចក្រ ស្រុកកំណើតភូមិ១ សង្កាត់១ក្រុង ខេត្តព្រះសីហនុ ។
វត្ថុតាងដែលដកហូតបានរួមមាន រថយន្តម៉ាក IZUZU ពណ៌ត្រេអ៊ីមួយបាំងកន្លះ០១គ្រឿង ពាក់ស្លាកលេខ ខ.ម02.2-7350 ម៉ូតូម៉ាកស៊ុយសូគីស្មាស ពណ៌ខ្មៅគ្នានស្លាកលេខ០១គ្រឿង អាវុធខ្លីម៉ាកឡុកចិន ចំនួន០២ដើម លេខ៩០២២ និងលេខ៩២៣៦ បង់ឡុកចំនួន០២ គ្រាប់ឡុកចំនួន១២គ្រាប់ សំបកផ្ទះចំនួន០៣ គ្រាប់អេស្កាទូចំនួន៨០គ្រាប់ បង់អេស្កាទូចំនួន០៣ អាវកាស
ពណ៌ចំនួន០១ ខ្សែក្រវ៉ាត់ស៊ិនណារ៉ុងពណ៌ខ្មៅចំនួន០១ ខ្មោះដៃចំនួន០១គូ ស្រោមអាវុធខ្លីចំនួន០២ កូនកាំបិតកៃចំនួន០១ វិទ្យុទាក់ទងចំនួន០១គ្រៀង មួកឧត្តមសេនីយ៌ចំនួន០១ អត្តសញ្ញាណបណ្ណ័នាយទាហានចំនួន០១សន្លឹក អត្តសញ្ញាណបណ្ណ័សញ្ជាតិខ្មែរ០១សន្លឹក លិខិតបញ្ជារបេសកកម្មចំនួន០១សន្លឹក បណ្ណ័បើកបរចំនួន០១ និងទូរសព្ទ័ដៃចំនួន ០៤គ្រឿង ។
លោក កែវ សុផល បានបញ្ជាក់ថា បច្ចុប្បន្នជនសង្ស័យចំនួន០៤នាក់ កំលាំងជំនាញកំពុងធ្វើការសាកសួរបន្ត ដើម្បីបំពេញបែបបទ ដើម្បីចាត់វិធានការទៅតាមផ្លូវច្បាប់ ។
គួរបញ្ជាក់ផងដែថា ករណីបាញ់បោះក្នុងដើមឆ្នាំ២០១៥នេះ តែងតែមានសកម្មភាពជាបន្តបន្ទាប់បង្កដោយជនបរទេស ដែលធ្វើឪ្យប្រជាពលរដ្ឋរស់នៅក្នុងក្រុងព្រះសីហនុមានការភ័យក្លាច និងសូមឪ្យអាជ្ញាធរ មានសមត្ថកិច្ចទប់ស្កាត់ បង្ក្រាបជនបាញ់បោះទាំងនោះ ដើម្បីសេចក្តីសុខ សុវត្ថិភាពរបស់ពួកគាត់ ក៌ដូចជាភ្ញៀវទេសចរជាតិ និងអន្តរជាតិផងដែរ ៕
