កំពង់ធំៈ អគ្គីភ័យបានលេបត្របាក់ផ្ទះមួយខ្នង បណ្តាលឲ្យឆាបឆេះទាំងស្រុង កាលពីរសៀលថ្ងៃទី ៨ ខែ មិនា ឆ្នាំ ២០១៥ វេលាម៉ោង៣.៤៥នាទី ស្ថិតនៅភូមិ ទី១ សង្កាត់កំពង់ធំ ក្រុងស្ទឹងសែន ខេត្តកំពង់ធំ ។តាមប្រភពពត៌មានដែលនៅកន្លែងកើតហេតុ បានឲ្យដឹងថា មុនពេលកើតហេតុ មានគេឃើញមានផ្សែងឆេះ ហុយចេញពីបន្ទប់ចង្ក្រានបាននៃផ្ទះ ក្រោយមកក៍មានការភ្ញាក់ផ្អើលឆោឡោ មានសមត្ថកិច្ចពន្លត់អគ្គីភ័យ នៃស្នងការនគរបាល ខេត្តកំពង់ធំ មានរថយន្តពន្លត់អគ្គីភ័យចំនួន២គ្រឿងបានពន្លត់យ៉ាងសកម្ម ដោយមានការចូលរួម ពីសំណាក់លោក អ៊ិត សុធា ព្រះរាជអាជ្ញាខេត្តកំពង់ធំ និងលោក ជូ សំ អាន ស្នងការនគរបាលខេត្តកំពង់ធំ ព្រមទាំងកម្លាំងជួយអន្តរាគមន៍ បានជួយពន្លត់យ៉ាងសស្រាក់សស្រាំ តែទីបំផុតអគ្គីភ័យបានលេបត្របាក់ទាំងស្រុង តែក្នុង ករណីអគ្គីភ័យនេះ ពុំបណ្តាលឲ្យមានមនុស្សគ្រោះថ្នាក់នោះទេ។
តាមការឲ្យដឹងពីសមត្ថកិច្ចបានឲ្យដឹងថា ផ្ទះមួយខ្នងនេះលោក ជូ សំអាន ស្នងការនគរបាលខេត្តកំពង់ធំ បានជួលឲ្យទៅអង្កការមួយឈ្មោះ បេសកកម្មដំណឹងល្អដើម្បីអភិវឌ្ឍន៍ នៅថ្ងៃកើតហេតុគឺជាថ្ងៃអាទិត្យ បុគ្គលិករបស់អង្គការពុំបានមក ធ្វើការ តែមានក្មេងម្នាក់នៅប្រចាំការ សូមបញ្ជាក់ថា នៅកើតហេតុភ្លើង អគ្គីសនី ត្រូវបានដាច់ជិតមួយថ្ងៃ តែករណីបណ្តាលឲ្យមានការឆាបឆេះនេះ គឺមានការសង្ស័យថា មានការចំអិន អាហារ ហើយទុកចោលបណ្តាលឲ្យឆេះតែម្តង តែក្នុងនោះសមត្ថកិច្ចពុំទាន់សណ្ឋានដាក់បន្ទុកទៅលើបុគ្គល ណាម្នាក់នោះទេ ស្ថិតនៅក្នុងដំណាក់កាលស្រាវជ្រាវ។
តាមការឲ្យដឹងពីលោក ហាយ ហ៊ុន នាយរងការិយាល័យពន្លត់អគ្គីភ័យ នៃស្នងការនគរបាល ខេត្តកំពង់ធំ បានឲ្យដឹងថា ឈានចូលឆ្នាំ ២០១៥នេះ អគ្គីភ័យបានឆេះផ្ទះសំបែង ប្រជាពលរដ្ឋ ទាំងតូចទាំងធំ មានចំនួន ៦ កន្លែង ក្នុងនោះបានធ្វើឲ្យមានការខូចខាត ទ្រព្យសម្បត្តិ ជាច្រើនផងដែរ។
ដោយ ប៊ុន រដ្ឋា