ខេត្តបន្ទាយមានជ័យ
ឈ្មួញបាននាំសត្វទានិងមាន់រស់ចូលពីថៃរាប់មឺុនក្បាលហើយងាប់រាប់រយក្បាលយកទៅបោះចោលពេញព្រៃអាជ្ញាធរកំពុងព្រួយបារម្ភការប្រឈមនិងជម្ងឺឆ្លងផ្តាសាយបក្សីដល់ប្រជាពលរដ្ឋនៅតាមជាយដែនយ៉ាងខ្លាំង ។សកម្មភាពទានិងមាន់រស់ដែលឈ្មួញនាំចូលតាមច្រករបៀងអូរបីជាន់ដែលគ្រប់គ្រងដោយកម្លាំងយោធា ស្ថិតក្នុងឃុំអូរបីជាន់ ស្រុកអូរជ្រៅ ឃើញថាឈ្មួញបាននាំចូលក្នុងមួយថ្ងៃៗមានទា និងមាន់រស់រាប់ម៉ឺនក្បាលដែលរថយន្តថៃដឹកចូលមកកាន់ទឹកដីកម្ពុជានៅតាមជាយដែនផ្ទាល់តែម្តង ។លោក សួង មឿន មេឃុំអូរបីជាន់បានប្រាប់ថា ជាការពិតឈ្មួញបាននាំទានិងមាន់រស់ក្នុងមួយថ្ងៃៗរាប់ម៉ឺនក្បាលដែលចូលតាមច្រករបៀងអូរបីជាន់ ដោយក្នុងនោះមានក្រុមហ៊ុនប្រមាណ ៣ទៅ៤ក្រុមហ៊ុន មានទាំងក្រុមហ៊ុនខ្មែរ និងក្រុមហ៊ុនវៀតណាម បានយកសត្វទានិងមាន់ដែលងាប់ដាក់នៅក្រោយសាលាឃុំ និងក្នុងភូមិ/ឃុំអូរបីជាន់ ។លោកបានបញ្ជាក់ថា ឈ្មួញដែលនាំទា និងមាន់រស់ចូលពីថៃគឺជាប្រភេទសត្វជម្រុះរបស់ថៃដែលជាហេតុបណ្តាលឲ្យសត្វទាំងនោះងាយនឹងងាប់ ហើយនៅពេលដែលងាប់ពួកឈ្មួញបានបោះចោលតាមព្រៃ បន្ទាប់មកប្រជាពលរដ្ឋទាំងក្មេង ទាំងចាស់ក៏បានរើសយកទាមាន់ដែលងាប់ទាំងនោះទៅបរិភោគ បើទោះជាអាជ្ញាធរហាមឃាត់ក៏ដោយក៏ប្រជាពលរដ្ឋនៅតែបន្តយកធ្វើម្ហូបដែលជាហេតុធ្វើឲ្យងាយនឹងការប្រឈមមុខឆ្លងជម្ងឺផ្តាសាយបក្សី ។ពាក់ព័ន្ធទៅនឹងឈ្មួញដែលនាំទា និងមាន់រស់ចូលតាមច្រករបៀងអូរបីជាន់អ្នកយកព័ត៌មានបានធ្វើការទំនាក់ទំនងទៅលោក ហ៊ុយ តូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ ប៉ុន្តែមិនអាចទំនាក់ទំនងដើម្បីសុំការបំភ្លឺបានឡើយ ៕