ភ្នំពេញ៖ យុវជន២នាក់បានរងរបួសធ្ងន់ស្រាល ខណៈពូកគេជិះម៉ូតូមួយគ្រឿង ដល់ចំណុចផ្លូវកែង ត្រូវរថយន្តឡិចស៊ីស LX៤៧០ បើកបរដោយបុរសជនជាតិចិនម្នាក់ ជ្រុលបុកពេញទំហឹង កាលពីវេលាម៉ោង២០និង១០នាទីយប់ ថ្ងៃទី១៧ ខែឧសភា ឆ្នាំ២០១៥ នៅចំណុចផ្លូវលេខ៣៣៥ កែងផ្លូវ៥៤៤ ស្ថិតក្នុងសង្កាត់បឹងកក់ទី១ ខណ្ឌទួកគោក ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញយុវជន២នាក់ ជិះម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខភ្នំពេញ1BU-4650 ធ្វើដំណើរតាមបណ្តោយផ្លូវលេខ៣៣៥ក្នុងទិសដៅពីលិចទៅកើតខណៈមកដល់ចំណុចផ្លូវកែងផ្លូវលេខ៥៤៤ត្រូវបានរថយន្តម៉ាកឡិចស៊ីស LX470 ពណ៌ស ពាក់ស្លាកលេខកំពង់ឆ្នាំ 2A1230 ធ្វើដំណើរតាមបណ្តោយផ្លូវលេខ៥៤៤ ក្នុងទិសដៅពីជើងទៅត្បូង ក៏បានជ្រុលបុកពេញទំហឹង បណ្តាលឲ្យនាក់ជិះម៉ូតូរងរបួសធ្ងន់និងស្រាល ចំណែកម៉ូតូគាប់ជាប់ក្រោមរថយន្តរងការខូចខាត។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះ ដឹកទៅមន្ទីរពេទ្យភ្លាមៗ ចំណែករថយន្តនិង ម៉ូតូ សមត្ថកិច្ចបានចុះធ្វើការវាស់វែង យករថយន្តទៅរក្សាទុក នៅអធិការដ្ឋាននគរបាល ខណ្ឌទូលគោក រងចាំដោះស្រាយពេលក្រោយ ៕