ខេត្តកំពង់ឆ្នាំង៖ យោងតាមប្រភពព័ត៌មានផ្ដល់ពីប្រជានេសាទស្លូតត្រង់ នៅឃុំ ឆ្នុកទ្រូ បាន និយាយឲ្យដឹងថាបច្ចុប្បន្នបទល្មើសសម្រាស់ នៅភូមិស្លេះស្លាប់ ឃុំឆ្នុកទ្រូ ស្រុក បរិបូណ៌ ខេត្តកំពង់ ឆ្នាំង បានសំរុកហ៊ុំព័ទ្ធចាប់យកត្រី ក្នុង១ថ្ងៃៗមិនក្រោមពី៥ទៅ៨ដុំឡើយ ដោយគ្មាន
ឃើញសមត្ថ កិច្ចខាងណាទៅបង្រា្កបនោះទេ។
ប្រភពនេះបានបន្តថា បទល្មើលសម្រាស់នេះ បានចាប់ផ្ដើមសំរុកធ្វើសកម្មភាពហ៊ុំព័ទ្ធចាប់ យកត្រីគឺបន្ទាប់ពីសមត្ថកិច្ចចំរុះស្ងប់ស្ងាត់ក្នុងការចុះរុះរើសម្រាស់នៅទីនោះមួយរយ:មកនេះ។ ប្រភពពីអ្នកសិ្នទ្ធ នឹងជនប្រព្រឹត្តបទល្មើសនេសាទសម្រាស់នេះ បាននិយាយឲ្យដឹងថា ការសំរុកហ៊ុំព័ទ្ធចាប់យកត្រីនេះ គឺមានការលួចលាក់ជាមួយលោកនាយខណ្ឌរដ្ឋបាលជលផលកំពង់ ឆ្នាំង ដោយមានការឃុបឃិតគ្នា ជាមួយសមត្ថកិច្ចរដ្ឋបាលជលផលសង្កាត់បរិបូណ៌និងសមត្ថកិច្ច ពាក់ព័ន្ធ។
បទល្មើសសម្រាស់នៅទន្លេធំ ក្នុងភូមិស្លេះស្លាប់នេះ គឺមានទ្រង់ទ្រាយធំៗ មានទំហំរាប់ពាន់ ម៉ែត្រការេ និងមានរាប់រយដុំ ។កន្លងមកបទល្មើសសម្រាស់នេះ គឺមានការបង្ក្រាបយ៉ាងក្ដៅគគុកពី សមត្ថកិច្ចចំរុះ រួមទាំងស្ថាប័នអយ្យការ អមសាលាដំបូង ខេត្តកំពង់ឆ្នាំងផងដែរ ប៉ុន្តែពុំដឹងជាយ៉ាង ម៉ិចទើបបទល្មើសសម្រាស់នៅតែមាន ច្រើនស្អេកស្កះ ហើយបន្សល់ទុកឲ្យជនប្រព្រឹត្តធ្វើការហ៊ុំព័ទ្ធ ចាប់យកត្រី យ៉ាងគគ្រឹកគគ្រេង ដោយគ្មានឃើញសមត្ថកិច្ចខាងណាទៅ រំខានដូចនេះ។
បទល្មើសសម្រាស់នេះ ត្រូវបានជនប្រព្រឹត្ត កាប់ដើមនិងមែកឈើ ដែលជាប្រភេទព្រៃលិច ទឹកសម្រាប់ត្រីពងកូន មកទំលាក់ក្នុងទឹកក្នុងកំឡុងខែកញ្ញា,តុលានិងវិចិ្ឆកា នៅតាមទីកន្លែងដែល ពួកគេ បានហួងហែងទុកជារបស់គេ ជារៀងរាល់ឆ្នាំនោះ ហើយចាប់ផ្ដើមធ្វើការហ៊ុំចាប់យកត្រី ពី ខែកម្ភ:រហូតដល់រដូវទឹកតំឡើង។នៅក្នុងការហ៊ុំព័ទ្ធចាប់យកត្រីនេះគឺពូកគេយកឧបករណ៍អួនក្រឡាល្អិតទៅហ៊ុំព័ទ្ធ សូម្បីតែត្រីតូចតាច ក៏រងការបំផ្លាញដែរ។
ចំពោះករណីបទល្មើសសម្រាស់ នៅទន្លេភូមិស្លេះស្លាប់នេះ ត្រូវបានជនកំពុងប្រព្រឹត្តបទ ល្មើសហ៊ុំព័ទ្ធនោះ និយាយថា អ្នករត់ការ របស់ពួកគេ គឺឈ្មោះ អុន នៅភូមិស្លេះស្លាប់នេះ។
លោក អុននិងលោកម៉ូត សៀងហេង នាយសង្កាត់បរិបូណ៌នេះពុំត្រូវបានអ្នកសារព័ត៌មានសុំ បំភ្លឺមិនបានទេនៅពេលនេះ ដោយទូរស័ព្ទ របស់លោកទំនាក់ទំនងមិនបាន។
សាធារណជននិយាយថាទោះជាឯកឧត្ដម ឈួរ ចាន់ឌឿន អភិបាលខេត្តកំពង់ឆ្នាំង មាន វិធានការណ៍និងចំណាត់ការដ៏ក្ដៅគគុក ជំរុញឲ្យសមត្ថកិច្ចរដ្ឋបាលជលផលនិងសមត្ថកិច្ចអាជ្ញាធរ អនុវត្ដច្បាប់ក្នុងការបង្ក្រាបបទល្មើសនេសាទយ៉ាងក្ដី ក៏គេសង្កេតឃើញ បទល្មើសនេសាទនៅតែ កើតមាននិងរីករាលដាល មិនថបថយឡើយ ដែលសាធារណជនសង្កេញឃើញថា គឺបណ្ដាលមក ពីល្បែងប៉ាវហ៊ីរបស់សមត្ថកិច្ចរដ្ឋបាលជលផលនិងសមត្ថកិច្ចអាជ្ញាធរ៕
