ភ្នំពេញ៖ យុវជនម្នាក់ស្រវឹងស្រាជោគជាំ បានបើករថយន្តសេរីទំនើប ក្នុងល្បឿនយ៉ាងលឿន បុករថយន្តមួយគ្រឿង វិល២ ៣ជុំ ហើយទៅប៉ះជាមួយនឹងរថយន្តមួយគ្រឿងទៀត ដែលកំពុងបើកចេញពីកន្លែងលក់មីឆា បណ្តាលឱ្យរងការខូចខាតរថយន្តទាំង៣គ្រឿងយ៉ាងដំណំ កាលពីវេលាម៉ោង១២នឹង៥នាទីយប់រំលងអាធ្រាត ឈានចូលថ្ងៃទី៧ ខែមិថុនា ឆ្នាំ២០១៥ តាមបណ្តោយផ្លូវព្រះមុន្នីវង្ស កែងនឹងផ្លូវកម្ពុជាក្រោម ស្ថិតក្នុងសង្កាត់ផ្សារដេប៉ូទី២ ខណ្ឌដូនពេញ ។
ប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញរថយន្តម៉ាក Morning ពណ៍ទឹកសមុទ្រ ពាក់ស្លាកលេខ ភ្នំពេញ 2AD-7213 ធ្វើដំណើរតាមបណ្តោយផ្លូវកម្ពុជាក្រោម ទិសដៅពីលិចទៅកើត ខណះមកដល់ចំណុចកើតហេតុ ស្រាប់តែមានរថយន្តសេរីទំនើបម៉ាក Nissan ពណ៍ខ្មៅ ពាក់ស្លាកលេខ ភ្នំពេញ 2S-6183 បើកបរដោយយុវជនម្នាក់ស្រវឹងស្រាជោគជាំ បើកក្នុងល្បឿនយ៉ាងលឿន ទិសដៅពីត្បូងទៅជើង បានបុករថយន្ត ពីក្រោយ បណ្តាលឱ្យវិល២ ៣ជុំ ហើយទៅប៉ះជាមួយនឹងរថយន្តកាមេរីកូរ៉ូឡា មួយគ្រឿងទៀត ពណ៍ខ្មៅ ពាក់ស្លាកលេខ ភ្នំពេញ 2K-2105 ដែលចេញពីកន្លែងលក់មីឆា បណ្តាលឱ្យរថយន្តទាំង៣គ្រឿង រងការខូចខាតយ៉ាងដំណំ ។
ប្រភពបន្តថា អ្នកបើកបរNissan មានបំណងព្យាយាមបើករត់ ប្រមាណជា៥០ម៉ែត្រ ត្រូវបានអ្នកដំណើរ តាមដងផ្លូវ ដេញឃាត់បានផងដែរ ហើយនេះសំណាងល្អហើយ ដែលមិនបង្កគ្រោះថ្នាក់ដល់អ្នកដ៏ទៃ ។
ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគន៍ដល់កន្លែងកើតហេតុ និងបានសហការជាមួយជំនាញធ្វើការវាស់វែង ស្ទូចយករថយន្តទាំង៣គ្រឿង ទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយទៅតាមផ្លូវច្បាប់ ៕
