ខេត្តប៉ៃលិន៖ ក្រោយពីសារព័ត៌មានចេញផ្សារករណីគីឡូភ្លើងឡើងខុសប្រក្រតី នៅភូមិផ្សារព្រំ ដោយប្រជាពលរដ្ឋប្រមាណ១០៥គ្រួសារ មានការកើតទុកមិនសុខចិត្ត ប្តឹងតវ៉ាមកអាជ្ញាធរខេត្តប៉ៃលិន ឲ្យរកដំណោះស្រាយ ជូនពួកគាត់ ក្នុងខែមីនាកន្លងមក ។ កាលពីល្ងាចថ្ងៃទី១៤ ខែឧសភា ឆ្នាំ២០១៥ នេះ អ្នកយកព័ត៌មានយើង បានធ្វើការទំនាក់ទំនងតាមទូរស័ព្ទ ទៅ តំណាងប្រជាពលរដ្ឋទាំង១០៥គ្រួសារនោះ អំពីការជំនូប នៃការដោះស្រាយបន្តទៀត លោកស្រី ខិត សុម៉ាលី តំណាងឲ្យប្រជាពលរដ្ឋ បានឲ្យដឹងថា៖ ក្រុមហ៊ុនអគ្គីសនីមិនបានបិទភ្លើងនោះទេ ហើយក្រុមប្រឹក្សាខេត្តនឹងយកសំណើរសុំរបស់ពួកគាត់ទាំងនេះទៅប្រជុំអនុម័តនឹងដោះស្រាយជូន បន្ទាប់ពីបុណ្យចំរើនព្រះជន្ម ព្រះករុណា ព្រះបាទសម្តេច ព្រះបរមរនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជារួច ។
ទាក់ទិនបញ្ហាខាងលើ លោក ឡី ចាន់ឆាយ ប្រធានក្រុមប្រឹក្សាខេត្តប៉ៃលិន បានឲ្យដឹងតាមទូរស័ព្ទ កាលពីវេលាម៉ោង៣ និង៣០នាទីថ្ងៃទី១៥ ខែឧសភា នេះថា៖ រឿងនៃការដោះស្រាយនេះ ខាងលោកកំពុងតែធ្វើការពិភាក្សាជាមួយឯកឧត្តមអភិបាលខេត្ត ហើយខាងលោកទទូលពាក្យបណ្តឹងមកនេះ គឺដើម្បីយកមកពិភាក្សាគ្នាជាមួយក្រុមប្រឹក្សាខេត្ត រីឯការដោះស្រាយនោះដែរគឺយើងត្រួវធ្វើទៅតាមបែបបទរដ្ឋបាលថ្នាក់ខេត្ត ។សូមបញ្ជាក់ថា៖ កាលពីថ្ងៃទី១២ខែមេសាឆ្នាំ២០១៥កន្លងទៅថ្មីៗនេះ អាជ្ញាធរខេត្តប៉ៃលិនបានអនុញ្ញាតិអោយតំណាងមន្ទីររ៉ែថាមពល តំណាងក្រុមហ៊ុនភ្លើងអគ្គីសនីឯកជនផ្សារព្រំ និងតំណាងប្រជាពលរដ្ឋមកចូលរួមប្រជុំដោះស្រាយម្តងរួចមកហើយ ជាលទ្ធផល តំណាងក្រុមហ៊ុនភ្លើងអគ្គីសនីបានផ្អាកមិនអោយប្រជាពលរដ្ឋដែលមានបញ្ហាភ្លើងឡើងគីឡូទាំងនោះបង់សេវាប្រើប្រាស់ក្នុងខែមិនានោះទេ ចាំអោយអាជ្ញាធរអគ្គីសនីកម្ពុជាត្រួតពិនិត្យមើលសិន ។ ប្រភពព័ត៌មានបន្តទៀតថា៖
អាជ្ញាធរខេត្តបានជំរុញអោយមន្ទីររ៉ែថាមពលធ្វើលិខិតស្នើរ សុំអោយអាជ្ញាធរអគ្គីសនីកម្ពុជា ចុះមកស្រាវជ្រាវរកមូលហេតុអំពីការឡើងគីឡូភ្លើងនេះ។ តែក្រោយពីអាជ្ញាធរអគ្គីសនីមកត្រួតពិនិត្យ គឺបានធ្វើតែផ្ទះមួយចំនួន ប៉ុណ្ណោះដោយឆ្លើយថា កុងទ័រភ្លើងមិនមានបញ្ហាអ្វីទេ ព្រោះរដូវនេះជារដូវក្តៅបានជាឡើងខុសធម្មតា។តែប្រជាពលរដ្ឋមិនទទួលយកនោះទេ បើខុសហេតុអ្វីខុសតែក្នុងខែមិនានោះ ចុះខែមុនៗមិនលើសដូចខែមិនានេះ។លោកស្រីខិត សុម៉ាលី តំណាងអោយប្រជាពលរដ្ឋ រស់នៅភូមិផ្សារព្រំ បានអោយដឹងថា៖ មូលហេតុដែលពួកគាត់បាន ប្តឹងតវ៉ាអំពីភ្លើងនេះ គឺដោយសារការប្រើប្រាស់ភ្លើងក្នុងខែមិនា វាឡើងគីឡូច្រើនពេក វាមិនតុល្យៈភាពដូចខែមុនៗនោះទេ ។ លោកស្រីបន្តថា៖ ជារៀងរាល់ខែគ្រួសារគាត់ប្រើអស់ថវិកាចំនួន ៤,១០០បាតតែប៉ុណ្ណោះ តែក្នុងខែមិនាឆ្នាំ២០១៥គឺកើនឡើងដល់៩,៥០០បាត។ ហើយគ្រួសារតូចជាងគេប្រើអស់២៣០បាត តែបានកើនឡើង៧៥០បាត និងមានប្រជាពលរដ្ឋជាច្រើនគ្រួសារទៀតបានកើនឡើងទ្វេគុណដល់ទៅជាង១០០%ឯណោះ។ លោកស្រីបន្ថែមថា៖ ក្នុងករណីនេះដែរតំណាងក្រុមហ៊ុនអគ្គីសនីបានអោយដឹងថា បើបងប្អូនប្រជាពលរដ្ឋមិនបានបង់សេវាភ្លើងជូនទេនោះរយៈពេល៥ថ្ងៃទៀតនឹងបិទភ្លើងមិនអោយប្រើប្រាស់ទៀតទេ។ ដូច្នេះក្នុងនាមប្រជាពលរដ្ឋទាំងអស់សូមសំណូមពរដល់អាជ្ញាធរខេត្តជួយដោះស្រាយអោយពួកគាត់បានសមស្របផង គឺទី១ អោយពួកគាត់បង់សេវ៉ាក្នុងខែមិនាដូចខែមុនៗ ទី២សុំអោយបុគ្គលឹកក្រុមហ៊ុនធ្វើការបូកសរុបកុងទ័រភ្លើងអោយបានច្បាស់លាស់ ទី៣ សូមកុំអោយក្រុមហ៊ុនអគ្គីសនីឯកជនបិទភ្លើង ។ បើអាជ្ញាធរខេត្តមិនទទួលយកសំណូមពរទាំង៣ចំណុចនោះទេ ពួកគាត់នឹងធ្វើសំណើរសុំដល់ការិយាល័យតំណាងរាស្ត្រជួយដោះស្រាយថែមទៀត ។
