ខេត្តឧត្តរមានជ័យ៖បុរសម្នាក់ជាមេការជាងម៉ាស៊ីនត្រជាក់របស់ក្រុមហ៊ុនកាស៊ីណូលឹមហេង ធ្លាក់ពីដំបូលយ៉រ ក្រោយរោងបៀរកាដេណ ស្លាប់ ហើយត្រូវបានបុគ្គលិកក្រុមហ៊ុន ប្រទះឃើញសាកសព និងធ្វើឱ្យមានការភ្ញាក់ផ្អើល នៅវេលាម៉ោង ៩ព្រឹកថ្ងៃទី១២ ខែឧសភា ឆ្នាំ២០១៥។
ជនរងគ្រោះឈ្មោះ ឈួន រ៉ាប់ អាយុ ៣៤ឆ្នាំ បច្ចុប្បន្នជាមេការ ជាងម៉ាស៊ីនត្រជាក់ របស់ក្រុមហ៊ុនកាស៊ីណូលឹមហេង ស្នាក់នៅផ្ទះ ក្បែរផ្សារដំបូលខៀវ ខាងក្រោយកាស៊ីណូ ក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ដែលមានស្រុកកំណើតភូមិស្ពឺកើត ឃុំស្ពឺ ស្រុកចំការលើ ខេត្តកំពង់ចាម។
សមត្ថកិច្ចបានឱ្យដឹងថា តាមការសន្និដ្ឋានជនរងគ្រោះស្លាប់ ដោយសារបាក់ករ.ធ្លាក់ពីដំបូលរោងយ៉រ.ក្រោយរោងបៀរកាដេណ ដែលមានកំពស់ប្រហែលជា ៣ម៉ែត្រ ហើយតាមស្ថានភាពសាកសពជនរងគ្រោះ គឺបានស្លាប់តាំងយប់មកម្ល៉េះ ព្រោះអាវជនរងគ្រោះដោះទុកនៅលើដំបូលរោងយ៉រ.ហើយមិនបានប្រយ័ត្នក៏រអិលជើងធ្លាក់ពីលើដំបូល អ៊ុកក្បាលនឹងដីស្លាប់ភ្លាមៗនៅនឹងកន្លែងកើតហេតុ។
តាមការរៀបរាប់ពីប្រពន្ធជនរងគ្រោះ និងបុគ្គលិកក្នុងក្រុមហ៊ុនកាស៊ីណូលឹងហេង បានឱ្យដឹងថា ជនរងគ្រោះជាមេការជាងម៉ាស៊ីត្រជាក់ខាងលើ ពុំសូវបានសំរាកប៉ុន្មាននោះទេ ព្រោះជនរងគ្រោះត្រូវប្រចាំការដើរ ត្រួតពិនិត្យម៉ាស៊ីនត្រជាក់ទាំងយប់ទាំងថ្ងៃ ហើយប៉ុន្មានថ្ងៃមុន ជនរងគ្រោះកំពុងជួសជុលម៉ាស៊ីត្រជាក់ ធ្លាប់ត្រូវខ្សែរភ្លើងឆក់ធ្លាក់ របួសដៃជើង នៅពុំទាន់បានជាសះស្បើយផង ហើយប្រពន្ធជនរងគ្រោះបានប្រាប់ឱ្យសំរាកធ្វើការចាំរបួសជាសិន តែ ជនរងគ្រោះមិនព្រមឈប់។ ហើយនៅទីតាំងកើតហេតុ ដែលជនរងគ្រោះស្លាប់ គឺគ្មានម៉ាស៊ីត្រជាក់ ដែលត្រូវជួសជុលនោះឡើយ ព្រោះនៅរោងយ៉រ.ក្រោយរោងបៀរកាដេណ ជាសំណង់ទើបនឹងសាងសង់ពុំទាន់រួចរាល់នោះដែរ។