ខេត្តព្រះវិហារតាមសេចក្ដីរាយការណ៍បានអោយដឹងថាសំណង់រដ្ឋបាលក្រុមហ៊ុនចិនវិនិយោគវិស័យកសិកម្មដាំអំពៅនិងរោងចក្រផលិតស្ករសសាងសង់នៅលើទំហំផ្ទៃដី១០គីទ្បូម៉ែត្រ៤ជ្រុងធំជាងគេនៅតំបន់អាស៊ីអាគ្នេយ៍កំពុងដំណើរការយ៉ាងមមាញឹកស្ថិតនៅភូមិប្រើសក្អកឃុំម្លូរព្រៃ២ស្រុកឆែបខេត្តព្រះវិហារ។ឧបករណ៍ថ្មីៗបំពាក់អោយរោងចក្រសំរុកដឹកជញ្ជូនយកមកជាបន្តបន្ទាប់។ភាគីមន្ទីរជំនាញនិយាយថាកិច្ចការសាងសង់រោងចក្រដ៍ធំនេះស្ថិតនៅក្រោមការឃ្លាំមើលរបស់ក្រុមប្រឹក្សាអភិវឌ្ឍន៍កម្ពុជា(CDC)។យើងសង្ឃឹមថាប្រជាពលរដ្ឋខេត្តព្រះវិហារនឹងមានជីវភាពធូរធារនិងរីកចំរើននៅពេលខាងមុខតាមរយះការវិនិយោគចំណាយដើមទុនដ៍មហាសាលនេះ។តំបន់ឧស្សាហកម្មមានលក្ខណះទំនើបដែលបង្កប់ខ្លួនក្នុងតំបន់ដាច់ស្រយ៉ាលពីទីរួមខេត្តនឹងក្លាយទៅជាកូនទីក្រុងសេដ្ឋកិច្ចនិងពាណិជ្ជកម្មយ៉ាងពិសេសមួយក្នុងប្រវត្តិសាស្ដ្រដែលពលរដ្ឋខេត្តព្រះវិហារមិននឹកស្មានដល់ទាល់តែសោះ។
អាជ្ញាធររួមមានមន្ទីរជំនាញនិងអង្គភាពរដ្ឋពាក់ព័ន្ធមួយចំនួនបានចូលរួមសហការជាមួយក្រុមហ៊ុនចិនរ៉ូយហ្វេងចុះសិក្សាវាយតម្លៃចំនួនតួលេខផ្ទៃដីព្រៃឈើដែលមានចែងនៅក្នុងអាជ្ញាប័ណ្ណវិនិយោគនិងរកដំណោះស្រាយផលប៉ះពាល់ដីស្រែចំការរបស់ប្រជាពលរដ្ឋអស់រយះពេលជាង៣ឆ្នាំ។កិច្ចសហការនេះបានជំរុញអោយក្រុមហ៊ុនចិនមានលទ្ធភាពដំណើរការកម្មវិធីវិនិយោគរបស់ខ្លួនបានរលូនរហូតមកដល់ពេលនេះបើទោះបីមានការប្រឆាំងតវ៉ាបាត់បង់ដីស្រែចំការពីអ្នកភូមិជនជាតិភាគតិចកួយខ្លះៗក៍ដោយ។មន្ដ្រីមួយរូបបានអោយដឹងថាមន្ដ្រីជំនាញបច្ចេកទេសក្រុមហ៊ុនរ៉ូយហ្វេងបានធ្វើផែនទីភូមិសាស្ដ្រអំពីផ្ទៃដីវិនិយោគមួយដើម្បីមានភាពច្បាស់លាស់ងាយស្រួលគ្រប់គ្រងផ្ទៃដីត្រូវដាំអំពៅ។ក្នុងផែនទីបានកំណត់រួចស្រេចថាផ្ទៃដីណាអាចដាំអំពៅបាននិងផ្ទៃដីណាជារបស់អ្នកភូមិដែលមិនទាន់ដោះស្រាយផលប៉ះពាល់រួចនៅទ្បើយ។ភ្នាក់ងាររាយការណ៍ថាពេលនេះក្រុមហ៊ុនចិនកំពុងជួបបញ្ហាខ្វះពូជអំពៅហើយបានងាកទៅដាំស្រូវបណ្តោះអាសន្នសិនលើផ្ទៃដីវិនិយោគដែលនៅទំនេររាប់រយហិកតា។ពូជស្រូវមួយចំនួនក្រុមហ៊ុនចិនបានទិញពីមន្ទីរកសិកម្មខេត្តព្រះវិហារនិងពូជស្រូវមួយចំនួនទៀតពង្វាស់ជាមួយអ្នកភូមិដោយចែកផលប្រយោជន៍៥០ភាគរយម្នាក់ហើយបានធ្វើកិច្ចសន្យាត្រឹមត្រូវ។លោកពឹងទ្រីដាប្រធានមន្ទីរកសិកម្មខេត្តព្រះវិហារបានអោយដឹងថានៅក្នុងរបាយការណ៍ក្រុមហ៊ុនចិនគឺលទ្ធផលសាងសង់រោងចក្រស្ករសបានប្រមាណ៧០ភាគរយក្នុងនោះម៉ូទ័រនិងធុងសម្ងួតស្ករសបានតម្លើងរួចរាល់ហើយ។ក្រុមហ៊ុនសំអាតផ្ទៃដីវិនិយោគបានប្រមាណ៣៥០០០ហិកតារីឯដំណាំអំពៅក្រុមហ៊ុនដាំបានប្រមាណ១ម៉ឺនហិកតារួចហើយក្នុងនោះមានបុគ្គលិកកម្មករខ្មែរប្រុសស្រីធ្វើការចំនួន២ពាន់នាក់។លោកបន្តថាក្រុមហ៊ុនបានងាកទៅដាំស្រូវបានចំនួនរាប់រយហិកតាដោយសារខ្វះពូជអំពៅគឺនៅខែវិច្ឆិការឆ្នាំ២០១៥ខាងមុខក្រុមហ៊ុននឹងបន្តការងារវិនិយោគដាំអំពៅទ្បើងវិញ។រោងចក្រស្ករសនឹងដំណើរការផលិតកម្មរបស់ខ្លួនយ៉ាងយូរនៅក្នុងខែមករាឆ្នាំ២០១៦ខាងមុខ។លោកលើកទ្បើងថាតួលេខផ្ទៃដីវិនិយោគមិនគ្រប់ចំនួនដូចនៅក្នុងអាជ្ញាប័ណ្ណនោះទេព្រោះផ្ទៃដីមួយចំនួនប៉ះពាល់ដីស្រែចំការរបស់អ្នកភូមិតម្រូវអោយក្រុមហ៊ុនកាត់វាចេញខ្លះ៕
