ខេត្តព្រះវិហារ៖តាមសេចក្ដីរាយការណ៍បានអោយដឹងថាសិប្បកម្មកែច្នៃឈើប្រណីត១កន្លែងកំពុងដំណើរការយ៉ាងរលូននៅជាប់ដងផ្លូវជាតិលេខ៦៤ក្នុងទីរួមស្រុកគូលែនខណះមន្ដ្រីរដ្ឋបាលព្រៃឈើខេត្តព្រះវិហារអះអាងថាមិនទាន់បានចេញច្បាប់អនុញ្ញាតអោយឈ្មួញបើកសិប្បកម្មនៅទ្បើយទេ។គ្រប់ឈ្មួញបើកសិប្បកម្មកែច្នៃឈើប្រណីតតែងតែនិយាយថាមានច្បាប់ត្រឹមត្រូវពីរដ្ឋបាលព្រៃឈើ។ភ្នាក់ងាររាយការណ៍ថាឈ្មួញម្នាក់ឈ្មោះឆឹងលាងស្រេងមានទីតាំងរោងសិប្បកម្មកែច្នៃឈើប្រណីត១កន្លែងស្ថិតនៅក្នុងទីរួមស្រុកគូលែនជាប់ដងផ្លូវជាតិលេខ៦៤កំពុងធ្វើគ្រឿងសង្ហារឹមប្រភេទសាទ្បុងប្រណីតៗតំលៃជិត១ម៉ឺនដុល្លារអាមេរិកក្នុង១ឈុតៗនៅកណ្តាលវាលតែម្តងក្នុងរូបភាពបន្លំភ្នែកមហាជនថាស៊ីឈ្នួលលាភថ្នាំអោយគេ។ឈ្មោះស្រេងបានប្រាប់ភ្នាក់ងារថាគ្រឿងសាទ្បុងទាំងនោះគាត់ស៊ីឈ្នួលលាភថ្នាំអោយគេតែប៉ុណ្ណោះ។ប្រភពព័ត៌មានផ្សេងទៀតបានអោយដឹងថាគ្រឿងសាទ្បុងធ្វើពីឈើធ្នង់ឆ្លាក់ក្បាច់ប្រណីតៗទើបធ្វើហើយថ្មីៗគឺឈ្មួញឈ្មោះស្រេងដឹកជញ្ជូនពីរោងសិប្បកម្មកែច្នៃឈើប្រណីត
ធំ១កន្លែងទៀតនៅស្រុកសង្គមថ្មីដែលគេដឹងថាជារបស់ប្អូនបង្កើតរបស់គាត់ប៉ុន្តែប្រជាពលរដ្ឋរាយការណ៍ថាជារបស់ឈ្មួញឈ្មោះឆឹងលាងស្រេងតែម្តង។ប្រជាពលរដ្ឋមួយចំនួននៅខេត្តព្រះវិហារនិយាយរិះគន់ថាចំណូលថវិកាមិនបង់ពន្ធចូលរដ្ឋពីវិស័យព្រៃឈើមានចំនួនរាប់រយលានរៀលក្នុង១ឆ្នាំៗបានធ្លាក់ចូលក្នុងកណ្តាប់ដៃក្រុមឈ្មួញនៅទូទាំងខេត្តព្រះវិហារហើយរដ្ឋទទួលបានចំណូលតិចតួចប៉ុណ្ណោះទៅនឹងការចរាចរលក់ជួញដូរផលអនុផលព្រៃឈើគេចពន្ធគ្រប់ប្រភេទ៕
