ខេត្តសៀមរាប៖ ទំនប់ទឹកសាធារណៈមួយកន្លែងស្ថិតនៅក្នុងក្រុងសៀមរាបហៅថាទំនប់៧៨ ត្រូវបានឈ្មួញ យកគ្រឿងចក្រមកឈួសឆាយ ជីកដីដើម្បីធ្វើស្រះទឹកចិញ្ចឹមត្រី យកមកធ្វើជាកម្មសិទ្ធិបុគ្គល ប៉ុន្ដែត្រូវបានប្រជាពលរដ្ឋមកពីបីសង្កាត់មកធ្វើការតវ៉ាឲ្យបញ្ឍប់សកម្មភាពជាបន្ទាន់ ដោយអះអាងថា ជាជំនប់ទឹកបុរាណសម្រាប់ស្រោចស្រប់ដំណាំកសិកម្មពួកគាត់។
ហេតុការពលរដ្ឋមកធ្វើការតវ៉ានេះ ធ្វើឡើងនៅព្រឹកថ្ងៃទី១៤ខែឧសភាឆ្នាំ២០១៥ស្ថិតនៅភូមិភ្នំក្រោម សង្កាត់សៀមរាប ខណៈពុំឃើញមានអាជ្ញាធរមកជួយអន្តរាគមន៍នោះទេ។
ប្រភពពីពលរដ្ឋនៅភូមិភ្នំក្រោម សង្កាត់សៀមរាប ក្រុងសៀមរាបបានប្រាប់នៅកន្លែងតវ៉ាថា ថៅកែជីកដីលក់ម្នាក់នោះ ឈ្មោះ ញឹក អ៊ុក ជាជនជាតិវៀតណាម បានយកគ្រឿងចក្រ មួយគ្រឿង ជីកដីធ្វើស្រះទឹកនៅក្នុងទំនប់ទឹករួមមួយកន្លែង ដើម្បីធ្វើស្រះទឹកជាកម្មសិទ្ធិឯកជនផ្ទាល់ ខ្លួន។ ប្រភពបន្ដថា ទំនប់ទឹកនោះជាកម្មសិទ្ធិរួមរបស់ពលរដ្ឋបីសង្កាត់ សម្រាប់ស្រោចស្រប់ដំណាំ កសិកម្ម តាំងពីជំនាន់ដើម។ប្រភពបន្ដថា ពួកគេហាមឃាត់គ្រឿងចក្រមិនឲ្យកាយដីនេះ គឺដើម្បីទុកជាសម្បត្ដិរួមបន្ដទៀត។
ប្រជាពលរដ្ឋដែលចូលរួមតវ៉ា បានឲ្យដឹងស្រដៀងគ្នាថា ថៅកែជីកដីនោះឈ្មោះ ញឹក អ៊ុកនោះ បានធ្វើសកម្មភាពជីកដីទំនប់ធ្វើស្រះជាច្រើនថ្ងៃមកហើយ ។ហើយពួកគេបានស្នើទៅមេភូមិឲ្យជួយទប់ស្កាត់ និងផ្អាកសកម្មភាពគ្រឿងចក្រនោះដែរ ប៉ុន្ដែមិនមានអាជ្ញាធរណាមួយអើពើឡើយ ។ពួកគេបានចោទប្រកាន់ អាជ្ញាធរដែនដីថា ឃុបឃិតស៊ីសំណូកសូកប៉ាន់ជាមួយជនជាតិវៀតណាមនោះ ។
ជុំវិញករណីនេះ លោក ញឹក អ៊ុក មានប្រសាសន៍ទទួលស្គាល់ថា លោកឈូសឆាយចូលទំនប់ទឹករួមនោះតិចតួចទេ ហើយលោកបដិសេធថា លោកមិនមែនជនវៀតណាមទេ។លោកបន្ដថា ដីដែលគ្រឿងចក្រឈូសឆាយនោះជាដីកម្មសិទ្ធិរបស់គាត់ទេ។លោកបន្តថា បច្ចុប្បន្នអាជ្ញាធរឲ្យលុបដីទាំងនោះវិញ ។
លោក សូ ប្លាតុង អភិបាលក្រុងសៀមរាបបានមានប្រសាសន៍ប្រាប់ នៅព្រឹកថ្ងៃទី១៥ខែឧសភា នេះថា ករណីនេះលោកមិនទាន់បានដឹងទេ ព្រោះមិនទាន់មានមន្ត្រីណាមួយរាយការមកលោកទេ។លោកបន្តថា ករណីនេះលោកនិងចុះទៅត្រួតពិនិត្យផ្ទាល់ពីការជីកកកាយដីនៅតំបន់ព្រៃលិចទឹកនោះ ព្រោះអ្នកកាយដីទាំងនោះត្រូវបានអាជ្ញាធរចុះហាមឃាត់ម្តងមកហើយ ប៉ុន្តែពួកគេនៅតែលួចធ្វើសកម្មភាពដដែល។លោកបន្តទៀតថា រាល់ការឈូសឆាយនិងជីកកកាយដីនៅតំបន់ព្រៃលិចទឹកនេះត្រូវសុំច្បាប់មកអាជ្ញាធរពាក់ព័ន្ធជាមុនសិនដើម្បីឲ្យអាជ្ញាធរចុះទៅសិក្សានៅតំបន់នោះ។
បើតាមប្រជាពលរដ្ឋបានឲ្យដឹងថា ទំនប់ទឹករួមគ្នានោះមានឈ្មោះទំនប់ទឹក៧៨ដែលមានបណ្ដោយប្រវែង៩ពាន់ម៉ែត្រ និងទទឹងប្រវែង ២៥០ម៉ែត្រ ដែលមានពលរដ្ឋប្រើប្រាស់ទឹកនោះ រួមមាន ពលរដ្ឋនៅសង្កាត់សៀមរាប សង្កាត់ស្វាយដង្គំ និងសង្កាត់សំបួរ ផងដែរ។
គួររំលឹកផងដែរថា នៅបន្ទាត់ទំបន់ទឹក៧៨ដែលមាននៅក្នុងស្រុកក្រឡាញ់,ពួក,សៀមរាប,ប្រាសាទបាគង,សូទ្រនិគម,ជីក្រែង ត្រូវបានគេសង្គេតឃើញថា មានក្រុមឈ្មួញនិងពលរដ្ឋមួយចំនួនបានទៅធ្វើសកម្មភាពឈូសឆាយជីកកកាយយកមកធ្វើជាកម្មសិទ្ធផ្ទាល់ខ្លួន ដើម្បីធ្វើស្រែប្រាំងនិងស្រះចិញ្ចឹមត្រី ហើយករណីនេះគេនៅមិនទាន់ឃើញមានចំណាត់ការក្តៅណាមួយ របស់អាជ្ញាធរខេត្តទៅលើក្រុមឈ្មួញទាំងនោះឡើយ ផ្ទុយទៅវិញឃើញតែក្រុមឈ្មួញកំពុងនាំគ្នាឈូសឆាយយ៉ាងសប្បាយចិត្ត ហើយករណីនេះទំនងជាអាជ្ញាធរមួយចំនួនត្រូវដងត្រូវផ្លែគ្នាមើលទៅ៕