ខេត្តកំពង់ឆ្នាំង៖ អ្នកចែកចាយ២នាក់នៅក្នុងរោងចក្រ និងអ្នកប្រើប្រាស់គ្រឿងញៀនចំនួន៤នាក់ ត្រូវបានសមត្ថកិច្ចនគរបាលស្រុកកំពង់ត្រឡាចធ្វើការចាប់ខ្លួនជាបន្តបន្ទាប់ និងដកហូតបានថ្នាំញៀន១៣កញ្ចប់ នៅព្រឹកថ្ងៃទី១៦ខែកក្កដា ឆ្នាំ២០១៥ នៅទីកន្លែង២ផ្សេងគ្នា ក្នុងស្រុកកំពង់ត្រឡាច ខណៈដែលពួកគេ កំពុងប្រើប្រាស់ និងចែកចាយថ្នាំញៀន។
លោក គឹម សារ៉េត នាយរងការិយាល័យកណ្តាលប្រឆាំងបទល្មើសនៃស្នងការនគរបាលខេត្ត បានអោយដឹងថាៈ នៅវេលាម៉ោង១១និង២០នាទីព្រឹក សមត្ថកិច្ចនគរបាលស្រុកកំពង់ត្រឡាចបានចាប់ខ្លួនមនុស្ស៤នាក់ កំពុងប្រើប្រាស់គ្រឿងញៀន នៅចំណុចក្រោយវិទ្យាល័យ ហ៊ុន សែន កំពង់ត្រឡាច ស្ថិតក្នុងភូមិសាលាលេខ៥ ឃុំអូរឬស្សី ស្រុកកំពង់ត្រឡាច ដោយដកហូតបានវត្ថុតាងសំភារៈប្រើប្រាស់ថ្នាំញៀនមួយចំនួន និងម៉ូតូ១គ្រឿង។ពួកគេទាំង៤នាក់មាន ១.ឈ្មោះ លី ណារ៉ូ អាយុ១៤ឆ្នាំ ២.ឈ្មោះ សួស សុវនាថ អាយុ១៦ឆ្នាំ ៣.ឈ្មោះ អឿន ប៊ុនធឿន អាយុ១៤ឆ្នាំ និង៤.ឈ្មោះ វ៉ា ភារុន អាយុ១៥ឆ្នាំ ទាំង៤នាក់មានទីលំនៅ ក្នុងស្រុកកំពង់
ត្រឡាច។បន្ទាប់មកក្រោយពីបានសួរចម្លើយពួកគេទាំង៤នាក់រួចមក សមត្ថកិច្ចនគរបាលប្រឆាំងគ្រឿងញៀនខេត្ត សហការជាមួយនគរបាលស្រុកកំពង់ត្រឡាច ស្រុកសាមគ្គីមានជ័យ និងម្ចាស់រោងចក្រនៅវេលាម៉ោង ២និង៣០នាទីរសៀល ថ្ងៃដដែលចាប់ខ្លួនអ្នកចែកចាយថ្នាំញៀន២នាក់ទៀត នៅក្នុងរោងចក្រខេនស្បត ក្នុងភូមិចំការស្វាយ ឃុំសេដ្ឋី ស្រុកសាមគ្គីមានជ័យ។ពួកគេ ១.ឈ្មោះ ណម ធីម អាយុ២៣ឆ្នាំ មានទីលំនៅ ភូមិបឹងឈូក ឃុំសេដ្ឋី ស្រុក
សាមគ្គីមានជ័យ និងម្នាក់ទៀតឈ្មោះ ហួរ សាយ័ន្ត អាយុ២៧ឆ្នាំ មានទីលំនៅ ភូមិអំពិលទឹក ឃុំវិហារហ្លួង ស្រុកពញ្ញាឮ ខេត្តកណ្តាល ដោយដកហូតបាន ថ្នាំញៀនប្រភេទម៉ាទឹកកកចំនួន១៣កញ្ចប់ ម៉ូតូ២គ្រឿង។សរុបមកការបង្ក្រាបបទល្មើស២ករណីនេះ សមត្ថកិច្ចដក
ហូតបានថ្នាំញៀន១៣កញ្ចប់ ម៉ូតូ៣គ្រឿង ទូរសព្ទ័ដៃ៣គ្រឿង និងសំភារៈជក់គ្រឿងញៀនមួយចំនួន។ជនសង្ស័យទាំង៦នាក់ត្រូវបានសមត្ថកិច្ចនគរបាលស្រុកកំពង់ត្រឡាច និងស្រុកសាមគ្គីមានជ័យ កសាងសំណុំរឿងបញ្ជូនមកការិយាល័យនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្ត ដើម្បីចាត់ការបន្តបញ្ជូន្លួន និងវត្ថុតាងទៅតុលាការខេត្ត ធ្វើការផ្តន្ទាទោសតាមផ្លូវច្បាប់៕
