ខេត្តបន្ទាយមានជ័យ
ស្ត្រីវ័យចំណាស់ម្នាក់រស់នៅភូមិបន្ទាយ១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ រស់នៅក្នុងខ្ទមកំសត់តែម្នាក់ឯងអង្គុយរងចាំមើលផ្លូវកូនប្រុសពៅដែលបាត់ដំណឺងសូន្យឈឹងអស់រយៈពេល២ឆ្នាំ មិនដឹងថានៅរស់ ឬស្លាប់នោះទេ បន្ទាប់ពីកូនប្រុសគាត់បានចេញទៅរកធ្វើការងារខុសច្បាប់នៅក្នុងប្រទេសថៃកន្លងមក។ស្ត្រីវ័យចំណាស់នោះមានឈ្មោះ ប្រាក់ អេធ អាយុ៥៣ឆ្នាំ មានប្តីឈ្មោះ តា គ អាយុ៦៣ឆ្នាំគាត់ ជាមនុស្សគ រស់នៅភូមិឃុំខាងលើ ហើយគាត់មានកូន៤នាក់ ស្រី១នាក់ ប្រុស៣នាក់ កូន ប្រុសដែលបាត់ខ្លួនជាកូនទី៤ មានឈ្មោះ គ ពែក អាយុ២៣ឆ្នាំ ។អ៊ំប្រាក់ អេធបាននិយាយថាកាលពីកន្លងទៅថ្មីៗនេះថា ដោយក្រុមគ្រួសារគាត់រស់នៅក្នុងជីវភាពខ្វះខាតហើយក៏ឱ្យកូនប្រុសស្រីទាំង៤នាក់ទៅធ្វើការងារនៅប្រទេសថៃដើម្បីបានប្រាក់ជួយចិញ្ចឹមឪពុកម្តាយចាស់ជរានៅចាំផ្ទះ។ ដោយឡែក សម្រាប់កូនប្រុស ស្រី៣នាក់ ទៅធ្វើការងារស្របច្បាប់គឺមិនមានបញ្ហាអ្វីនោះទេ បញ្ហាតែកូន ប្រុសទី៤ឈ្មោះ គ ពែក ដែលទៅធ្វើការងារនៅក្នុងប្រទេសថៃខុសច្បាប់តាមរយៈមេខ្យល់នាំទៅ។អ៊ុំស្រីប្រាប់ឱ្យដឹងទៀតថាកូនគាត់ទៅធ្វើការនៅប្រទេសថៃកាលពីឆ្នាំ២០១៣ មុនដំបូងទៅធ្វើការងារជាកម្មករសំណង់ជាមួយកូនចៅ បងប្អូន អ្នកភូមិជាមួយ គ្នាជាង១០នាក់ នៅខេត្តណងខាយ ជាប់ព្រំប្រទល់ ប្រទេសឡាវ ហើយទៅធ្វើការងារបាន៣ខែ ក៏មានប្រាក់ផ្ញើមកគាត់ បានចំនួន៣ពាន់ បាតប្រាក់ថៃ។ លុះបន្ទាប់មកកូនគាត់ ក៏ត្រូវផ្លាស់ទីកន្លែង ការងារផ្សេងបែកចេញពីកន្លែងធ្វើការជាមួយកូនអ្នកភូមិដែលទៅជាមួយគ្នា។ ស្រាប់តែក្នុងអំឡុងយុទ្ធនាការដែលទាហានថៃចាប់ បញ្ជូនពលករខ្មែរត្រឡប់មកស្រុកខ្មែរវិញក្នុងអំឡុង ឆ្នាំ ២០១៤ ក៏បាត់ដំណឹងកូនប្រុសគាត់ឈឹង ទោះបីទូរស័ព្ទហៅទាក់ទងក៏ហៅលែងចូល។អ៊ុំស្រី ប្រាក់ អេធ បានប្រាប់ឱ្យដឹងទៀតថា លុះក្រោយមកកូនគាត់បានទូរស័ព្ទចូល គាត់ បាននិយាយគ្នាបន្តិច ឮកូននិយាយថាម៉ែកូនលួចនិយាយទូរស័ព្ទខ្លាចគេដឹង ក៏បិទទូរ ស័ព្ទបាត់ ហើយចាប់ពីពេលនោះមក ក៏បាត់ដំណឹងកូនឈឹងរហូតដល់បច្ចុប្បន្ននេះតែម្តង។អ៊ុំស្រី តាមរយៈអ្នកសារព័ត៌មានគាត់សំណូមពរឱ្យ អាជ្ញាធរនិងសមត្ថកិច្ចពាក់ព័ន្ធមេត្តាជួយស្វែងរកកូនប្រុសគាត់ផង ពីព្រោះគាត់ជាប្រជាជនក្រីក្រហើយមិនដឹងទៅប្តឹងរាយការណ៍ទៅអង្គភាពណាទេជួយរកកូនគាត់នោះទេ៕